#میرزای لوڕستانی#
گرېوان بە سۊز زاری بېقەرار
جە ناگاﮪ ئەمیر ئاما جە شکار
پورسا ئەخبارات ئەی زایەڵەی شین
واتشان تۊ وەش مەوت بی خاتۇ زین
ئەمیر چۇن شنەفت حەیران بی جە کار
ڕېزا بە چەمدا ئەسرینان ھەزار
نە ڕۇی خانەی زین ئاما بە دامان
چەنی بوزۊرگان میران سوپاھان
ھۊرگېرتن پایەی تابۇتی خاتۇن
ئاوەردن بە شار بە دیدەی پەڕ خۇن
خولاسە شوستن ئەو نازک بەدەن
لاشەی شیرینش نېیان نە کەفەن
بەردن وە مەقبەر میرانی سالار
مەدفۇنش کەردن جە پەھلۇیی یار
ھۊرېزان بەیانێ مەخلۇقاتی شار
سەدایێ ئاما نەو ھەر دۇ مەزار
بەکر جەو دەمدا ئاما وە گوفتار
جودا وەبۍ یەک نېشان قەرار
ئەمیر چۇن شنەفت خرۊشا بە قار
فەرما بدەران ھەر دۇ ڕۇی مەزار
بېڵداران دەردەم داشان مەزاران
نگە کەردشان میران سالاران
ھەر کەس نە جای وېش شین نە جامەی خواب
تەبەق تەبەق نۇر مەخېزۊ وە تاب
چۇنکە دی بەی تەور غەزەب کەرد ئەمیر
ڕۇکەرد وە بەکر مەردۇدی بۍ پیر
ھەر دۇشان جە دەھر دونیا بەرشېیەن
ھېمای جە بەدی کۊتاھیت نېیەن
دەست پېکا وە تېغ ئەمیر بۍ درېغ
پېکا وە موھرەش تا یاوا وە مېغ
ڕۊحی پەلیدش شی وە جەھەننەم
ئەو خاس فاسدێ جە دونیا بی کەم
موقەڕەېبانش خەبەردار کەردن
لاشەی ناپاکش وە خاک سوپەردن
قەترەیێ جە ھۇن جېسمی بەدمەزھەب
کەفت نە بەین قەبری دۇ عالی نەسەب
جەو دەم ئەسەر دا خارێ نەودېیار
بېیەن وە ڕەقیب ئەو ھەر دۇ مەزار
ئیسە مەشھۇرەن نە سای چەرخی کین
تەواتر ماچان خاری مەم و زین
یاران ھۊرگېلان ئامان ئەو دۊما
مەردم ساکن بی جە شۊر و غەوغا
ئین بار بشنەوان یاوەرانی یار
چۇن لوا بەنگین یاری وەفادار
مەند وە یەک قۊناغ بېیاوۊ وە شار
شی نە واقېعە شەھی شەھریار
شاﮪ چۇن دیش نە خواب بەنگینە وە زار
بېدار بی جە خواب بۍ سەبر و قەرار
ئاوازکەرد یاران میرانی سالار
عەجەب خاوێ دیم نەی ھەنگامی کار
سالاران ئامان تەمام نە گوفتار
واتشان خەیر بۊ خەیرییەت ئاسار
ناگاﮪ جە تەقدیر پادشای جەبار
گەردێ نە سەحرا دېیاردا دېیار
وە دۇربین دېیا شا نە ڕۇی تەلار
واتش بەنگینەن مەیۊ بېمەدار
[1]