باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و سی و ششەمە
عەداسی کاهین، کتېبێش دا بە خەدیجەی بەرۊش پەی محەمەدی، نەک جن و شەیتانەکۍ دەسششا وەنە شانابۊ، دمایی پېوەرە(محەمەد و خەدیجە) لوێ پەی خزمەت و (عەداس)ی.
خەدیجە کیتاب عەداس خوەش زات
بەردش وە خزمەت، خواجەی کائینات
با بشین وە لای (عەداس)ی پەڕ فام
بەیان کەین، پەرێش حیکایەت تەمام
چەنی خەدیجە حەزرەت تەشریف بەرد
یا ناخی(عەداس)، وە نوور ئاوا کەرد
سەلام کەرد حەزرەت، سەلام ستانا
دەر ساعەت، حەزرەت، وە لای وېش وانا
جامەی موبارەک پەڕ شەرەفناکش
لابەرد، جە مابەین، کەتفەینی پاکش
موهری نبوەت، حەزرەت دیی بە چەم
جە شاڎیی سەر بەرد، وە چەرخی هەفتەم
وات: وەڵڵا کە تۊ، ئەو پېغەمبەری
ئەو شەفاعەت خوای، یەومەلمەحشەری
موژدەی، تۊشان دان هەردوو بە تەعجیل
مووسا، جە تەورات، عیسا جە ئینجیل
وات: ئەی خەدیجە، موژدە بۊ، وە تۊ
عەلعان محەمەد، پېغەمبەر مەبۊ
وات: یا محەمەد وەڵڵا جەو زەمان
تەکلیف کەر، مەردم، جە کوفری نسیان
کاشکی من جەودەم جە حەیات مەبیم
دایېم هەر خاشاک، خاکی پات مەبیم
چەنی ئەسحابت، تەکبیر بوانام
وە ڕووی دوشمنت، شمشېر بشانام
وات: یا محەمەد، سەرداری سەرتەوق
مەئمووریت، مەعلووم بېیەن وە مەخلووق
حەزرەت، وات: هەڵای لېم مەعلووم نېیەن
غەیر، جە ئەو شەخسە، ئامان و شییەن
عەداس)، وات: وە زود، وە ئەمری خالق)
تۊ ماموورەنی، وە سەر خەلایېق
بەعزێ، وە کازیب قەولت، مەزانان
بەعزێ، وە ساحیر، نامت، مەوانان
مەبۊ، وە ناچار چەی شارە بارکەی
جە قەومی شیرکەت، زاڵم، فیرار کەی.[1]