#وەلی دېوانە#
قیبلەم شەم مەبۊ، قیبلەم شەم مەبۊ
مەر هەر کەس چۇن تۊ نامش (شەم) مەبۊ
جەمینش چۇن بەدر دۇهەفتەم مەبۊ
پەروانەش خەریک خاری خەم مەبۊ
* * * * *
مەر هەر کەس باڵاش سەوڵی ساف مەبۊ
گېسۇش پڕ عەتر موشکی ناف مەبۊ
سەرداری ڕەندان ئېڵی جاف مەبۊ
چۇن تۊ بېمروەت بېئینساف مەبۊ
چۇن تۊ شەکەر لەب غونچەدەم مەبۊ
پەروانەش خەریک خاری خەم مەبۊ
* * * * *
مەر هەر کەس ئەبرۊش چۇن کەمان مەبۊ
زوڵف و خاڵ سېوەنگ چەم قەتران مەبۊ
وېنەی تۊ فیتنەی ڕۇی زەمان مەبۊ
وېنەی تۊ بېڕەحم بېئەمان مەبۊ
بېشەرت و بېبەین مۊبەت کەم مەبۊ
پەروانەش خەریک خاری خەم مەبۊ
* * * * *
هەر کەس پېشانیش پڕ جە نۇر مەبۊ
ساق و گەردەنش چۇن بلۇر مەبۊ
مەلایېک تەلعەت نەسڵی حۇر مەبۊ
بېپەروا جە ڕای (خودا) دۇر مەبۊ
چۇن تۊ دەلیلەی لوای ڕەم مەبۊ
پەروانەش خەریک خاری خەم مەبۊ
* * * * *
مەر هەر کەس چۇن تۊ لیمۊش کاڵ مەبۊ
سینەی سەدەف تا بۇمی لاڵ مەبۊ
ناف نافی غەزاڵ خوتەن ماڵ مەبۊ
نازاری باوان چاردە ساڵ مەبۊ
چۇن تۊ مۊبەتش مەردوم کەم مەبۊ
پەروانەش خەریک خاری خەم مەبۊ
* * * * *
مەر هەر کەس وەش بۊش سا چۇن لەیل مەبۊ
موژانش نەگەرد سورمە کەیل مەبۊ
هەزار کەس نە ڕاش سەر توفەیل مەبۊ
ناشی و نەزانحاڵ هەر بېمەیل مەبۊ
شەوقش بە وېنەی سپی شەم مەبۊ
پەروانەش خەریک خاری خەم مەبۊ
[1]