#میرزای لوڕستانی#
واتش ئەی میران سپاھان سالار
سەرانسەر جەھان گېرتەن گوڕەی نار
ئەگەر میر بەوېش نەشۊ بېمەدار
خانەی تاج‌ئەلدین سۊچۊ چەنی شار
ئەمیر ئېد شنەفت ھۊرېزا وە پا
تەمام ئېحزارات ڕاھی بین نە ڕاە
دیشان گوڕەی نار یاوان بە گەردۇن
ڕۇی سەحراش کەردەن وە زوڵماتی تۇن
جارچی جاڕش دا بېڵداران تەمام
مەردومان یاوان وە سەقفی سەربام
موئەزېن واناش ئەڵلاھ و ئەکبەر
بەرز بی گوڕەی نار چۇن نارولسەقەر
چەند ھەزار گۊزە و جلدانی پەڕ ئاب
ڕېزنان نە ڕۇی شەرارەی پەڕ تاب
تاکو درەنگێ کۊشش بی نە کار
ئاخر سەرئەنجام کوشیا کۇرەی نار
بەڵۍ نە ئەوتاق تاج‌ئەلدین نە جا
ئەسبابێ نەمەند تەمام سۊچېیا
نە ڕەخت نە ئەشیا نە ئەز حبۇبات
تەمام بی وەگەرد نە ڕۇی سەر بیسات
ئەمیر بە فەرماش وە گشت سەروەران
ئەعلا تا ئەدنا کارسازی کەران
خانەی تاج‌ئەلدین یەکسەر بی وە دۇد
مەبۊ بکەریش جوملە باروبۇد
جە فەرمای ئەمیر ھەر کەس جە لایێ
ماڵدار و بېمال ھەر تا گەدایێ
کەردن باروبۇد قەرە تاج‌ئەلدین
کۊ کۊ زەڕ و سیم کۊ بی نە زەمین
دۇ سێ چەندانە ماڵشان جەم کەرد
ئېلتېفات میر جە حەساب وېیەرد
گۊش بدەر وە مەم چەنی خاتۇ زین
جە سەرای ئەمیر جە یەک جودا بین
دەسماڵێ جە زین بەجا مەند نەو جا
بەکر پەنھان بۍ نە ئەو قەھا
دەردەم حازر بی ھۊرشگېرت دەسماڵ
وات مەڎەوش وە دەست میری بەرز ئېقباڵ
ئېحزاری مەجلېس گرد بی پەرېشان
ھەر کەسێ لوان وە جاگەی وېشان
ئەمیر ھەم ئاما نە جا گېرت قەرار
تەڵەب کەرد بەکر مەردۇدی مردار
ڕۇکەرد وە بەکر ئانە یانی چېش
ئەعلا تا ئەدنا مسکین و دەروېش
ئاما وە ھانای یانەی تاج‌ئەلدین
تۊ نامای بەو جا ڕاست واچە یەقین
قەیدێ نەدارۊ نامات بەرکەنار
دارا و نەدارا موفلس و ماڵدار
ھەر کەس وە پای وېش کېشا غەرامەت
نە غەرامەت دای نە کېشای زەحمەت
ڕۇکەرد وە ئەمیر ئەمیرانی پېش
ئاما وە گوفتار ئەو مەردی بەدکېش
کەسێ خانەی وېش بسۊچنۊ بە وېش
من پەی چېش مەڎەون غەرامەت پەرېش
ئەمیر جە ڕازان بەکر بی سەرسام
واتش ڕاست واچە حاڵی بۇن تەمام
بەکر عەرزش کەرد تەمەناو واچۊ
ئی سوخەن جە لای شاھێ وېنەی تۊ
[1]