#میرزای لوڕستانی#
گەردەن سوراحی چۇن مېنای بېگەرد
دېیارەن وە بان چاڵی تینی زەرد
پەڕ جە ماوی خاڵ فیرۊزەی خاڵان
دۊڕەن مەرجانەن دەھانی ڕومان
مەمان شەکەرسېب یا لیمۊی کاڵەن
یا خۊ شەممامەی زەردی بېخاڵەن
وەی وەی جە حەیان خەم وەردەن وە ھەم
بېیەن وە سەیوان سینە و خاڵ و مەم
باڵا چۇن نەوتۇڵ نەمامی عەرعەر
نایابەن جە لاش سەوڵی سنەوبەر
بەی تەرکیب ئەندام شۊخ و شەنگەوە
بەی سەرمەستی ناز مەدھۊش ڕەنگەوە
ئاما وە سەر ئاب خاو خاو خەرامان
چۇن وەحشی بېباک ئەو ماهی تابان
ئەمیر چۇن چەمش گنا بە ئەو نۇر
وات سەللۍ عەلا جەی ئازادە حۇر
یەکێ بۊ بەی تەور مەحبۇب و دوڵبەر
کۍ بۊ چۇن خورشید شەوقش دا ئەسەر
جواب دان دەردەم ھەر دۇ بەرادەر
واتن نۇری چەم غەمزەدەی غەموەر
یا کېسرەتی غەم فامت کەمکەردن
یا جورعەی نە جام سەرمەستیت وەردن
یا یانەی دەرۇن وېت کەردەن وېران
نەشناسی مەگەر دوختی ئەمیران
ھۊشت جەم کەرە ئەر زەڕەیێ پېتەن
مەعلۇم بۊ جە لات کە یاری وېتەن
ئەمیر چۇن ئەژنی ئی گوفتار و ڕاز
چۇن وەحشی مورغێ ئاما نە پەرواز
وات بەرادەران ڕازم مەکەن فاش
ئەر ڕەزا دارۊن من مەشۇ وە ڕاش
سەر وە خاکی پای سایەش مەوەرۇن
ئېستېدعایم ھەن عەرزش مەکەرۇن
ئاما بە جواب عەفۆی بەرادەر
واتش نۇری چەم ئەی یاری یاوەر
چارس و مەقامەن ھەر سۇیێ گوزەر
پەڕ جە غەممازان ئەی ڕۇی دەشت و دەر
نەک بشی وە ڕاش غەممازانی کار
جە لای میر زەیندین بکەران ئېزھار
سادېق وە خدمەت پېت مەبۊ تەباﮪ
مەشۊ نە ڕاگەش ساکن بەر نە جاﮪ
ئەمیر وات دونیا یەک فرۇکەشەن
دڵوازی چەنی ئەمیران وەشەن
چەکۆ وات عەفۆ چ کارت پېشەن
با بشۊ نە ڕاش کە یاری وېشەن
وېنەی ڕاوییان مەکەری تەدبیر
کارت پېش نەبۊ با نەبۊ دڵگیر
وات ئەی بەرادەر کە یاری وېتەن
بشۊ بواچە ھەر سوخەن پېتەن
ھەر نېیازت ھەن بواچە پەرېش
خۊفت ھیچ نەبۊ مەکەرە ئەندېش
ھۊرېزا وە پا ئەمیری نامدار
ڕۇکەرد وە جانب خاتۇنی نازدار
یاوا وە خدمەت سەوڵی نازپەروەر
سڵام داوەنەش چۇن شەھد و شەکەر
عەلەیک دا جواب خاتۇن وە حېجاب
ماندە نەبیش کەرد پەی خەیر و سەواب
[1]