باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و دواڼزەهەمە
بەخېرای ڕاهیب، بە چپە، بە ئەبوتالیبیش وات: یەهوودیەکۍ شامی زانانشا کە محەمەد ئامان پەی شامی، بە شمشېر، تەماو ڕاگېریشەنۍ، ئەپی تەرزە:
نیهانی واتش: وە ئەبوتایب
یەهوودانی شام، غالیبەن، غالیب
چەنی محەمەد، عەداوەت داران
دایېم وە ئەنگوشت، ساعەت مژماران
ئاردم، بەر جە شام، مەشوای سەفەر
ئەر مەشیی، حەزرەت، چەنی وېت مەبەر
چن عەدووی ناخار، گومڕا ها نە ڕېش
نەوا، ئاسیبێ، دووربا یاوۊ پېش
قەبیلەی قوڕەیش، یەکسەر جە غائیب
واتەن: محەمەد، جە لای ئەی ڕاهیب
خەیلێ موحتەرەم، قەدرش زیادەن
نیشانەی دەوڵەت، خودا بۍ دادەن
جەودەم، یەهوودان، جە ڕوم چن نەفەر
وە عیلمی تەورات، زانابین خەبەر
محەمەد جەی دەم، جەسم سەغیرا
ڕاش مەگنۊ، وە کەفر، وە لای (بەخېرا)
یەهوودان شمشېر، قەتڵێ بە تەڵ، ئەو
بەستەن، نە کەمەر، پەرێ قەتڵێ ئەو
یلغاردان وە جەخت، چوون بەرقی شاهب
تا کەفر مەشهوور، سەومەعەی ڕاهیب
گرد دیشان وە چەم، حوزووری حەزرەت
خورشید ڕوخساری پەڕ نووری حەزرەت
گرد وە(بەخېرا)، یەکسەر عەرز کەردەن
دەلیلی بورهان، تەورات، ئاوەردەن
واتشان: ئەی شەخس، دارای موعجیزات
چن وەسفش کەردەن، ئەلها، جە تەورات
نەسخ مەکەرۊ، دین موسای عومران
ماباقی ئەدیان، گرد پېغەمبەران
مەبۊ، قەتڵش کەین، وە سەر مەودای تېخ
ئەسڵی بنیادش، باوەرین، جە بېخ
تۊ هەم کۊمەک کەر، یار، هەر باقیەن
جە عیسا و مووسا، تەفاوت نېیەن
تەرسا و یەهوودی، هەرچن فنوونەن
تەورات و ئینجیل، هەر یەک مەزموونەن
ڕاهیب دا، جواب، تایەفەی یەهوود
واتش: ئەی شەخسە(واجبەلوجوود)
وەسفش جەو کتووب، سەماوی کەردەن
پەردەی حیجابش، وە ڕۊ، ئاوەردەن
یەدی قودرەتش بە ئەو ئەسیرەن
جە دامی دوشمەن، پڕێش ڕەهبەرەن
پەی قەتڵش، یارای، دەستی کەس نېیەن
مایەی عەقڵتان، یە، وە کۊ شییەن
هەم ئەگەر، ئەی شەخس، ئەگەر ئەو نەبۊ
ئاگاش، جە ئەعجاز، ڕٶیای خەو نەبۊ
جەویای مەعیشەت، زیندەگی وېشەن
قەتڵش، پەی ئېوە، فائیدەش چېشەن.[1]