#میرزای لوڕستانی#
سەقف ئەیوانم یاوان بە گەردۇن
گرەو بەردەنان نە چەرخ گەردۇن
نمەز نیشانەی یاگەی تۊ چېشەن
ئاواز بکەر بوین ئەر کەسێ تېشەن
واتش نیشانەی یاگەی من ئېدن
ڕۇی شانشینش نە بەڕ و بېدەن
چەند پەردەی عېسمەت زەربافت ئاڵا
تەمام ساچاغدار عەجایېب کاڵا
کېشیان وە ڕۇش پەی ڕەسم عېزەت
پەڕ جە کەنیزان گشت ساحېب حورمەت
نە پېشوازشەن باغێ چۇن ئېرەم
خەلافش نېیەن بۍ زیاد و کەم
سەروان سەرکېشان تەمام بە عېیۇق
شاخش سەرئاوېز چۇن زوڵف مەعشۇق
سەراوش وېنەی کەوسەر مەمانۊ
نە دەورش دۊڕاج قومری مەوانۊ
درەخت بېدان چناران ئاڵا
مەنمانان بە عەرش زەڕستۇن هاڵا
بوڵبوڵ مەوانۊ نە هەزار دەستان
گوڵان جەم بەستەن نە سەحن بوستان
سەد هەزار مورغان نەو باغ بەرین
تەمام هان نە زېکر جەهان-ئافەرین
شاخ درەختان ئەنجیر و ئەنار
ئەرمۊت و شېلاف مېوەی خۆشگەوار
هەر کەسێ بەو باغ بکەرۊ گوزەر
ڕەوزەی ڕەزوانش مەشۊ نە خاتر
واتش ئاواز بکەر کەنیزان وېت
ئەگەر ئېد ڕاستەن جواب بدان پېت
خاتۇن چۇن جە مەم شنەفت ئی سوخەن
شەکەرفەشان کەرد جە دۊڕاج دەهەن
هەرچەند ئاواز کەرد کەنیزان وېش
کەس ناما وەدەنگ هیچ نەیاوا پېش
عەجەب مەند خاتۇن سەرسام بی جە سام
عەرزکەرد وە خدمەت ئەمیری ئەنام
واتش ئاواز بکەر غۊڵامان وېت
بوینۇن چ کەس جواب مەدان پېت
بەنگینەی دلېر فەرمان بەردار بی
تا سوب پاسەبان هەم عەسەسوار بی
ئاواز کەرد بەنگین شای وەفاداران
فەوق نیکنامان نیکنامی یاران
جواب دا دەردەم بەنگین پڕ زات
بەڵۍ چېش ماچی سەرم ها نە ڕات
ئەمیر وات ئەحسەنت یاری وەفادار
پەسەندەی شاهان نیکۇی نیکۇکار
ئەمرێ وەم نېیەن نە جات ساکن بەر
بدارە وە چەم ستارەی سەحەر
موقەیەد ببەر تەمام با خەبەر
نەک جە فاسدان بوینم زەرەر
جەواب دا بەنگین وېنەی شەکەرگوڵ
جان فەداتەنمۍ بە گېیان و بە دڵ
هەر تا تەن جە تەخت جان گېرتەن قەرار
فەرمان بەردارم جە لەیل و نەهار
ئەم جار بشنەوە جە خاتۇن و مەم
دەست کردن باڵین دەم وە بانی دەم
تېغی زەهرئاڵۇد جە نافە بوار
قەرار دا ئەمیر پەی دەفع بەدکار
[1]