باخچێوە بېگەرد
نویستەی: میرزا ئۆلقاڎر و پاوەی
بەشۍ: نەوەڎ و دووەمە
حەلیمۍ، ئەڎای شۊتیەو محەمەدی بە پەلە محەمەدش ئاردۆ پەی یانەی، خەڵک و قۆم گرد گلېرۍ بیێ، دمای ئەژنیەی قومیاکەی، واتشان بە پەلە محەمەدی بەردۍ پەی لاو کاهینەکا، ئانە کارو جنیەن. با بزانمۍ چاگە چېش قۊمیۊ: محەمەد سەرئاماکەو وېش پەی کاهینەکا مەگېڵناوە، ئاڎۍ یەکسەر زاناشان کە ئانە نیشانۍ پېخامئاوەرینۍ، ئینە پېخامئاوەرو ئەخیر زەمانیەن، ئیتر داواشان مەکەرد هەکە تاکو زووەن محەمەدی بکوشان.
حەلیمە، چەنی شووهەرش جە نۊ
هۊرگرتەن محەمەد جە بانی ئەو کۊ
بەردشانۆ، دیسان، وە یانە
شایېع بی جە لاش، خوېش و بېگانە
جەمعێ جە مەردوم، خەیلێ فراوان
واتشان، ئاسیب، چېش پەنەش یاوان
سەلاح، هەر ئیدەن، بە سیدق و یەقین
بووەراش وە لای، یەکێ، جە کاهین
حەزرەت، فەرماوا، بە ئەهل و مەردم
سەحیحەلمەزاج، بی بەڵا و دەردم
خەیاڵی مەردوم، جە ئاسیبی جن
هیچ مەززڕەتێ، نەیاوان، بە من
خولاسەی کەلام، قەوم قبووڵ نەکەرد
حەلیم محەمەد، وە لای کاهن، بەرد
واتش: ئەی فزەند، دڵڕەبای دڵکېش
عەجیب وەی تەورە، واقیع بییەن لېش
چی ڕەمزە، خەیلێ، دڵ وە ئەندېشەن
بڎیەنە کیتاب، بزانە چېشەن
کاهن وات: جارێ خامۊش کەر زوان
تا، ئەو شەرحی وېش، بکەرۊ بەیان
محەمەد، تەمام، واقیعاتی وېش
بەیان کەرد پەرێ، گومڕای کینەکېش
کاهن چوون جەرگش، بەدیی وە تېشدا
محەمەد کېشا، وە سینەی وېشدا
فەریاد کەرد، جە نۊ، واتش ئەی مەحشەر
عەرەب، عەشایېر، قەومی بۍ خەبەر
بەیان، محەمەد، پارەکەن، وە تېخ
کەس، جە قەتڵی ئەو، نەکەرۊ درېخ
منیچ چەنی ئەو، بڕېزان هوونم
سەروازەن، جە خەم، دیکی دەروونم
ئەگەر بیاوۊ، ئېد بە حەددی وېش
نە ئوسووڵ، مازۊ، نە ئایېن، نە کېش
نە بت مەمانۊ، نە هەم بتخانە
مەبۊ، وە سەردار، ئەهلی زەمانە
ماوەرۊ، دینی، تازە وە ڕووی کار
باقی ئەدیان گرد، مەبۊ نگوونسار
جە بەتحا و یەسرېب، مەگېرۊ مەنزڵ
دینی میللەت گرد، مەکەرۊ باتڵ.[1]