Hewlêr (Rûdaw) - Nivîskara Kurd #Suzan Samancî# ya ku li Swîsreyê dijî, dê di navbera 3 û 8ê Kanûna 2022an de beşdarî “şev û sempozyumên edebiyatê” dibe û bi çend nivîskaran re dicive.
Suzan Samancî ku li Cenevre dijî, dê bibe mêvana şeva edebiyatê ya ku di 3yê kanûnê de li Maison Rousseau littérature ya Cenevreyê tê lidarxistin. Nivîskar, dîroknas û hunermenda dîtbar a xelka Cenevreyê Karelle Ménine jî beşdarî şeva edebiyatê dibe.
Çalakiyên ku bi hevbeşiya Navenda Wergerandinê ya Lozanê (CTL), AdS, Looren û Pro Helvetia û bi hevkariya malpera Écrire, encore – Suisse ve tên lidaxistin, piştgiriya ziman û çandên cuda dike.
Samancî herwiha dê bibe mêvanê çalakiya wêjeya cîhanê ya ku di 8ê Kanûnê de li Literaturehaus ya ji aliyê Verein Literaturstiftung ve tê lidarxistin.
Mêvanê din ê çalakiyê siyasetzan, wergêr û nivîskara Sirbî Vića Mitrović e.
Suzan Samancî kî ye?
Suzan Samanci di 1962yê li gundê Heşolê yê Amedê hatiye dinyayê.Pêşî bi helbestê dest bi edebiyatê kir. Helbestên wê di salên 1985-1987an de di kovara Sanat Olayı de hatin belavkirin.
Çîrokên xwe yên pêşî di kitêba bi navê Eriyip Gidiyor Gece (Şev dihele û diçe, 91) de dan weşandin. Kitêbên wê yên çîrokan Reçine Kokuyordu Hêlîn (Bêhna gêzoyê ji Hêlînê dihat, 1993), Kiraç Daglar Kar Tuttu (Çiyayên bejî berf girt, 1996) Suskunun Golgesinde (Li Siya Bêdengiyê, 2002) Korkunun Irmaginda (Di Robarê Tirsê de, roman, 2004) Halepçe’den Gelen Sevgili (Evîndara Ji Halepçê, 2009) weşiyan.
Çîrok û romanên wê bûn mijara lêkolînê. Xelata Orhan Kemal a sala 1997an wergirt. Çîroka Samanci ya bi navê Perili Kent (Bajarê bi perî) di pêşbaziyeke “Radyoya Dengê Almanyayê de, di nav 25 çîrokên pêşîn de hate nirxandin û bi zimanê tirkî û almanî weşiya
Çîroka wê ya bi navê İki Anne (Du dayîk) jî bo îngilîzî hate wergerandin û di kovara PENa Navnetewî de weşiya.
Kitêbên bo çend zimanên biyanî jî hatin wergerandin û di antolojiyan de cih girtin.
Di sala 2015an de dest bi nivîsandina Kurdî kir û pirtûka wê ya ewil a kurdî ya bi navê “Ew jin û mêrê bi maskê” ji Weşanên Avesta derket. Romana wê ya bi navê Mirzayê Reben” her dîsa ji aliyê Weşanxaneya Avestayê ve hat belavkirin. Herwiha roman wê ya dawîn a bi navê “Payiz yan ji Ziyap“ jî li ber çapê ye.[1]
Nivîskar Kurd Suzan Samancî ji sala 2008an ve li Cenevrê dijî û endama PENa Tirk û Kurd û Komeleya Romand PENa Swîsreyê ye.