باخچێوە بېگەرد
نویستەی: میرزا ئۆلقاڎرو پاوەی
بەشۍ: حەفتا و هەشتەمە
دمای ئانەی مەلائېکەکۍ محەمەڎ (ص) شا گېڵناوە پەی لاو ئەڎێش (ئامینۍ) ، باباش وەشیېنە قوربانیێ گۆرەش کەرد و چن سەر حەیوانېش سەرەبڕیۍ، خەڵکش داوەتی کەرد، یەرۍ ڕۋۍ خەڵک نان و ئاوشان وارد.
عەبدولموتەلیب، فارغ بیی جە غەم
جە شاڎیی سەر بەرد، وە چەرخی هەفتەم
چن شوتر، کەرد، زەبح، چەنی سەڎ ئەغنام
سۍ ڕۊژ، تا ئېوار، حازر کەرد تەعام
دەسدەس، مەخلووقات، وە زیافەت بەرد
زومرەی سەنادید، قوڕەیش، دەعوەت کەرد
پەرساشان، فەرزەند، تۊ نامش چېشەن
واتش: محەمەد، مەحموود هەم وېشەن
عەبدولموتەلیب، تا یەکڕۊ، بەردش
داخڵ وە حەرەم، بەیتوڵڵا، کەردش
هەر چوار، مەقام، مەککەی موعەززەم
تەواف کەرد، تەمام پەی جیغزی خاتەم
ئەو ڕۊ، هەر جە سوبح، تا بە خورئاوا
موناجاتش کەرد، هەر تا کە، تاوا
واتش: ئیلاهی، شای کەرەم بۍ شۊ
محەمەد تۊ دان، سوپەردم، بە تۊ
جە شەڕڕی دوشمەن، جە مەکری شەیتان
هەم جە قەزای سەخت، بەڵای ناگەهان
جە کەعبەی شەریف، هیممەت خواهی کەرد
تەشریف هەم، وە تۊی قەسری بەیزا بەرد
ئەو دانەی گەوهەر، شېوەی شیرینە
جە نۊ تەشریف بەرد، وە لای ئامینە
ئامینە واتش: ئەی نووری دیڎەم
تەوافت قەبووڵ، ئەی بەر گوزیدەم
دیڎەش چوون دیڎەی ئاهوانی دوور
سروستش دایېم، بە سورمەی کۊی توور
پرچی موشکینش، مەکەردش شانە
هەرکەس، مەدیدش، خوېش وبېگانە
ڕۊحی وېش مەکەرد، فیدای جەماڵش
مەفتوون بی، دایېم، جە نوختەی خاڵش
مەزانا، وېشەن، شای تاجی لەولاک
مەحبووبی بە حەقق، پادشای ئەفلاک.[1]