«فەقێ» تۊ عومرت بە شەست نزیکەن
هېمان ڕای حەقېق وەنەت تاریکەن
ها ئەعزات یەک یەک ڕوو کەرد بە سستی
هەنی کافییەن دونیاپەرستی
سەرف بی عومرت نە مەعرەکەی جەور
جەی بەند زنجیر، جەی مەزلەمەی دەور
قېیاس کەر جە وېت بمانی سەد ساڵ
بە عەیش و نەشئەت بە فەڕڕ و ئېقباڵ
چوون تۊ مەردەنی داری جە عەقەب
باقی مەمانی جە ڕەنج و تەعەب
حەیفەن پەرێ تۊ ئەی شەرمساری
بتەرس جە عېقاب زات قەههاری
حەزەر کەر جە قەهر زات بېئەمسال
غەیورەن ئەسمائ سیفات جەلال
جە حوزوور حەق چېشەن جەوابت؟
جە پای میزاندا چېشەن سەوابت؟
باوەر بە خەیاڵ تۊ ئەو ئېزدېحام
نازېرەن ئەو ڕۊ عالەم خاس و عام
مەکەر فەرامۊش نرکەی سەقەری
وېت مەکەر ڕیسوای زومرەی مەحشەری
«فەقێ» شرح حاڵ باوەر بە ئەنجام
بەر موحەممەد بۊ سەلات و سەلام
#فەقێ قادری هەمەوەند# [1]