سەردار سپای بێ وەفا و مەیلان!
سالار گرۆی دڵ جەقین کەیلان
پەی چێش، پەی ڕەقیب جەمن و یەردی؟
تەرک دووستی سەدساڵە کەردی
ناوەردت وەچەم جەفای سەد ساڵەم
نەکەردت وەیاد دەورەکەی تاڵەم
من کێشام جەفای بێ سامان تۊ
ئەو پێکا پەنجە وەدامان تۊ
من وێنەی بۊڵبۊڵ ناڵام و دەم دەرد
ئەو چۊن باغەبان خۊنچەی وەسڵت بەرد
من خار دووریم وەدیدە بەردەن
ئەو تەماشای گوڵ جەماڵت کەردەن
من بیم وە مەجنوون بیدی لۊنگ وەکوڵ
ئەو بی نەردەگای لوتف تۊ مەقبووڵ
من فەرهادئاسا کۊکەنیم کەردەن
ئەو بادەی نێگای شیرینت وەردەن
من بیم ئاوارەی کۊی عێش وەو نازت
ئەو بی وە مەحرەم ڕاز و نیازت
من بێ بەهرە بیم جەنیگای خاڵت
ئەو بی وەهام فەرد بەزم جەماڵت
من وێم وەسەنعان تۊم وە تەرسا کەرد
کفر و مۊبەتم و مەجلێس ئاوەرد
یەند سزام کێشا پەنەش نەزانای
دەرسێ و مۊبەت دڵم نەوانای
دەی تر مەحاڵەن دڵداریت کەروون
شەرت بۊ شکایت وەلای حەق بەروون
بەڵکم خوداوەند کەرۆ دیوانم
چەنەت بسانۊ سزای زامانم
بەڵکم ئێنتێقام بسانۊ چەنیت
قەزاو بەڵای سەخت بوارۆ پەرێت
تۊیچ بە وێنەی من گیرودە دام بی
مۊبتەلای فێراق دۊس ناکام بی
سەراپا هونین دووری یاران بی
نۊقتەی داییرەی دەردەداران بی
#ئەحمەد بەگی کۊماسی# [1]