ئەرۍ ئازیزم نەونەمام نۊ
حەرامەن ئی دەهر دنیا وە بێ تۊ
بینایی دیڎەم و دیدەی مەستت
و تاق ئەبرۊی وەهەم پەیوەستت
وە بەرزی قامەت نەی ئاسای نەی تووڵ
وە سێلسێلەی پېچ، حەڵقەی زوڵف لوول
بە شەرت و وەفای وەسەر نەبەردەت
بە عەهدوو سەوگەند چەنی من کەردەت
یەگشت سەوگەند بۊ بینایی دیڎەم
خەرام نەوخېز، ئەی بەرگوزیدەم
وېران ماڵەکەی، دڵەکەی کۊس وەکۊس
سفتەن وەئایېر دووری دیڎەی دۊس
تاڵەی من یەکسەر ئاسارش بڕیان
دیرەک سەر تاق ستوونش ڕمیان
وېش و بۍ یاگە مەندەن و ماتڵ
زاروو پەرېشان مەدهووش و خەجڵ
ئیسە نەوەتەن قەدیم فەرارەن
ئومېدش بە لوتف نیم نیگای یارەن
ڕایێ وەیانەی سفتە کۊش بەرۊ
فکرێ پەی دەرمان دەردێ نۊش کەرۊ
ئازیزم! قوربان! باڵا تووڵ نەی!
باوەس بۊ جەفات، ڕەحمت بۊ، تاکەی
ئەحیا دەرەوە حەیاتش جە نۊ
وەقەترەی عەرەق بەین دوو لیمۊ
ئاوپاشی کەرە، ها، وەش، یەک نەفەس
با وە تەمامی، نەبۊ وە قەقنەس
#ئەحمەد بەگی کۆماسی# [1]