چراخ وېیەردەن، چراخ وېیەردەن
هېجرانت یەک جار جە حەد وېیەردەن
ڕووی وەسڵت هەر بیم ئەی ڕوە پېم بی
جەو بۊنە هەر ڕۊ ڕۊڕۊ خودێم بی
ئیسە ها فەڵەک نیشان دادەن پېم
ئاخ ترسیاکەی گیر ئاوەردە وېم
ئەم جار کۍ تاقەت دووری تۊ دارۊ
دەک بەرق غەزەب وەبەختم بارۊ
پەژارەت، شادیم جە بېخ ئاوەردەن
دووریت خەیمەی دڵ ڕیشەکەن کەردەن
فېراقت فەرقم وە تووتیا کەرد
جیاییت ئەعزام جە هەم جیا کەرد
وەسواسەت بەو تەور نېش دان نە جەرگم
وە مەرگت قەسەم ڕازی وەمەرگم
وېت بدەر ئېنساف، خاڵۆکەی خۆش خۊ
مەردەن خاستەرەن یاخۊ دووری تۊ
مەردەن یەک ساتەن ئەرواحەکەی وېم
دووریت هەر ساتێ سەد مەرگەن پەرێم
مەر جەستەی خەستەی من جە فوولاد بۊ
یەند دووریت وینۊ هېمای هەر شاد بۊ
دەک ڕەحمەت وە قەبر گشت سینە سافان
خوسووسەن «یەعقووب» میرزاکەی جافان
چەرخێ چەپ چەنیم ڕاس بەستەن کەڵەک»
« چمان سەنگم دان وە مینای فەڵەک
دایېم پەی تۊمەن، ها، جە بەهانە
گاهێ ئېسفەهان، گاهێ جە بانە
نمەڎۊم فرسەت ساتێ و بېخەم
گەرد پاڵاکەت بماڵوون وەچەم
یا شەوێ شین کەم وەشەو ناڵینت
یا ڕۊیێ ڕۊکەم وە زاری و شینت
یا ناڵەم چەنی ناڵەت بخېزۊ
یا دیدەم پەرێت ئەسرین بڕېزۊ
یا شمەی جە شەرح دەوری دووبارە
داخ دەرد هېجر دڵەی سەد پارە
عېشوەی کرېشمەی حۊرجەمین گوڵ
عەرزە و پابۊس پەی تەسکین دڵ
چەپ گەرد نمازۊ ساتێ فەراغەت
ئەی خوا یا وەسڵ یا مەرگ یا تاقەت
#ئەحمەد بەگی کۆماسی# [1]