قیبلەم خاڵ تۊم، قیبلەم خاڵ تۊم
بە قورئان قەسەم کوشتەی خاڵ تۊم
زامدار خەستەی پای دەسماڵ تۊم
سەرعی، شەیدای دەست لال باڵ تۊم
پېکیای پەیکان موژەی سیای تۊم
بېهۊش و خامۊش وەلای دیای تۊم
جە ڕۊ بېخۊراک شەو بېخاو تۊم
ئەر موسوڵمانی، دڵ کەواو تۊم
ئەگەر حاڵزانی، من بېحاڵ تۊم
سەنعانم ئازیز، دین بەتاڵ تۊم
شېتم هەم شەیدای یەخەی واز تۊم
فیدای ئەگریجەی مېقرازگاز تۊم
قەیس ئەراگېڵ دیدەی مەست تۊم
مەحبووس دوساخ هەم پابەست تۊم
بەهرام! تا وە حشر نمەدپۊش تۊم
قوربان! من غوڵام حەڵقەگۊش تۊم
فەرهادی کۊکەن، جەفابەردەی تۊم
عاڵەم مزانۊ وېڵ و هەردەی تۊم
کەسم نەمەردەن عازیەت بار تۊم
دوورا و دوور جە تۊ گرفتار تۊم
جەفای بېسفات ئازیز تا وەکەی؟
بۊی سەردی وەفات ئازیز تا وەکەی؟
تاکەی ڕوخسارم زەرد بۊ وېنەی بەی
تاکەی هەناسەم بەیۊ پەیاپەی
تاکەی چوون مەجنوون لونگ خەمپۊشم
تاکەی چوون کوورەی ئاهېر بەجۊشم
تاکەی لەیلەکەم بەرگم پەڵاس بۊ
تاکەی تەن ڕېزە ڕېزەی ئەڵماس بۊ
تاکەی هېجرانت بەی تەور جاری بۊ
تاکەی خەدەنگت نە دڵ کاری بۊ
تاکەی بەرگەکەم قەڵاخی پۊش بۊ
تاکەی عەیش و نۊش جەلام خامۊش بۊ
ئەر مروەتت هەن وەسەن کافېیەن
چینە زیاتەر بېئېنسافېیەن
وەسەن، کافېیەن سەوڵ سایەدار
ڕەحمێ کەر وەحاڵ ئی بەندەی هەژار
تاکەی جە زوان لاڵ بۊ پەی حاڵت؟
ڕەحمێ وەجەستەی سفتەی ئەوداڵت
هەی زەڕڕەی سفتەی لېوە بمانۊ
مەشهوور بۊ نەعام گشت عاڵەم زانۊ
گشت عاڵەم زانۊ زەدەی شەست تۊم
قاتڵ! من مەقتووڵ دیدەی مەست تۊم
مۊهرەن وەسەلام «ئەحمەد » داخ نە دڵ
ئازیز! سا نمازە داخ بەرۊ وە گڵ
#ئەحمەد بەگی کۊماسی# [1]