فەڵەک بەردەنم فەڵەک بەردەنم
ڕاسەن سوجدەی دەیر تەرسا بەردەنم
دەستم دامانت دیدەم و لەیلات
وادەی وەفاتەن ئېزهار کەر وەفات
وەختێ مەورام و ئەلحەد سەرای نۊ
جە داخ تۊوە مشووم وە گڵکۊ
جە بۊنەی کارێ، شای وەفاداران
قەدەم ڕەنجەکەر وەسەر مەزاران
هەر قەبرێ دوودش نە عەرش وېیەردەن
تەپ و دووی دووکەڵ عاڵەم قڕ کەردەن
بزان وە تاقی مەزار منەن
ئەو دوو دووی دڵەی ئەوگار منەن
نەواچی مەمات نە سەرای گڵکۊن
حەیات و مەمات، ئاما و لوای تۊن
بخرامە و ناز و سەر جەنازەم
بکەرۆ حەیات، مەمات تازەم
ساتێ مەدارکەر نە پای مەزارم
گۊش دەر وە ناڵەی دڵەی ئەوگارم
تا داد و بېداد، هېجران باڵات
مەحروومی دیدەم نە گەرد پاڵات
نەمانۊ نە دڵ عەرز کەرۊ وەتۊ
با نەشۊ وە حەشر، چوون شی وە گڵکۊ
«ئەحمەد» دەرد دڵ ئەر واچۊ وەتۊ
سەر ئازاد مەبۊ نە سەرای گڵ کۊ
#ئەحمەد بەگی کۊماسی# [1]