باخچێوە بېگەرد
نویستەی: میرزا ئۆلقاڎرو پاوەی
بەشۍ: پەنجا و هەشتەمە
دمای ئانەی تەدارەک ئاماڎەکریا، خەڵک و عەشرەت پەی مەراسیمو مارەبڕیەی (ئامینۍ) کناچۍ وەهەبی پەی (عەبدوڵڵا) و کوڕو عەبدولموتەلیبی چڕیێ:
بینای کاری خەیر، شاڎیی نیاشان
قوڕەیش گرد جەم بین، جە بارەگاشان
کەردش تەدارەک، قوماشی ڕەنگین
پارچەی ئەتڵەسی، دیبای کاری چین
جوملەی ماکوولات، خاتر بیی تەمام
جەم کەرد، بوزرگان، (مەککە) و میسر و شام
وە خاترخوازی، (وەهەب) ، کەرد ڕازی
دەرسات، وە مەجلیس، تەڵەب کەرد قازی
وە ئەمری قودرەت، دانای داوەریی
زوهرە، شیی، نە بورج، بەرزی موشتەریی
جەو ساعەت، سەعد، وە ئەمری ئەڵڵا
عەقدی (ئامینە) ، کەرد پەی (عەبدوڵڵا)
سازا، بیساتێ، بەزمێ، شاهانە
نە شاﮪ، بەڵ، بەزمی پېخەمەرانە
مەلایېک، نە عەرش، کەردشان، شاڎیی
داشان، نە مەقام، موبارەک باڎیی
مەششاتان، عورووس، ئارایش کەردەن
دەمدەمی، مەلبووسات، پەرۍش ئاوەردەن
ئەو شەو مەهوەشان، وە دڵەی پەڕشاد
ئامینەشان، بەرد، وە یانەی، داماد
تاکە دوو سێ ڕوز، جە مابەین، وېیەرد
داماد نزدیکی، ئامینەش، نەکەرد
دوو سەڎ، جە مەحبووب قوڕەیش و حیجاز
شۊخ و شەم ڕۊخسار، شیرین غەمزە و ناز
دەردەم، وە فیراق، عەبدوڵڵا مەردەن
ئاهو حەسرەت، گرد، وە تۊی خاک بەردەن
[1]