باخچێوە بېگەرد
نویستەی: میرزا ئۆلقاڎرو پاوەی
بەشۍ: پەنجا و ششەمە
بە نیەتو کوشتەی عەبدوڵڵای تاتەو محەمەڎی(د.خ)، حەفتا نەفەرۍ جەنگاوەرۍ یەهوودیۍ جە وەڵاتو شامیۆ ئامێ، چوونکوم دلۍ چەماو عەبدوڵڵاینە نوورو حەزرەتی وینېنۍ، جە ئامای دنیای پېخامئاوەرو ئیسلامی خەبەرشان بۍ:
جەو دەم یەهوودان، هەفتاد کەس جە شام
گرد دلېر دلېر، مەردی خۆش ئاسام
گرد لێو غەرەز، وە دندان گەستەن
گرد، کەمەر، پەی قەتڵ، (عەبدوڵڵا) بەستەن
سوار بین، وە جەخت، پەی کەردەن، وە دەو
قەترە، دان، جە قین، یەلغار دان، جە شەو
تاکە یەک جەبەل، مەکۊگای زەریف
یەک ساعەت، قەریب، وە مەککەی شەریف
چەو دەم (عەبدوڵڵا)، بە عەزمی شکار
سوار بیی وە ئەسپ، تا بەرشی، جە شار
یاوا، بەو جەبەل، مەکۊگای، ئېشان
ئەوان، هەم دیشان، نەخچیری وېشان
چەو دەم هەم وەهەب، بن عەبدولمەناف
جە شکارگای وېش، ئەسپ، مڎا، پەرتاف
دیش هەفتاد سوار، پەڕ، سامی سەنگی
یەهوودی بېشەرم، دلېری، جەنگی
جە ناگاه، هەم دیش، یەک تیپ ڕەنگین
جە ڕووی ئاسمان، ئامان، وە زەمین
وەهەب، جە غیرەت، توڼ بیی، نېهادش
چەنی، چن سوار، لوا، ئېمدادش
داوازان، دا، وە دلېرانی، کار
دەوری عەبدوڵڵا، گرتەن، چوون حەسار
گرد تەرحی عەجیب، مەردی باویقار
تەمام، نیقاب پۊش، گرد ئەبلەق سوار
ناگاﮪ، وېنەی شېر، گرد هەڵمەت، بەردەن
سوپای، یەهوودان، تار و مار، کەردەن
جە بەرزی ئېقباڵ، فەتحی ئەو خەواس
عەبدوڵڵا، نە چنگ، دوژمن بیی خەلاس
وەهەب، واقېعە، وقووع دیی، وە چەم
خەیلێ حەیران، مەند، ڕەمزی ئېبن عەم
موعاوەدەت، کەرد، تا بە یانەی وېش
وات: بە حەرەم، ڕاز، مەحرەمانی وېش
واتش: هەر ئېدەن، ڕەزای، ئین جانب
بشۊ، تا وە لای، عەبدولموتەلیب.
[1]