باخچێوە بېگەرد
نویستەی: میرزا ئۆلقاڎرو پاوەی
بەشۍ: پەنجاو یەکەمە
میرزا ئۆلقاڎرو پاوەی، جە باسکەردەی ژیوای نەوەکا حەزرەتو نووحی (عەلەیی سەلام) و بەشکەردەی سەرزەمینی ملو وېشارە بەردەوامەن:
ئەقلیمی مەغریب، کەردشان، بەش بەش
یەکێ شی موودان، یەکێ شی حەبەش
یەکێ هیندوستان، یەکێ زەنگەبار
سارا و بەندەران، گرتشان، قەرار
ئەغلەب جە ئەدیان، قەدیم وېیەردەن
هەرکامشان، دینێ، ئېختېراع، کەردەن
میللەت میللەتان، ئیسە ها عامەن
فېشتەر، جە نوتفەی ئەولادی جامەن
هەرچی حەبەشی، زشت و سېیاە ڕەنگ
توخمی ناشیرین، زشتی بەڎ ئاهەنگ
گەڎای کۊنەدڕ، ڕەزیلی ئەدبار
نۊکەری غوڵام، عەبدی خزمەتکار
جەی دنیا، یەکسەر، گرد ناتەمامەن
ئانە، نیشانەی ئەولاڎی (حامەن)
بەڵام چونکم نووح عەلەیهی سەلام
دۊعای خەیرش کەرد، پەی ئەولادی سام
وات: زومرەی ئەولادت، گرد ئەولیا بان
باقی هەر تالیب، کەسبی حەڵاڵ بان
وەحوکمی فەرمان، دانای لەم یەزەل
ئەولادانی (سام)، ئەنبیای مورسەل
نۊ فەرزەندی ئەو، بېیۍ بە نۊ هەزار
جە ڕووی دنیا و دوون، گرتشان قەرار
حېجاز و عېراق، مەککە و میسر و شام
فارس ئەقلیمات، خوراسان، تەمام
مەعموورەی وەسەت، دنیا سەرانسەر
بی، بە موڵکشان، بە ئەمری داوەر.
[1]