باخچێوە بېگەرد
نویستەی: میرزا ئۆلقاڎرو پاوەی
بەشۍ: چل و چوارەمە

بە فەرمانو خوڎای گۆرەی، هەرچی هەورۍ بېنۍ جەمېش کەردۍ و تار و مارېش کەردۍ، حەزرەتو نووحی جە ئاسمانی ساف و پاکۆ (پلوورە وارانی)ش وەرچەم کەوتە، ئیتر نیشانەکۍ وەشی و مدرای وارانی و لافاوی بەرکۆتۍ. حەزرەتو نووحی (قاڵاو)ش پەی هەواڵ زانای کېیاست، بەڵام ڕانە قاڵاو یاوا بە گیاندارێ مردارۆبیەی، نیشت سەرش، دەسشکەرد بە واردەیش، فەرمانو حەزرەتو نووحیش فەرامۊش کەرد، حەزرەتیچ دۊعاش وەنە کەرد، تاکو ڕۊ قیامەتی ڕوەش سیاوەنە.
یەک ڕۊ، وە فەرمان، دانای کردگار
سېلسېلەی سەحاب، گرد بیی تار و مار
بوڵند بیی، بوخار، سیای تۊف و تەم
نووح دېیا، قەوس و قوزەح، دی وە چەم
فەرما، هەنی دڵ، خاڵی جە خەوفەن
ئانە، نیشانەی، ئینتیهای، تۊفەن
یەک بادێ، ئاما، چن شەماڵەی شەم
بەحری تۊفانش، شەقشەق کەرد، وەهەم
زەمین، هەم ئاوش، فرە وەردەوە
هەر ئەوەند نۊشا، تا قەید، کەردەوە
تا، ڕەفعی تۊفان، بی ئاشکارا
فەرق سەر بەرزان، گشت کەوت وە سارا
فەرما، وە قاڵاو، عالەم، گرد غەورەن
بشۊ، بزانە، دنیا، چە تەورەن
سەر زەمین، هەر کۊ، کەوتەبۊ، وە بەر
تۊ، هەم وە تەعجیل، زوو خەبەر، باوەر
قاڵاو، جە کەشتیی، بەر ئاما، وە بەر
پەرواز کەر وە باڵ، تاو مەدا، بە سەر
تەقدیر، مردارێ، بیی، وە دووچارش
بڕیا، پای تاقەت، سەبر و قەرارش
هەر تا، زەهری مار، مردارش کەرد نۊش
فەرمانی حەزرەت، نووح، کەرد فەرامۊش
فەرما، تا دنیا، هەر ڕووسیاه بۊ
ڕۊزیش، جە جیفە، بەڎ موهییا بۊ
[1]