لە شوعلەی ڕووی کەمەرچین زێڕ و زێوان
چ زەهرەی زوهرە و کەیوان کە بێ وان
شوعاعی میهر و مەه لاچوو لە نێوان
لە دوگمەی سینە دوێنێ نوێژی شێوان
بەیانی دا سپێدەی باغی سێوان
لە بەر ئەبرۆی کەوان و تیری سەر ژێت
هیلال ئەمشۆ بە خۆی گوت تەنگ ئەبێ جێت
خزی ڕووبەند و کاتێ کەوتە بەر پێت
لە خەوفی تەڵعەتت ڕۆژ هەر وەکوو شێت
بە ڕوو زەردی هەڵات و کەوتە کێوان
شەمیمی عەتری زولفت عەینی شەوبۆ
شکاندی پشتی گوڵ خونچەی دەمی تۆ
نیگارم وەک گوڵە هەم ڕەنگە هەم بۆ
مەکە مەنعی پەشێوی دڵ کە ئەمشۆ
پەشێواوە لەبەر پەرچەم پەشێوان
دوو زولفی عەنبەرینی نافە میشکن
دوو چاوی مەستی بیمار و پزیشکن
لە چاو من جۆیبار و جۆگە ویشکن
دوو چاوی من کە وا کەیلی سریشکن
دەپێون ئاوی بەحری خوێ بە پێوان
بە ئوممێدی قەدی نەورەس نیهالی
قەسەم خۆرە حەقیقی بۆ ویسالی
کە بەو دوو نەرگیسی چاوی خەزالی
شەڕابی لەعلی ڕوممانی لە (#نالی#)
حەرامە بێ مەزەی ماچێکی لێوان [1]