باخچێوە بېگەرد
نویستەی: میرزا ئۆلقاڎرو پاوەی
بەشۍ ویس و هەشتەمە
میرزا ئۆلقاڎرو پاوەی باس جە ژیوای حەزرەتو ئاڎەمی و نەوە و وەچەکاش مەکەرۊن، باس جە هامسەرگیری وەچەکاش، ژیوای ئاڎەمی و حەوێ کەرۊن، پېڎابیەو قابیلی قاتڵی چەنی واڵێوەش بە یەک لەم، دماتەر پېڎابیەی هابیلی مەزڵومی چەنی هامشۊتەکېش کەرۊن.
جەفای ماه و ساڵ، کەردەن، فەرامۊش
مەشغووڵ بین، بە زەوق، سەفای عەیش و نۊش
تا، حەوا حەمڵش، زاهیر بی، جە نۊ
نۊ ماهش ویەرد، یاوا، وە نۊ ڕۊ
پېڎابی قابیل، قەبیحی قاتڵ
چەنی ئەقلیمات، جەمین پەڕەی گوڵ
هابیلی مەزڵووم، مەقتوول بە قەتا
چەنی هامشیرە، زشتیی وېش لېزا
جە بەتنی (حەوا)، جە پەشتی (ئاڎەم)
هەر چوار، دوو ساڵ، پېڎا بین، وە هەم
قابیل هابیلش، دا، وە گەردەوە
پەی دنیای فانی، قەڵش کەردەوە
جەو دما، (شیت)ی موبارەک قەدەم
خوڎا، عەتا کەرد، یەک شەو وە ئاڎەم
نووری موحەممەد، ڕەوزەی ڕەزوانیش
مەدرەخشا، چوون خۆر، نە ڕووی پېشانیش
هەر کەسێ یەک جار، بویناش وە چەم
نمەشیی یاڎش، تا وە ڕووی مەردەن
حەوا، تا بیست ساڵ، ساڵی دوو فرزەند
مەوینا، وە حوکم، زاتی خوڎاوەند
(ئوناسی) پارین، بۍ غوسسە و خەیاڵ
مەکەردش هام جفت، (زکووری) ئەم ساڵ
غەرەز وەی تەرتیب، ئەولادی ئاڎەم
زیاڎ بین تەمام، جیا بین، وە هەم
یاوان چل هەزار، بۍ زیاڎ و کەم
نەبیرەی فەرزەند، ئەولادی ئاڎەم
وېش هەم هەزار ساڵ، عەمرش ویارا
چەنی فەرزەندان، دارا و نەدارا
گاه جە هەندێ مشت، مەکەردش ڕاحەت
گاه جە عەرەبستان، مەکەرد ئیسراحەت
گاه تەوافی بەیت، کەعبەی موعەززەم
ویارا، دەوران، دنیای بەینەت کەم
شوکرانەی بېحەدد، خوڎاوەند کەردش
ئەمر و نەهی حەقق، وە جا، ئاوەردش
[1]