نۋیستەی: ئاکۆ مارانی
11و ئەپڕیلو 2017
مانیفێست-کەرڎەو ئازاڎی باوەڕی و ۋێرۆکەرڎەی
ئەر ئېمە گەرەکما بۊ ئاشتی و دادپەروەریی و یەکسانی و مافو گرڎو ئەڼاما کۊمەڵۍ مسۆگەر کەرمۍ، پەنەۋاز ھەن، ئازاڎی و ئازاڎی ۋیرۆکەرڎەی و نۋیستەی و وۍ-ڕېکۋستەی کەرمۍ بە تەۋەنۊ بناخەو ڕاۋەبەریی کۆمەڵەکاما.
ئەر ئېمە گەرەکما بۊ ئازاڎۍ بیمۍ و پەی یاۋای کۊمەڵەکېما بە کارۋانو کۊمەڵە ئازاڎەکا زەمینەسازیی کەرمۍ، پەنەۋاز ھەن، ئازاڎی باۋەڕی و ۋیرۆکەرڎەی کەرمۍ بە بنەماو کولتۇری و ڕۊشنۋیری وېما. ھەڵبەتە ئانەیچە ۋاچۇ، کۊمەڵۊ ھۆرامانی پېسەو کۊمەڵېۋۍ ناخېڵەکیۍ تاکو ڕادېۋ تاک-گەرایی پنەیاۋان؛ تاک-گەرایېۋ، کە سەرو پایەو ھەرەوەزیی ئازاڎانەی کۊمەڵایەتی مدران، تەمام پېچەۋانەو تاک-گەرایی بازارییانەو نیئۆلیبڕالیزمی. بەڵام ۋەرو ئانەیە کە کۊمەڵۊ ھۆرامانی چە نیمەو سەڎەی ۋېیەرڎەیۆ تاکو ئیسە بە ئایدیۆلۆجیاگەریی و پارتییایەتی و سیستەمی ڕامیاریی و ڕامیارییکەرڎەی ئایینی ئاڵۇڎۍ بېیېنە، ھەم مافە سرۇشتییەکۍ و ھەم ئازاڎییە کەسییەکۍ و ھەم تاک-گەرایی و ھەروەزیی کۊمەڵایەتی بەجۊرېۋ دلېنە لۋێنۍ و چا ڕایچۆ ئاشتەۋایی کۊمەڵایەتی و ئازاڎی کەسییچ پېسەو تایبەتمەڼی کولتۇریی دلېنە لۋێنۍ و جۊرېۋ چە خېڵگەرایی ھامچەرخی [حزبایەتی] خېڵگەرایی ڕامیاریی و پارتییایەتی سەرو کولتۇری و ڕۊشنۋیری خەڵکو ھۆرامانیرە زاڵۍ بېیېنۍ.
ۋەرەو ئانەیە و پەی ئانەیە، ئەر ئېمە گەرەکما بۊ، بەڕادەی کەم بنەما کولتۇریی و ڕۊشنۋیرییەکا ئازاڎی تاکۍ و ئازاڎی ۋیرۆکەرڎەی زیڼە کەرمېۋە یان بە کارۋانو کۊمەڵە تاکو ڕادېۋ ئازاڎەکا بېیاۋمۍ، مشیۊ ئی بنەمایا پېسەو تەۋەنۊ بناخەو کولتۇری و ڕۊشنۋیریی وېما بژناسمۍ:
- ئازاڎی کۊبېیەی [کۊنیشتی]
- ئازاڎی وېنیشاندای
- ئازاڎی وېڕېکۋستەی
- ئازاڎی ناڕەزایەتیکەرڎەی و داوازیکەرڎەی و ڕەتۆکەرڎەی.
- ئازاڎی بېیەی و نەبېیەی ئایینی و ۋیرۆکەرڎەی ئایینیی.
- ئازاڎی نۋیستەی ؛ ھەم ئازاڎی نۋیستەی بە زۋانی ئەڎایی و ھەم ھەر زۋانېۋ کە کەسەکۍ ئارەزۇمەڼۍ ھەنۍ و ھەم ئازاڎی نۋیستەی بەپاو ۋیرۆکەرڎەو وېشا.
- ڕۊشنگەریی چە ڕاو نماییشنامەی و چالاکی کولتۇریی و ڕۊشنۋیریی پەی ھۊشیارکەرڎەی کەسەکا و ئاشتۆکەرڎەیشا و ھاڵیکەرڎەیشا چە بارگاۋی بېیەی بە ئایدیۆلۆجی و پارتییایەتی.
- ئاشناکەرڎەی و پەرۋەرڎەکەرڎەی زاڕۊڵا سەرو بنەماکا ئازاڎیی کەسیی و ڕێزگېرتەی چە جېیاوازی ۋێرۆکەرڎەی کەسەکا.
- ڕاگیری چە ھەر لایەنېۋی و کەسېۋی کە گەرەکشبۊ ئازاڎی کەسانی تەری پاشېل کەرۊ و ملھوڕیی ئایدیۆلۆجی و ڕامیاریی و پارتییایەتی وېش سەرو کەسانی تەریەرە سەپنۊ.
- ئانۍ و ھەر خاڵېۋە تەرە، کە بە ئازاڎیی کەسیی و کۊمەڵۍ خزمەتکەرۊ و ئازاڎی و ڕزگاری و یەکسانی و داڎپەروەریی پەی گرڎو مرۊڤەکا ھەر کۊمەڵېۋۍ و گرڎو کۊمەڵەکا مسۆگەرکەرۊ....تد
- ..... تد.
------------------------------------------
وەنەرۍ بەڕێزی، پەی ئەژناسای پیتە تایبەتە ھۆرامییەکا دلۍ ئی نۋیستەیە، سەرو لینکو پیتەکا کلیک کەردۍ:
- ڎ: ئەڎا: دەنگ https://t.me/Ferhengu.Zvani.Horami/6322
- ۋ: ۋاران: دەنگ https://t.me/Ferhengu.Zvani.Horami/6328
- ڼ: مەڼ: دەنگ https://t.me/Ferhengu.Zvani.Horami/6324
- ۊ: لۊ: دەنگ https://t.me/Ferhengu.Zvani.Horami/6326
- ې ۍ: دەنگ https://t.me/Ferhengu.Zvani.Horami/6330
- ﯗ = و: مۇ
لینکو گرڎو پیتەکا ئەلفابێتی ھۆرامی
https://t.me/Ferhengu.Zvani.Horami/7588
[1]