نۋیستەی: ئاکۆ مارانی
11و ئەپڕیلو 2017
مانیفێست-کەرڎەو گەشتوگوزاری
پەی ئانەیە کە گەشتوگوزار بۊ بە مەڵامەتو ئاۋەڎان بېیەی و وەشگوزەرانی خەڵکی، مشیۊ بەرنامەو گەشتوگوزاری سەرو بنەماو ئابۇری ژیۋارپارېزی [ئابۇری ئیکۆلۆجیی] نریابۊرە، کە ئی چڼ خاڵە مېتاۋا بەشېۋ چە خاڵە سەرەکییەکاش با:
- ڕاگیری چە ئامای ئۆتومەبیلو سێرانکەرا پەی دلۍ دەگێ و باخەکا، پەی ئا مەبەسییە، مشیۊ لاو واری یان سەرەتاو ھەر دەگێۋۊ ھۆرامانینە، گەراجی تایبەت پەی ئۆتومەبیلو سێرانکەرا کریۊۋە و دەرامەتو ئا گەراجییە پەی خزمەتگوزاری دەگاکۍ بۊ.
- یاۋنای سێرانکەرا ئۆ دلۍ باخەکا بە وڵاخۍ و کۊڵبەریی خەڵکو دەگێ یان بە وڵاخ و کۊڵبەریی ئا باخدارەیە، کە تەڵانۊ باخەکەو وېش بە سێرانکەرەکەی بە کرۍ دێنە.
- سێرانکەرۍ پەیشا نەبۊ، کە وارڎە و ئاۋی و شەربەتە و شیرینی بەرو ھۆرامانی بارا و مشیۊ چە دوکانا دەگاکېنە پەنەۋازیییەکاو وېشا بسانا.
- مشیۊ سێرانکەرەکۍ شەخەڵو سێرانەکەو وېشا چنی وېشا بەراۋە شار و دەگاو وېشا.
- بەشۊ زانیاریی گەراجو سێرانکەرانە، تابلۊ نامۊ گرڎو ئا باخدارا کە یاگۊ سێرانکەرڎەیشا ھەنە، ھەر پاسە گرڎو کۊڵبەرا و وڵاخدارا و گرڎو خزمەتگۊزارییەکاش چنە بۊ.
- درۊسکەرڎەی ھۆتێلۍ|مېمانخانەی و یانەی تایبەت پەی بەکرېدای بە گەشتیارا پایینو دەگێۋە؛ پایینو دەگێۋە ھەم پەی پارېزنای ئاساییشو خەڵکو دەگێ و پەی پارېزنای ئاساییشو گەشتیارا.
- درۊسکەرڎەی چاشتخانەی گونجېیا و تایبەت، کە بېتاۋا وارڎەی خێرا و ئاماڎە پەی گەشتیارا ئاماڎەکەرا و پەی دلۍ باخا یان مېمانخانەکا کېیانا.
- گرڎو باخدارا مافی یەکسانشا بۊ، کە تەڵانېۋە یان چڼ تەڵانېۋ پەی بەکرېدای و گەشتوگوزاریی تەرخانکەرا.
- ھەر باخدارېۋ کە بەشی تایبەتش پەی گەشتوگوزاری بۊ، مشیۊ ئاۋدەس و گەرماۋ و دەسشۊر و خزمەتگۊزاریی تەرۍ پەی سێرانکەرا درۊسۍ کەرۊ و دەسەبەرۍ کەرۊ.
- ھەر باخدارېۋ کە بەشېۋ چە باخەکەیش پەی گەشتیاری تەرخانکەرڎەن، مشیۊ باجېۋی کۊمەکیی بە شارەۋانی دەگێ بڎۊ.
- درۊسکەرڎەی و ئەۋەکەرڎەی ناوەڼو وەشۆبېیەی تەندرۊسی Rehabilitation Center تایبەت بە بەشی دەرۇنی و جەسەیی، کە ھەم ئاۋ و ھەۋاو ھۆرامانی و ھەم کەشەکېش و ھەم کولتۇرەکەش پەی بېیەی ئا ناوەڼا دەسمڎۊ و گونجېیا ھەن، کە متاۋۊ سەرچەمەو دەرامەتېۋی فرەی بۊ پەی دەگاکا ھۆرامانی، بەتایبەت ئەر سەر بە شارەۋانی دەگێ بۊ، یان بەشېۋ چە دەرامەتیشا پېسەو باجی کۊمەکیی پەی دەگاکۍ تەرخانکەرا.
- قەڎەخەکەرڎەی ئامای پەی ھەر گەشتیارېۋی، کە چە ڕانمایی و یاسا گەشتیارییەکا سەرپېچۍ کەرۊ و سزادایش ھەر کات کە ئاژاۋۍ و ۋېرانی چە دەگاکېنە درۊسکەرۊ.
- سەرمایەگۊزاریکەرڎەی چە بەشۊ گەشتوگوزاریینە بەس پەی خەڵکو دەگاکۍ بۊ و کەسانۍ بەرو دەگێ ئا مافەشا نەبۊ.
- ھەر پڕۆژېۋ یان ھەر چالاکیېۋ، کە پەی ژیۋارو دەگاکا زېیانبەخش بۊ، مشیۊ ڕاگیریی کریۊ و ئەنجامدەرېش سزا بڎریا.
- ڕاگیری چە ئاۋرڎەو ماددە زېیانبەخشەکا پېسەو گۊگرڎۍ و ھەر پاسە ڕاگیری چە قاچاخی و ئاۋرڎەی مادڎە بەنگکەرەکا، کە دۆڵەتو ئێرانی و دەسەڵاتدارۍ ھەرېمو کورڎستانی مەرامدارانە چە ناوچەو ھۆرامانینە چ ئۆ ڎیم و چ ئی ڎیم چەمپۊشیشا چنە کەرا.
- ئی خاڵۍ و ھەر خاڵېۋە تەرە، کە قازانجو خەڵکو دەگاکا و ھەر پاسە ئەر چنی ژیۋارپارېزی و ئاساییشو خەڵکو دەگاکا و بەرژەوەڼی گرڎینەو دەگاکاش چنە بۊ و مسۆگەر کەرۊ.
- ..... تد.
------------------------------------------
وەنەرۍ بەڕێزی، پەی ئەژناسای پیتە تایبەتە ھۆرامییەکا دلۍ ئی نۋیستەیە، سەرو لینکو پیتەکا کلیک کەردۍ:
- ڎ: ئەڎا: دەنگ https://t.me/Ferhengu.Zvani.Horami/6322
- ۋ: ۋاران: دەنگ https://t.me/Ferhengu.Zvani.Horami/6328
- ڼ: مەڼ: دەنگ https://t.me/Ferhengu.Zvani.Horami/6324
- ۊ: لۊ: دەنگ https://t.me/Ferhengu.Zvani.Horami/6326
- ې ۍ: دەنگ https://t.me/Ferhengu.Zvani.Horami/6330
- ﯗ = و: مۇ
لینکو گرڎو پیتەکا ئەلفابێتی ھۆرامی
https://t.me/Ferhengu.Zvani.Horami/7588
[1]