#ئەلفابێتی ھۆرامی و چڼ سەرنجېۋ#
نۋیستەی : ئاکۊ مارانی
ۋەڵاکریای دوەم : جولای 2021
بەشۍ ششەمە:
نۋیستەی بە (ئەلفابێتی سۆرانی)
بە پەیلۋاو من، کاتېۋ کە (ھۆرامی) زۋان بۊ، ئیتر بېیەی ئەلفابێتی تایبەتی و کیبۆردۍ تایبەتۍ پەی نۋیستەی بە ھۆرامی پەنەۋازیېۋی نکۊڵی ھۊرنەگیرا و گرنگیدای بە پەیلۋاو کەسانېۋی، کە بەبۍ ۋەرەچەمگېرتەی تایبەتمەڼیی زۋانەکا و دیالێکتەکا، سەرو پەنەۋاز نەبېیەی پیتا پەی دەنگە جېیاۋازەکا و گرنگ نەبېیەی کیبۆردۍ تایبەتۍ پافشاری کەرا، چېگەنە کەمتەر شاییستەو ئاماژەدای ھەنۍ.
ۋەرو ئانەی، چېگەنە من بەس چە بارەو ئا پەیلۋا و کۊششا ھۊرسەنگنای کەرۇ، کە پەی ھېماسازیی دەنگەکا کۊششا کەرڎەن و نەبېیەی پیتە تایبەتا پەی ئا دەنگاشا بە مەترسېۋی گۆرە زانان. چۇنکە پەرسۊ بابەتەکۍ ئەلفابێتی ھۆرامی و کیبۆردۍ ھۆرامییەنە و بڕیارا چە بارەو ئەلفابێتو زۋانی ھۆرامی قسۍ کەرمۍ. ۋەرو ئانەی هومېڎواز ھەنا، ئەر کەسېۋە یان کەسېۋ چا بارۆ کۊشش کەرڎەبۊ و من ئاگاڎار نەبۇ، چە من نەڕەنجیۊ و پاسە نەزانۊ، کە من ئامانجدارانە نامۊ ئاڎۍ یان نامۊ ئاڎی پڕنێبۊ. نەخێر. ماۋەو دۋۍ ساڵا بۊ، من بە گرڎ جۊرېۋ پەی زانیاریی گلېرۆکەرڎەی داۋازی تایبەتم نۋیستەن و چە فرە کەسا وازیار بېیەنا، ئەر کەسېۋ مژناشا، کە چە بارەو ئەلفابێتو زۋانی هۆرامی نۋیستەیش بېیەبۊ، یان پەی ئەرەنېیای کیبۆردۍ تایبەتۍ پەی نۋیستەی ھۆرامی خەریک هەن، من ئاگاڎار کەرا و پېسەو یاردیېۋی زانیاریی وېشا چە بارەو ئا کۊششا پەی من کېیانا. بەڵام بەداخۆ، بەس ئی زانیاریی دەسو من کۆتېنۍ، کە چېگەنە بە ئاڎېشا ئاماژەمڎریۊ.
جارېۋتەر پەی ئا کەسا، کە هەڵای ماچا (ڎ) و(ۋ) ھەمان دەنگو (د) و (و)ین و پەنەۋاز هەن ھەر بە (د) و (و) بنۋیسیا، چۇنکە سۆرانی و کرمانجی (د) منۋیسا، ڕەنگا خاستەر ئانە بۊ، کە ئېمە بە ئاڎېشا ۋاچمۍ، دەی زۋانی فارسی کە سەڎان ساڵۍ ۋەڵۍ نۋیستەی سۆرانی و کرمانجی کۆتەن و بەکاربریان، جېیاتی (ئاو|ئاڤ، کەو، بەفر، گوڵ ، ..تد)ی زۋانی سۆرانی و زۋانی کرمانجی، ( ئاب، کەب، بەرف، گول، ..تد) منۋیسا؛ ئایا کریۊ ۋاچیۊ: مشیۊ سۆرانی-زۋانۍ و کرمانجی-زۋانەکۍ جېیاتی (و|ڤ) و (ڵ)، پیتۊ (ب) و (ل) بنۋیسا، ۋەرو ئانەی کە فارسی-زۋانەکۍ (ب) و (ل) منۋیسا و چە بنەڕەتەنە (و) و (ب) ھەر یەک دەنگەنۍ؟
بەدڵنېیاییۆ دەسۆ (بانېۋ و دۋۍ ھەۋێ) چە وەڵامەنە ماچا، فارسی زۋانېۋی جېیاۋازا و ھۆرامی ھام-دیالێکتو سۆرانی و کرمانجین. خاسا، دەی خۊ فارسی زۋانەکېچ ھەر پاسە ماچا و پاسە پاگەندەکەرا: زۋانی کورڎیی و دیالێکتە کورڎییەکۍ چە بنەڕەتەنە چە زۋانی فارسی جېیێ بېیېنێ!.
ۋەرو چېشی مشیۊ پەیلۋاو ناسیونالیستە فارسی-زۋانەکا نادرۊس و پەیلۋاو ناسیونالیستە سۆرانی-زمانەکا درۊس بۊ؟
---------------------------------------------------------------------------------
* دەنگە تاییبەتەکۍ زۋانی هۆرامی، پیتە و نمۇنەی دەنگیی و نۋیستەیی:
- ڎ : ئەڎا : دەنگ https://t.me/Ferhengu.Zvani.Horami/6322
- ۋ : ۋاران : دەنگ https://t.me/Ferhengu.Zvani.Horami/6328
- ڼ : مەڼ : دەنگ https://t.me/Ferhengu.Zvani.Horami/6324
- ۊ : لۊ : دەنگ https://t.me/Ferhengu.Zvani.Horami/6326
- ې ۍ : دەنگ https://t.me/Ferhengu.Zvani.Horami/6330
- ﯗ = و : (مﯘ)
لینکو گرڎو پیتەکا ئەلفابێتو زۋانی ھۆرامی
https://t.me/Ferhengu.Zvani.Horami/7588
** پەی ئەۋەوەنەی پەراۋېزەکا، ئەرک نەبۊ، سەرو لینکو پەڕچنەکەی کلیک کەرڎۍ
[1]