《خێیاوان یانێ دەرک حزور، یانێ ڕۊەڕۊیی جەستەیی وەگەرد ڕووداو؛ یانێ بووکیشاین، عەرەق کردن، لەوەر دەڵک کەفتن، شنەفتن دەنگ بەرز ئنسان لەناو مەیدان، هەیەجان گرتن لە جموجۊل جەستەیی. ئینستاگرام یانێ حوزور جەستەی بێ ئەندام لە مەیدانێ لە غیاب حوزور جەستەی ئامادەی جۊلە. حوزور جەستەیی یانێ، گرژبۊنِ ڕۊەڕۊانە و پەنجە مشت کردن و دەس وەشانن و خۊن دان!》
ئجازە بێیەن، وەگەرد ئی ڕەفاتە (گزارە) دەس وەپێ بکەم ک بێجگە بڕێگ حاڵەت، مەرگ مەیدان (ساحت) تاکیێگ نەیرێ، بەڵکێ مەرگیش لێوای وەدی هاتن، هەمیشە هەڵگر مەیدانێگ گشتی و کۆمەڵییە. یانێ هەم لە کات وەدی هاتن و هەم لە کات مردن کەسانێگ هەن ک حوزور دێرن و بینەر ڕووداو وەدی هاتن و مەرگ ئیمەن؛ پەس لەواقع ئیمە لەی دوو ئانە هەمیشە کەسێگ نووڕێدنە پێمانەو ئیمە ئۆبژەیگ لە جهان دەرک ئەوانیمن. ئەوە ک ئی دوو واقعە لەیەک جیا کێد، ئیەسە ک، ئیمە هۊلایگ (اختیار) لە وەدی هاتن خوەمان نەیریم، ئەمانێ زانیمن ک مەسەلەیگ جوور مەرگ ها نوامان و بەرنامە ژیانمان وەی حەقیقەتە بەیمنەو نوا ک ساڕووکانیی ترسناکێگ لێوای مەرگ ها پێشمان. لێرە وەپێچەوانەی هایدگر ک مەرگ وە مانای نەبۊن زانێ، هەوەجەس تا ئەڵگەردمە شۆپنهاور ک ژیان وە موبارزەیگ دۊنێ ک هەر دەم دەڵەک مەرگ وەرەو دوما نێد، وەلێ لەپەرتخ ئیە مەرگە ک سەرکەفێد. وەی ڕۊە، مەرگ ئەو نوختەسە ک گشتمان زانیم ک دەرچوونێ لەلێ نەیریم. ئا لێرەسە ک گرنگی مەرگ ودەر کەفێد ک جیاوازی وەدی هاتن و مەرگ چەس. ئیمە ئەگەر وەداڵگ نەویمن چشت فرەیگ ڕۊ نەداس ک جهان دەرگیر خوەی بکێد، بەڵکە ئیە مەرگە ک جهان ڕۊەڕۊ ئەمر گشتیی-ێگەو کێد تا گرنگیی ژیان دەرک بکریێد، ڕێک جوور مەرگ ژینا.
مەرگ ژینا، جیا لە ساحەتە گشتی و کۆمەڵیەگەی ک تراژدیێگ ئەڕا نەمان یەی ئنسانە، پا ناسە ناو ئەمر تراژیکێگ لێوای [مەرگ ئەویتر خواز]؛ مەرگێگ ک هەبۊن تۆ ئەڕای ئەویتر گرنگ نییە، یا لە دەسبڕەس سەرنج ئەو، ئەودەر چییە و مان و نەمان تۆ سوودێ وەپێ نیەڕەسنێ. لێرەسە ک مەرگ دەس وەدەس یەک دێد تا ئیمە هەست وە ڕاسکانی بۊن و خوازتنی بۊن ژیان بکەیم و [کوردستان]یش لەناو ئی کارساتە [مەرگ]ە ئەڕا ژیان سەر هێز بێیەید.
وەپێچەوانەی مەرگەیل ترەک، ئی مەرگە، هەڵسانێگە ئەڕا ژیان؛ ژیان نە وەمانای هەناس کیشان و خواردن و خەفتن، بەڵکە ژیان وەی مانا ک ئمڕوو لە شوعارەیل مەردم سەقز ڕەنگ خوەی دا ک:

$(مەرگ بر دیکتاتۆر)!$
سە ئی مەرگە، مەرگ کوشتن مەرگەیل ترەک و ئەسر تمساحەیلێگ بۊ ک ئیمە لەناو ئینستاگرام ئەڕا مردن کووڵبەر و فڵان و فیسار ڕشانیایمن و ڕۆمانسیەتێگ لە مەرگ ئەڕا کۆژانەوەی ئاگر قلیانەیل ڕووحیمان نیشان دیایمن.
ئمڕوو لە سەقز بۊمن و وەچاو خوەمان مەردمێگ دیمن ک دی ماڵاویی لە جەستەی بێ ئەندامێگ کردن ک لەناو ئینستاگرام خوەی دارەلۊس ڕەفتارەیل تیۆریک و شیکارییەیل دژ ڕژیم کردۊ.
ژیژەک گوفتەنی، بەشر سەردەم تووڕەیل کۆمەڵایەتی سەوار هەوای دنیای مەجازییە و لە خود بێخودە و هەنای تیێدە خوەی ک دۊنێد لە شوونەگەی خوەیە و جم نەخواردێیە.
مەسەلەی ئیمە فەلسەفەی کردەیی و (پراگما)س. مەسەلە حوزورە نە قسەیل ڕەنگین ئینستاگرامی. سەقز ئمڕوو نیشان دا ک گوزەر کردێیە لە ئێحساسگەرایی و دی ئی ئیدە ڕەد کرد ک [کارکرد ئەندێشە] دەنگەودان واقعیەتە و ئی وتەزای بێ مانای دریداییە ک هەرچێ کە هەس دەقە، نادە لا و خوەی تەنیا سەرگەرم ئینستاگرام نەکرد. ئی پراگمای سەقزە بایە بوودە ڕووشنکەر حاڵ ئێسکەی کوردستان و لە ئینستاگرام-دەق خوەی دۊر بخێد.[1]