مەششاتەیێ حوسنا ئەزەل، چەنگالێ زولفان تاب دا
دا عشق هل بت پێل پێل، قەلبێ مە لێ جەللاب دا
حوسنا حەبیب و لوتفێ یار، ئاڤێتە دل عشقا غەدار
لەو سەلب کر ژێ ئختیار، وێ حوسنێ ئەڤ ئیجاب دا
من دی سەحەر زولفێن د مەست، هاتن سەما ئحرام بەست
چوون سەجدەیا خالێ ب قەست، لەو حاجبان محراب دا
ڕووح و ڕەوانێ من حەبیب، دیسا ب تەلبیسا ڕەقیب
رەنجیدە کر مسکین غەریب، تەرکا دلێ ئەحباب دا
مەحبووب ب جاما پوڕ گولاڤ، کەر کر ل من جەرگ و هناڤ
زەهرا هەلاهل بوو د ناڤ، لەو ساقی ئەو جوللاب دا
وان دەست و زەند و ساعدان، مەی دانە شەیخ و زاهدان
مەستی بە چەشمێ شاهدان، ئەو نێرگزا سیراب دا
مسکێ ڕەشاندی ئەز دبێم، وان نوقتەیان هن بوونە کێم
لێ خەتتێ ڕەیحانی ل دێم، کاتب ژ نوو ئعراب دا
نازک قەدا نوورین بەشەر، ئەو بوو ل من نەقشێ بەسەر
دینا خیالێ هەر سەحەر، ناڤ دیدەیێ بێ خواب دا
ئەو تللیێن نازک ڕەقیق، پوڕ دا مە فنجانا عەقیق
ئەو بادەیا نوورین ڕەحیق، مننەت ب من وەههاب دا
دا خەف نەبت بەژنا فەڕێ، مەی هاتە شەهکاسا سوڕێ
مننەت کو ئیرۆ دێم دوڕێ، دیسا شەرابا ناب دا
مەی هاتە فنجانا سەدەف، کەس دێ ڤەخوت ئیرۆ ب خەف
ساقی ب چەنگ و نای و دەف، فەرفوورییا مەهتاب دا
عیدە و حەبیبێ نەزرە لێ، یان دێ ب قوربان بی مەلێ
یا ڕەب ببینم ڕۆژ هلێ، سککین د دەست قەسساب دا
#مەلای جزیری# [1]