جان دۆست، نڤیسەر و ھەلبەستەڤان و ڕۆماننڤیسێ کورد ل سالا 1965ێ ل باژێرێ کوبانێ ژ دایکبوویە. زانینگەھا حەلەبێ پشکا بایۆلۆژی ب دوماھی ئینایە، ژ سالا 2000 ێ و ھەتا نوکە ل ئەلمانیا دژیت. دیوانا وی یا ئێکێ ب ناڤێ (قەلای دمدم) ل ئەلمانیا و پاشان د ھەمان سال دا ل ئستەنبولێ بەلاڤبوویە، ھەتا نوکە 7 ڕۆمان نڤیسینە ئەو ژی (مژاباد، سێ ھەڤناڤ و سێدارەک، میرنامە، مارتینی بەختەوەر، عیشق المترجم، دم علی المئژنە، نواقیس ڕوما) و چەندین پرتووکێن دی وەرگێراینە ل سەر زمانێن کوردی و عەرەبی.
ل دەستپێکێ ل دۆر ژیانا خوە یا ژیانا ئەدەبێ و کا چاوا پێڤە ھاتیە گرێدان، جان دۆست گۆت: بابێ من مەلا بوو، ب سەدان پرتووک ل مالا مە ھەبوون، گاڤا من چاڤێن خوە ل دنیایێ ڤەکرین، من پرتووک دیتن، ھەردو برایێن من یێن ژ من مەزنتر ھەلبەستڤان بوون. ئەوان حەزکرنا ئەدەبی ل دەڤ من چێکرن. وەکی دی ئەز باوەر دکەم کو توخمێ ئەدەبێ ل دەڤ من ھەبوو. کارەکتەرێن من ژ زارۆیا من وەسا بوون.
ئەگەرێن ژ شعرێ بەر ب ڕۆمانێ ڤەچوویی، ڕۆماننڤیس دبێژت: شعر ھەسانە، دەما مرۆڤ گەنج بە، عاشق دبە، دلێ وێ تەنک دبە، زیز دبە و شعرێ دنڤیسە. ئەز ژی مینا ھەر کەسی ژ ئەڤینێ دەرباسی جیھانا شعرێ بووم.
جان دۆست ژ بۆ کو کا ئەو پتر حەز ژ کیژ ڕۆمانڤیسی کورد دکەت و بۆچی؟ گۆت: ئەز حەز ژ شێرزاد حەسەنی دکەم. ئەو مرۆڤەکی پڕ پاقژە. ھەروەسا دۆستەکی من یێ ڕۆماننڤیس ھەیە ناڤێ وی (حەسەنێ مەتێ)یە، ژ وی و ھونەرێ وی گەلەکی حەز دکەم.
ل دۆر پەیوەندیا دەستھەلاتدارێن کوردان چاوا ل گەل ڕەوشەنبیران د چ ئاست دان، ڕۆماننڤیسی گۆت: گەلەک د باش نینن، دڤێت پتر گوھداریا ڕەوشەنبیران بکەن، ڕەوشەنبیر سمبۆل و ھێمایێن نەتەوێن خوەنە.
جان دۆست ژ بۆ ستاندەرکرنا زمانێ کوردی و چ پێدڤیە بھێتە کرن گۆت: ھەکە ستانداردکرن ئارمانجەک مللی بە، دڤێت ب ھێز و زۆرێ بھێتە مەیدانێ. گەر (نا)، ب بۆچوونا من زمانێ کوردی دێ بەر ب دو یان سێ زمانان ڤە چیت.
ژ بۆ وێ یەکێ کو دبێژن جان دۆست سەر ب حزبەکێ ڤەیە، گۆت: ئەز نە ئەندامێ چو حزبەکا کوردیمە، ئەز ئەندامێ حزبا قەلەم و وێژەیێ مە، موریدێ ئەحمەدێ خانی مە، نە دۆست و نە دوژمنێ چو پارتیانم. لێ ھەکە پارتیەک کوردان خوینا کوردان برژینە ب توندی ل ھەمبەر ڕادوەستم.
جان دۆست وەکو ئێک ژ خەلکێ کۆبانێ، چاوا ڤی باژێری د ناڤ نڤیسینێن خوەدا سالۆخەت دکەت؟ ڕۆماننڤیس دبێژت: ژ بۆ کۆبانی من ڕۆمانەک نڤیسی، ھەم بەحسێ بەرخوەدانا وێ دکەم، ھەم ژی بەحسێ پەریشانیا خەلکێ وێ دکەم، ڕۆمان ڤان ڕۆژان ژ وەشانخانەیا دارایێ دەردچە.
ل دۆر کارەساتا شنگالێ جان دۆست دبێژت: مخابن من بەرھەمەک تایبەت بۆ نەنیڤیسیە. لێ دبیت کو ڕۆژەکێ ژ ڕۆژان پەرێشانیا مللەتێ مە یێ ئێزدی ببە مژارا بەرھەمەکی من.[1]