(م، ن) کچەکا 17 سالیە پشتی ھانەسەیەکا کوور ھەلکێشای گۆت: دەمێ ڕۆژ بەر ئاڤابوونێ دچوو لەرزینێ ھەموو لەشێ من دگرت ژ ترسا ئەز ھشک دبووم ، خوارن و ڤەخۆارن و ھەموو تشت ژ ترسا دا و ژبەر بێ بەخت و بێ وژدانا ژبیرا مە دچوون پورا تیرۆرستان یا گژاڤژ ڕووح ژ جانێ مە دئێنا دەر، چونکی مە نەدزانی دێ #داعش# چل مە کەن.
(م. ن) کچەکا د ژیێ 17 سالیێ دایە ل تلقەسەب ل ڕۆژا #03-08-2014# دھێتە ڕەڤاندن بۆ ئەڤرۆ دیارکر ھەموو ھیڤی و ئومێدێن مە ئەو بوون کراسێ سپی بکەینە بەر خوە و گۆت: لێ مخابن گورگا بێ بەخت و بێ وژدانا دلێن ھزارەھا کچان شەوتاندن و گەلەک کچێن خورت ل شەڤێن تاری دناڤ دەستێن داعشێن گورگ دا ژیانا خوە ب دووماھی ئێنا.
ئەڤ کچا 17 سالی گۆتژی: دیمەنێن وان ڕۆژێن ڕەش کارەساتا #شنگال#ێ ھەموو وەکو زنجیرەیا فلمەکی ل بەر چاڤێن من دبۆرن، ل دەستپێکی دەمێ ئەم کەڤتینە دەستێ داعشا دا ل تلقەسەب ئێکسەر ھەر تشتەکێ پەیوەندی ب ئێزدی و ئاینێ ئێزدیاتیێ ڤە ھەی تیرۆرستان ژ مە وەرگرتن ژن و کچ و زارۆ و زەلام ھەموو ژێک جودا کرن ئەم گەلەک کچ ئێکسەر بەرب مووسل ڤەگوھاستین و بۆ ماوێ 15 ڕۆژان ل مووسل ھێلام و پاشی بەرب باژێری ڕەقە ل وەلاتێ سوریا ب ترۆمبیلان ل درەنگی شەڤ برینە ڕەقە بۆ ماوێ دو ھەیڤان ل باژێرێ ڕەقە ھێلام.
ھەروەسا ڤێ کچێ ب چاڤێن تژی ڕوندک و دلەکێ شکەستی گۆت: ل باژێری ڕەقە تیرۆرستان دەست ب کرین و فروتنا کچێن ئێزدی کر دناڤ ئاڤاھیەکێ دا ، ئەمیرەکێ تیرۆرستان ئەز ژێ گرتم و بخوە ھێلام ئەز گریام من گەلەک ھیڤی ژ وی ئەمیری کرن دەستدرێژی ل سەر من نەکەت، لێ بێ مفا بوو ئەز ئەشکەنجە دام من چ دەستھەلات نەبوو بەرەڤانیێ ژ خوە بکەم و کەس نەبوو ھەوارا خوە بگەھینمێ، تیرۆرستان ھەموو تشت ب زورداری ب کچێن ئێزدی دانە کرن و شێخ و ئەمیرَین داعش گەلەک کچ ئەشکەنجەدان دەمێ کچێ خوە دەستڤە بەر نەدابا.
ڤێ کچێ دا زانین ژی کو، ئەمیرێ داعش نەھێلا ئەم ژ خانی دەرکەڤین بۆ ماوێ دو ھەیڤان شەرێ دەروونی ل گەل ڕەڤاندیان دکر و گۆت: شەڤەکێ من بۆ وی ئەمیری باوەری چێکر کو ئێدی ئەز دێ ل گەل بم وی ناھێلم ھەتا من ڕازی کری ڕێ ب من بدەت دەرکەڤم دا بخوە ل ڕێکەکێ بگەرم، ڕۆژەکێ ئەز شیام تێلەفونێ ب دەستخوڤە بینم و ناڤ و نێشانا بدەمە مال و ب ڕیێا نڤیسینگەھا ئێزدیان یا کاروبارێن ڕەڤاندیان ئەز ھاتمە ڕزگارکرن ژ ڕەقە چوومە تورکیا و پاشی گەھشتمە دھۆکێ نوکە ل کەمپا قادیا باژێری زاخو ئاکنجینە.
م، ن ئەو چەندە ژی گۆت: ب چاڤێن خوە مە دیت ل مووسل تیرۆرستان زارۆ ژبەر سینگێ دایکێ ڤەدکرن بێ دایک دھێلان، ئەڤە نێزیکی سالەکێ یە ئەز ژ دەستێن داعش ڕزگاربوویم ھەتا نوکە ب شەڤی ئەز دترسم ترسەکا گەلەک مەزن یا د دلێ مە دا چێبووی یێ ب چاڤێن خوە نە دیتبت نزانیت کا چ ب سەرێ کچێن ئێزدی ھاتیە دناڤ دەستێ ڕێکخراوا تێرۆرستێ داعش، من بچاڤیێن خوە دیت ژن و زەلام ژێکڤە کرن ل پێش چاڤێن زەلامێ تەحرووشی ژنێ بوون، زەلام ئەشکەنجەدان و گۆتنی موسلمان ببە و ژن برن من دیت ھندەک زەلام کوشتن چونکی ئاینێ خوە نە گۆھوری و تیرۆرستان ژن ل گەل خوە برن بتنی گونەھا ئێزدیان ئەو بوو چونکی کورد بوون و ئێزدی بوون.[1]