هونەری ڕەنگڕێژی یان ڕەنگکردنی سروشتی مافوور و قاڵی و دەستچنی کوردی؛ هونەرێکی هەزاران ساڵەی کوردستانە، کە سەدان ساڵە دەستچنە کوردییەکانی پێ دەڕازێنرێتەوە، بەڵام چەندساڵێکە ڕەنگی کیمیایی بازاڕەکانی جیهان و کوردستانی قۆرخ کردووە و هونەری ڕەنگڕێژی بەرەو فەرامۆشی دەچێ. ئەگەرچی لە دوو شاری #سنە# و #بیجاڕ# لە ڕۆژهەڵاتی کوردستان هێشتا ژمارەیەک کارگەی ڕەنگڕێژی بە شێوازی کۆن کار دەکەن.
پدرام ئیلان پوور، لە شاری سنە، یەکێک لەو کەسانەیە لە باوکییەوە فێری ڕەنگڕێژی بووە و لەبارەی ڕەنگڕێژەکانی شاری سنە بە (باسکورد) دەڵێت: پێشتر لەم شارەدا 17 کارگەی ڕەنگڕێژی بەردەوام کاریان دەکرد و باشترین فەرش و بەڕی کوردی ڕەوانەی بازاڕەکانی ئێران و جیهان دەکرا، کە بە ناوی دەستچنی کوردی و فەرشی سنە دەناسرا، بەڵام ئێستا تەنیا دوو کارگە ماون. ئەم ڕەنگڕێژە ئاشکراشی دەکات: لە شاری سنە و گوندەکانی دەوروبەری هەزاران ژن و پیاو خەریکی فەرشچنی و چنینی مافوورن و پێویستیان بە ڕەنگی سروشت هەیە، بەڵام بەهۆی گرانی و قۆرخبوونی بازاڕ بە ڕەنگی کیمیایی، تا دێ کارگەکانی ڕەنگڕێژی دادەخرێن و خواست لەسەری کەمتر دەبێتەوە.
لە شاری بیجاڕی سەر بە پارێزگای سنە، کارگەیەک هەیە، کە زیاترین بەن و داوی ئەو شارە بە ڕەنگی سروشت ڕەنگ دەکات و پێیوایە؛ مافووری کوردی دەبێ ڕەنگی خۆی لە سروشتەوە وەربگرێ. خاوەن ئەم کارگەیە لەمبارەیەوە بە (باسکورد) دەڵێت: ناوم مورتەزا نورییە و کوڕی حاجی جەوادی ڕەنگڕێژم. سێ مامۆ و برایەکیشم هەر ڕەنگڕێژ بوون و ڕەنگڕێژی پیشەی باوانمانە. لای باوک و مامۆ گەورەکەم، فێری ڕەنگڕێژی سروشت بووم. لەبارەی ئەو مادە سروشتانەی لەناو کارگەکەی بەکاری دەهێنێ، دەڵێت: من لە گەڵامێو، توێکڵە گوێز و ڕوناس و چەندین ڕووەک و گیای شاخەکانی کوردستان ڕەنگ دروست دەکەم و کڕیارە ئەورووپی و ئەمریکییەکان خواستیان لەسەر ئەو فەرش و مافوورانەیە، کە بەشێوازی سروشت ڕەنگ کراون. ئاشکراشی دەکات: ڕەنگی کیمیایی سەرەتا زۆر جوانە، مەخابن پاش ماوەیەک جوانییەکی لەدەست دەدا، بەڵام لە ڕەنگی سروشتدا هەرچەندەی زەمەن بگوزەرێ، ڕەنگەکە جوانیی زیاتری دەردەخات و دەستچنە کوردییەکان هەرچەندەی کۆنەتر بن، ڕەنگیان جوانتر دەبێ و ئەمە جیاوازیی سەرەکیی ڕەنگی سروشت و کیمیاییە. ئەم پیاوە لەبارەی ڕەنگڕێژی و مافووری کوردی لە شاری بیجاڕ، دەڵێت: 35 ساڵە کارم ڕەنگکردنی بەن و خورییە، ڕەنگ و شێوە و نەخشی قاڵی بەشێکە لە ژیانم. لە شاری بیجاڕ، منداڵەکانمان لەسەر فەرشی کوردی لەدایک دەبن و لە چوار پێنج ساڵانەوە دەچنە بەر تەون و تا ئەورۆژەی دەمرن تەقەی کەڵکیتی دەستیان دێ و نەخشی ماسیی درهەم و لەچک تورەنج و دارگوڵ لەسەر دارە تەونەکان دەنەخشێنن.
فەرشی بیجاڕ لە جیهان بە فەرشی ئایرۆن کارپیت، واتا فەرشی ئاسنین ناسراوە و باشترین و کۆنترین فەرشەکانی بیجاڕ ئێستا لەناو مۆزەخانەکانی ئەمریکا و ئاڵمان و بەریتانیا بەناو فەرشی کوردییەوە پارێزراون.
ئامادەکردنی: #سارا سەردار#
[1]