کورتە چیرۆک
ئەڤرۆ .. دێ ئێک هێتە قوتان.
د. ئەمجەد عوبەید
سمبێل و رهێن وی، بندفن و ئەرزنکا وی رەشکرن. ئێدی جار جار دایبابێن وی ل سەر تێشت و فراڤینا بەحسا ژنئینانێ بۆ دکر، لێ هێشتا ئه و ژ فوبیا شەرکرنێ ئەوا ژ بچویکاتی دلێ وی داگیرکری قورتال نەبویە.
دلێ وی وەکی لەڤەنێ د ئاڤێ دا دلەرزی، دەمێ ددیت کو دو زارویێن ب شەر چووین.. پا هەما تا مرنێ دهاتێ، دەما ددیت زەلام یێ ل سەرا سا یان نوباڤێ ب شەر دچن و دربێن مرنێ و ب کێتا ل سەر و تەنشتێن ئێک ددەن.
وێ شەڤێ تا سپێدی چاڤێن وی مێڤانداریا خەوێ نەکر، ژبەر هزر و تەخمینا، ڤەرێژا وان ژی بریارەک بوو، کو بچیت مێرانیا خوە ل خوەلیعەیشترین کەسێ گوندی ب جەربینیت.
وێ ئێڤارێ، تاڤێ هێدی هێدی گولیێن خوە ژناڤا گوندی ڤەدکێشان.. دەمێ چوویە پەرێ گوندی ل بەراهیکا گارانێ داکو دەحۆیێ گاڤان ب قوتیت.
دەحۆ زەلامەکێ هەژار و ژئالیێ جەستەی ڤە هندی چرکونەکی بوو.
ژ دویرڤە گازی کرێ و چ ئاخفتنەکا نەخوەشە گوتێ، هەتا نیزیک بووی، ئێدی قەسێن پیس و ب ژن و ماک ژی گوتنێ و دەست حەفکا وی دانا.
دەحۆ ب چ رەنگا نەشیا خوە ژ بەلا سمۆی قورتال کەت..
گوپالێ خوە دو تا کر و داوەشاندە ناڤ چاڤێن وی، ڤزکا خوینێ ژ ئەنیا وی دو گەزا بلند بوو.
سمو پشتی دەمەکێ هشیار بوو، دیت کو دەحۆیێ ل هنداڤێ گەلەخێ وی و کولم ل دویڤ کولمێ ل دەڤ و لێڤێن وی ددەت![1]
کوردیپێدیا بەرپرس نییە لە ناوەڕۆکی ئەم تۆمارە و خاوەنەکەی لێی بەرپرسیارە. کوردیپێدیا بە مەبەستی ئەرشیڤکردن تۆماری کردووە.
ئەم بابەتە بەزمانی (کرمانجی) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
ئەڤ بابەت ب زمانا (کرمانجی) هاتیە نڤیساندن، کلیک ل ئایکۆنا
بکە ژ بو ڤەکرنا ڤی بابەتی ب ڤی زمانا کو پی هاتیە نڤیساندن!
ئەم بابەتە 1,072 جار بینراوە
ڕای خۆت دەربارەی ئەم بابەتە بنووسە!