70٪ی بەڵێنەکانی ئیبراهیم ڕەئیسی پێچەوانە بوونەتەوە
جەلال مەحمودزادە، نوێنەری #مهاباد# لە مەجلیسی شوڕای ئیسلامیی ئێران، دووپاتی کردووەتەوە کە نزیکەی 70٪ی دروشم و بەڵێنەکانی ئیبراهیم ڕەئیسی سەرۆک کۆماری ئێران، جێبەجێنەکراون و تەنانەت پێچەوانەش بوونەتەوە.
نوێنەری مهاباد لە مەجلیسی شوڕای ئیسلامیی ئێران بە ئاژانسی هەواڵی ئیلنای ئەو وڵاتەی ڕاگەیاندووە، ئیبراهیم ڕەئیسی سەرۆک کۆماری ئێران لە کاتی بانگەشەی هەڵبژاردن و ناساندنی کابینەکەی، کۆمەڵێک بەڵێن و دروشمی دا، بەڵام 70٪یان جێبەجێنەکراون و تەنانەت پێچەوانەش بوونەتەوە.
جەلال مەحمودزادە، لەبارەی ئابووریی ئێران و هەڵاوسان لە وڵاتەدا، ڕایگەیاند: بڕیاربوو نرخەکان لە نرخەکانی ساڵی ڕابردوو زیاتر بەرز نەبێتەوە، بڕیاربوو نرخی دەرمان زیاتر نەبێت، ڕێژەی هەڵاوسان کەم ببێتەوە و ساڵانە ملیۆنێک هەلی کار ڕابگەیەندرێت و ملیۆنێک یەکەی نیشتەجێبوون دروست بکرێت، بەڵام ئەمانە هیچیان جێبەجێنەکران.
مەحمودزادە، لەبارەی پەیوەندی نێوان مەجلیسی شوڕای ئیسلامی و حکومەت، ئاماژەی بە پەیامی پشت ئەو کارتە زەردانەدا کە بە حکومەت دراوە.
ئەو گوتی: ئەو کارتە زەردانەی لەلایەن مەجلیسەوە بە وەزیرەکان دەدرێت، پەیامی خۆیان هەیە و دووپات لەوە دەکاتەوە کە حکومەت، بەرنامەکانی مەجلیسی جێبەجێ نەکردووە و پەیوەندی نێوان ئەو دوو دامەرزاوەیە ڕۆژبەرۆژ لاوازتر دەبێت.[1]