چەند ڕۆژێک لە #سلێمانی# بۆ کوشتنی ملازم موحسین، خۆمان حەشار دابوو
کەم کەس هەیە ناوی مولازم موحسینی نەبیستبێت کە لەلایەن ڕژێمی بەعسەوە نێردرابووە کوردستان، زۆر دڕندانە زوڵمی بەرامبەر بە خەڵکی شاری سلێمانی دەکرد، مولازم موحسین بەو شێوەیە ناوی پەیدا کردبوو. بە ڕەگەز عەرەب و خەڵکی فەڵەستین بوو، دەمەوێت لێرەدا بچمە ناوەرۆکی باسەکەوە و پرسیار دروست بکەم: ئاخۆ مولازم موحسین دوای ئەو هەموو تاوانەی کە لە کوردستان ئەنجامی دا؛ لەلایەن تێکۆشەران بە سزای گەل و شۆڕش گەیەنرا، یاخود هەر لە ژیاندا ماوە و یان وەک چۆن هەر کەسێک لە دایک دەبێت و دواجار دەمرێت؟
بۆ ئەو مەبەستەش لە ساڵی 2016دا لە چەند گرتە ڤیدۆیەکدا و لە چەندین ماڵپەڕ و تۆڕە کۆمەڵایەتییەکان هەواڵی کوشتنی مولازم موحسین لەلایەن تیکۆشەرانی بزووتنەوەی ڕزگاریخوازی کوردستان بڵاو کرایەوە، بەبێ هیچ دەستکاریکردنێک دەقی هەواڵەکە لێرەدا دەخەمە بەر دیدی خوێنەر و دواتر سەرنج و تێبینی و چەواشەکاری و گەمەی سیاسی و بەهەڵە نووسینەوەی مێژووی لەسەر دەدەم. کۆسرەت ڕەسوول عەلی؛ جێگری یەکەمی سکرتێری یەکێتی نیشتمانیی کوردستان، لەدوای ڕاپەڕین و وەرگرتنی سەرۆکایەتیی دووەم کابینەی هەرێمی کوردستان لەپاڵ دەرهێنانی نەوت لە شیواشۆک، بیر لە تۆڵەکردنەوە لە مولازم موحسین دەکاتەوە. کۆسرەت ڕەسووڵ تیمێکی تایبەت لە کەسانی دڵسۆز و متمانەپێکراوی خۆی بۆ دۆزینەوە و بەسزاگەیاندنی مولازم موحسین دروست دەکات. تیمەکە جگە لە چەند کوردێک، کۆمەڵێک عەرەبیش لەخۆ دەگرێت. ئەم تیمە کە پەیامی مەرگ و دەستگیرکردنی مولازم موحسینیان پێیە، دەست بە شوێنکەوتنی ئەو جەللادەی بەعس دەکەن و دەگەنە کۆمەڵێک زانیاریی باوەڕپێکراو، لەوانە مولازم موحسین دوای ئەوەی لە سلێمانی گوێزرایەوە، بە بڕیاری سەرکردایەتیی بەعس نێردرا بۆ #کەرکووک#، تاوەکوو پڕۆسەی ئازادی لە ساڵی 2003دا لە ئەمنی کەڕامە کاری دەکرد، پلەی تاکوو موقەدەم بەرز بوویەوە، دواتر بۆ بەغداد هەڵهاتووە، بەڵام لەناکاو لە بەغداد ون دەبێت و بەرەو سووریا دەڕوات، بەڵام لە ساڵی 2011 بە هۆی ڕاپەڕین و شۆڕشی خەڵکی دژی حکومەتی بەشار ئەسەد، مولازم موحسین لەم وڵاتە شوێنی لەق دەبێت و ڕوو لە ئیمارات دەکات، تا دوای 13 سیانزە ساڵ هیچ کەس سۆراخی مولازم موحسینی جەللادەکەی بەعس نازانێ. کۆسرەت ڕەسووڵ بۆ دۆزینەوەی شوێنی سەددام حسێن، لە ڕێگەی کۆمەڵێک سەرۆکهۆزی عەرەبی تکریت سەرکەوتوو دەبێت و بەپێی کۆمەڵێک بەڵگەنامەی تەلەڤزیۆنیی کۆسرەت ڕەسووڵ، ئەڵقەی یەکەمی دۆزینەوەی شوێنی سەددام حسێن و دەستگیرکردنی ناوبراو دەبێت لە حەشارگەیەک لە ناوچەیەکی دوورەدەست، لەناکاو زانیاریی باوەڕپێکراو دەگاتە تیمەکەی کۆسرەت ڕەسووڵ کە مولازم موحسین لە یەمەنە، بۆ ماوەیەکی زۆر چاودێری کراوە، ڕۆژی یەکشەممە، 23/10/2016 مولازم موحسین دەکوژن و بە سزای گەل و شۆڕشی دەگەیەنن.
بەڵام دارای حاجی برایمی چەرمەگا، کە لە سەردەمی ڕژێمی بەعسدا مستەشاری فەوجی سووک (فەوجی خەفیفە) و کە خۆشی باسی دەکات بە بنەماڵە پەیوەندییان لەگەڵ حیزبی بەعسدا هەبووە، ئەو هەواڵە ڕەت دەکاتەوە کە گوایە مولازم موحسین کوژرابێت و چۆنیەتیی کوشتنەکەی مولازم موحسین لەلایەن تیمەکەی کۆسرەت ڕەسووڵەوە بە هەواڵێکی ناڕاستی پێناسە دەکات. لە ڕێکەوتی 29/2/2020دا لە بەرنامەیەکی تەلەڤزیۆنیی کەناڵی ڕووداو کە سەر بە حیزبی پارتی دیموکراتی کوردسانە، دارای حاجی برایمی چەرمەگا دەڵێت: مولازم موحسین هاوڕێمە و پەیوەندی و دۆستایەتیمان لە ئێستەدا هەیە و دەشڵیت: هەواڵی دەزانم و نەشکوژراوە و لە ژیاندا ماوە. مولازم موحسین، خوێنڕێژ و بکوژی چەندین لە تێکۆشەرەکانی گەلەکەمانە. دارای حاجی برایمی چەرمەگا، زۆر بەڕوونی و بێ سڵەمینەوە لە کەناڵێکی کوردییەوە شانازی بە بوونی هاوڕێیەتی و دۆستایەتیی مولازم موحسینی خوێنمژ دەکات و دەمانخاتە نێو گومانێکی قووڵ و سەرنجڕاکێشەوە کە تێیدا پێویستی بە بەدواچوون و وردبینیی دروست و بڕیاری هەڵوێستێکی توندە بۆ هەمووان.
مولازم موحسین چەندین هاوڵاتیی حیزبی و ناحیزبیی لەسەر شەقامەکانی شار و لەنێو ماڵەکاندا بەبەر چاوی خانەوادە و هاوڕێیان و لە تەواوی کووچە و کۆڵانەکانی شار شەهید کردووە، بێڕێزی و سووکایەتیی بە چەندین ماڵە تێکۆشەری شاخ و شار کردووە، دەستدرێژیی کردۆتە سەر ژن و کچانی شارەکە، لە یادەکانی و لە کاتی خۆپیشاندانەکانی هەشتاکاندا بە هیچ شێوەیەک دەستی لە ژن و مناڵ و پیر و پیاو نەپاراستووە، بە هەزارەها شێوەی ناشایستە و نەگونجاو ئازاری زیندانییانی داوە، پرسیارەکە لێرەوە دەست پێ دەکات: باشە کەسێک بەو جۆرە هەڵسوکەوتی لەگەڵ هاوڵاتی و هاوشارییەکانتدا کردبێت، گریمان بە دۆخێکی نەخوازراو و زەمەنێکی تێپەڕیو لە سەرشۆڕی، لە ئێستەدا دارای حاجی برایمی چەرمەگا چۆن دەتوانی پەیوەندیی لەگەڵ مولازم موحسیندا هەبێت و بەبەردەوامی لە پەیوەندیکردن لەگەڵی و سڵ لەو هەموو خوێن و قوربانییانە نەکەیتەوە و دڵت بەو دایکە جەرگسووتاوانە نەسووتێ و شەرم نەتگرێ! بەڕاستی ئەم وتانە پەلکێشی هەندێک شتی کۆنکرێتیمان دەکات. گەر سەرنج بدەین، نەک دەستی، بگرە شتی تریشی کەوتۆتە نێوان و چنگیان لەیەک نابێتەوە، دیارە نایەوێت باس لەو بابەتە بکات و دەیباتەوە بۆ هێزی ناوچەگەری، بە جۆرێک خۆی دەردەخات کە لە بوێرییەوە بووبێت و بێمنەت لووت لە بابەتەکە دەژەنێ، دەنا دڕندەیەک چۆن و لەبەرچی دەبێتە هاوڕێی گیانیبەگیانی و ئەوەندە ساڵە بێدەنگیت لێی کردووە، بۆ ئەم کاتە بە سپۆنسەری هێزێکی دوورەدەست لە کورد بای باڵی خۆت دەدەی و ئاگر بەر دەدەیتە دڵی هەزاران ماڵە شەهید و قوربانی! بەئاشکراش پێمان دەڵێیت دەتوانم دەنگێکی زۆر لە ناوچەی بەعسنشینەکانی عێراقدا مسۆگەر بکەم، لە کاتێکدا ئەوەی تۆی خستۆتە باوەشی ئەم هەوڵە سەربەخۆییە وەک شەریکی سیاسی، بوونی خۆت و دۆخەکەی بۆ سەربەخۆبوونی کورد هان دەدا، کە لێرەدا دەبێتەوە بە پرسیارێکی گەورەتر لە بوونی بەدگومانی و بێئومێدیی خەڵک و ئامانجەکەی لە گرتنەدەستی دەسەڵاتدا.
بۆیە باشترە هاوکێشەی دوو فاقیی دوژمندۆستی و کوردبوون لە مۆراڵی سیاسیی حیزبێکی وەک بەعس پەروەردەدا بۆ کورد مەخوڵقێنە، شەرمێک لەو قوربانییانە بکەرەوە کە بە دەستی بەعسی فاشی ئەنفال کران تەنها بە هۆکاری کوردبوون، ڕەش و سپییان بەتێکەڵی زیندەبەچاڵ کرد، ئەو بەعسییە چەکبەدەستانە بوون کە سەرشۆڕ بکەی بۆیان و لە سایە و سێبەریاندا وەک سەرشۆڕێک بژی. میللەتی کورد لە مێژووی سیاسیی ناوچەکەدا خاوەنی قوربانییەکی زۆری بێوێنەی نەگوتراوە لە مێژووی مرۆڤایەتیدا و بەردەوام لە سەنگەری بەخشیندا، بەرامبەر جوانییەکانی مرۆڤبوون هەتا ئێستاش دەجەنگێ و قوربانی دەدات.
بۆ ئەو مەبەستەش دەمەوێت چیرۆکێکی مێژوویی بخەمە بەر چاوی خوێنەران، کە ئەمە یەکێکە لەو هەزاران چیرۆکەی بوونە بەرهەمی ئەوەی ئێستا چەکدارەکانی سەر بە ڕژێمی بەعسی لەناوچوو، بەبێ سڵەمینەوە و بە پشتیوانیی هێزی چەکداری ڕژێم بەعسیئاسا، شەرم نەکەن کە لە ڕابردوودا چ کارە بوون!
لە ساڵی 1983دا کاتێک لە قەسابخانەی ئەبو غرێب بە لێبوردنی گشتی ئازاد کرام و جارێکی تر پەیوەندیم کردەوە بە هێزی پێشمەرگە، ئەو چیرۆکە تراژدییانەم بۆ هاوسەنگەرانم دەگێڕایەوە کە لە زیندانەکانی ڕژێمی بەعسدا چەند ناڕەحەتیان دەکردین و بە هەموو شێوەیەک ئەشکەنجەیان دەداین، چیرۆکی ئەو پێشمەرگەیەم بۆ دەگێڕانەوە کە بەبرینداری لە یەکێک لە شەڕەکانی هێزی پێشمەرگە و چەکدارەکانی ڕژێمی بەعسدا فیشەکی لێ دەبڕێت و بەدیلی دەستگیر دەکرێت و هێنابوویانە لای ئێمە ڕۆژانە بەو بریندارییەیەوە ئازاریان دەدا و ئەویش قارەمانانە جگە لەوەی بەڵگەیان لەسەر بوو کە پێشمەرگەیە، هیچی تری نەدەدرکاند، تاوەکوو ئەوەی خێزانەکەیان دەهێنا و بەبەر چاوی ئێمەوە بێڕێزییان پێ دەکرد و ئازاری دەروونیی ئەو پێشمەرگەیان دەدا، بۆ ئەوەی زانیاری لەسەر شوێن و جێی حەوانەوەی هێزی پێشمەرگە و ڕێکخستنەکانی ناوشار بدات، باسی ئەوەم بۆ دەکردن کە ڕۆژێک پتر لە پەنجا زیندانی بووین و خودی مولازم موحسین بە دەست و چاوی بەستراوەوە، بە کێبڵ تەواوی جەستەمانی بریندار دەکرد، باسی بوتڵ پێهەڵگرتن و کارەبالێدان و هەر چی ڕەفتاری دڕندانەیە بەرامبەر بە ئێمەی زیندانییانیان دەکرد. مولازم موحسین کاتێک ئێواران سەرخۆش دەبوو، بە دار و بۆکس و شەقتێهەڵدان لە ئێمە، دەیگوت: نانی زۆرم خواردووە و ئەمەش جۆرێکە لە وەرزش بۆ ئەوەی خواردنەکەم هەزم بێت، باسی ئەو تاوانبارەم دەکرد کە چەندە ڕق و کینەی لە #ئاسۆی دەلاک# بوو، تاکوو شەهیدیان کرد، ئەمانە و زۆری تر کە نەمدەتوانی ئەو ژیانە سەختە لەیاد بکەم و ڕۆژانە بە بیرکردنەوەیان؛ ئازاری دەروونیی دەدام.
مولازم موحسین چەندین جار هەوڵی کوشتنی دەدرا و زۆر جاریش کەوتبووە بۆسەی هێزی پیشمەرگەوە، لە هەمان ساڵدا چوار پێشمەرگەی کەرتەکەمان بریاری چوونەوە شار و کوشتنی مولازم موحسینمان دا، عومەر عەرەب بەرپرسی ئێمە و بەرپرسی نەخشە و پلانی سزادانی مولازم موحسین بوو، سەڵاح حاجی عەلی (سەڵاح چاوزەق)، ئەردەڵانی ئیسماعیل عارف، بەندە شەهاب کەریم. بە چوار چەکی جۆری کڵاشیکۆف، بە هاوکاریی بەرپرسی شانەکانی ڕێکخستنی ناوشار مامۆستا حەمەعەلی، بۆ چەند ڕۆژێک لە شاری سلێمانی خۆمان حەشار دا، لەلایەن بەرپرسی شانەکانی ڕێکخستن، گەڕان بەدوای مولازم موحسین و شوێنی دیاریکراوی شەقامی سەرەکیی بەردەم مزگەوتی گەورەی سلێمانی بوو، بەڵام مولازم موحسین لە شوێنی دیاریکراو نەمابوو.
ناچار بڕیارێکی خێرا و بەپەلەمان دا کە چالاکییەک ئەنجام بدەین، لە کاتی گەڕانەوەماندا لە شەقامێکی پشتی مزگەوتی گەورە، نزیک گەڕەکی کانی ئاسکان لەناو حەشامەتێکی زۆر و ڕژێم دڵنیا بکەینەوە لەوەی دەتوانین لە شوێنێکی وادا دەست لە هێزەکانیان بوەشێنین و دڵنیایان بکەینەوە کە ناتوانن بە ویستی خۆیان ئازاری خەڵکی بدەن، بۆیە توانیمان ئەفسەر و سەربازێکی ڕژیم بێ دوودڵی بە سزای گەل و شۆڕش بگەیەنین. بەداخەوە چەند ڕۆژێک لەناو شاری سلێمانیدا بۆ کوشتنی مولازم موحسین خۆمان حەشار دا، بەڵام شانسێکی گەورەی هەبوو تووشمان نەدەبوو بە تووشیەوە و ئەو تاوانبارە بە سزای شۆڕش بگەیەنین و لەکۆڵ خەڵکی شاری سلێمانیی بکەینەوە. ئێستەش دوای ئەو هەموو تاوانانەی لەلایەن مولازم موحسینەوە دەرهەق بە لاوان و گەورە و بچووکی شارەکەمان دەکرا، بەشانازییەوە باس لە پیرۆزی و هاوڕێیەتی و پەیوەندیی دۆستایەتیی نێوان دارای حاجی برایمی چەرمەگا و مولازم موحسین دەکرێت بەبێ ئەوەی هیچ حیزبێک داوای لێ بکات شوێنی ئەو تاوانبارە لەلایەن دارای حاجی برایمی چەرمەگاوە دەستنیشان بکرێت و کۆتایی بەم جۆرە پیاهەڵدان و بێمنەتییەش بهێنرێت.


#شەهاب کەریم#
#مێژوویەک لە لوولەی تفەنگەوە؛ ڕۆژگارە سەختەکانی شاخ 1979-1991# [1]