مەولەوی و بادە
گەر کەسێ نە شارەزا گۊزەرێ کەرۊن دلۍ هۊنیەکا مامۊسا مەولەویرە و هاموەخت نەشناسای مەولەوی پېسە زاهېدو عارفێ گۆرەی، ئانە گنۊنە دلۍ تەعریفێ ناتەمامی پەی خۊدو مەولەوی کە تەمام دوورا چاڎی.
مەولەوی وەختێ مەگنۊ تاریفدای بادەی و پەنا بەرۊن پەی شەرابی، وەختێ ڕوۋەو دەمیش کەرۊن ئەو شووشۍ بادەی و تاریفېش کەرۊن، وەختێ ماچۊ ناڵەم پېسە شمشاڵی ئاڵەمش گېرتەن و تۊ چی گۊشت نیا چەنەم و لۊکە(پەمە) و گۊشیت بەربارەو مجیەرە دلۍ پیاڵەی با گۊشم دەنگو مجیارەکەیت بۊ(قرمە قرم)، وەختێ ئاوات بە پیاڵەو مەی وازۊو لاڵیۊۋە ئەو مەیگېڵنی (ساقی) کە شەرابش پەی کەرۊرە، مەولەوی بە کەسایەتیێ عاشق بە بادەی گنۊ وەرچەم. وەختێ وەشتەرین ئاواز لاو مەولەویۆ قرمە قرمو شۊشۍ شەرابیەن کە وەختێ مل لارکەرۊۋە پەی پیاڵەیو شەرابش کەرۊنە:
جە تۊ قەهقەهە جە پیاڵە مەی
جە ساقی ها دەی جە ئېمە با بەی
نە شارەزا ئەجۊش مەولەوی عاشق بە بادەی بیەن و پیاڵەو شەرابیش بە ئاوات واستەن.
ناڵەم نەی ئاسا ئاڵەم گرد نە وەر
شیشەی مەی پەمەت نە گۊش بەراوەر
جە تۊ قەهقەهه جە پیاڵە مەی
جە ساقی ها دەی جە ئېمە با بەی
مەڵڵا جە کەثرەت لەوحش بۊ سادە
مەنسووخ نەزانۊ حەڵاڵی بادە
زاهید مایەی هۊش هیچ نەمانۊ پېش
پەشېو بۊ تەقواش چوون مېزەرەی وېش
من نەبوون وە تەنگ نەفامییەوه
وېم بدەون وە دەس بەڎنامییەوە
دېوانان ئاسا بجۊشوونەوە
بەڵاگەل چوون مەی بنۊشوونەوە
شەرارەی مەستی مەی بەرشۊم نە دڵ
وەو چراخەوە یاوون وە مەنزڵ.
بەڵام دماجار مەولەوی زاهېدێ جە خوڎا تەرس، ئاڎ پېسە عاشقێ ڕووە کەرۊ مەعشوقەکێش و پېسە ساقیێ پەناش پەی بەرۊن، ئاڎییچ خالق و خوڎاو وېشەن، پیاڵە شەرابەکە نوورو مەعرېفەو خوڎایا کە مجیۊرە دلۍ دڵ و دەروونیش و ڕاش نیشانە مڎۊ پەی یاوای بە پلەو کەماڵی.[1]