پایزە برا
لە وڵاتی کوردەواریدا لە سەرەتای بەهار و خاکەلێوە، سەرما و سۆڵەی زستان بارگەی دەپێچێتەوە ئیتر کشتیار و وەرزێر و شوانکارەی کورد دەکەونە خۆ بۆ کارکردن و کاری کێڵگە و زەوییە کشتوکاڵیەکان و بە خێوکردنی مەڕوماڵات هێندە زۆر دەبێت، کەس سەری خۆی پێ ناخورێنرێت، ئه و بەروبومی دانەوێڵەی(گەنم و جۆ و نۆک و نیسک)ەی لە زستان چێنراوە، خەریکە بەره و پێگەیشتن دەچێت و جۆزەردان و خەرمانان و گەڵاوێژ دێت، دروێنە و کیشە و قشرە و خەرمان و قەسەر و گێرە و کوتان و شەنە باکردن و ڕەشکە و سواخی کادین و دەسکەنەی نۆک و نیسک و بژاری بێستان و لە ئاژەڵداریش بڕینەوەی مەڕو ماڵات و شه و بەکێو و بێرکردن، لە زەوییە کشتوکاڵیەکانیش جووتکردن و کێڵان و وەرد دانەوە و شۆبڕین و هەڵدانەوەی دۆریخه و پێ مەڕە و بێڵ تەپ و گۆڵ و خەت و خاکاو و ئاودان و ئاودێری و جۆگە و جۆبار هەڵبەستن و ئاوبارە و شەڵەگە و شتڵ لێدان و بژارکردن و کاروباری زۆر و زەوەندی کێڵگە و توتن لێدان و گەڵاجاڕ و زاخە و بۆ بازاڕ بردن و ساغکردنەوەی بەرهەمەکان و گواستنەوە و باراش لێکردن و ڕێگای ئاشی و..تاد، لەگەڵ کۆتایی هاتنی کاروباری ئاژەڵداری و باخداری و کشتیاری و وەرزێری، لە کۆتایی مانگی گەڵاوێژدا جوتیارەکان دەگەڕێنەوە ناو ئاوایی و کاری سەرسواخ و قوڕکاری و خشت بڕین دەکەن، هەموو ئه و کاروبارانە لە کوردەواریدا پێویستی بە هەرەوەزی و کاری بەکۆمەڵ و دەستگرۆیی و زبارەکردن هەیە، کورد لە کۆندا لەوەرزی بەهار و هاوین هێندە پڕ ئیش بووە، شه و و ڕۆژی لەسەر یەک داناوە بۆ ڕاپەڕاندنی کاروبارەکان تاوەکو وەرزی پایز هاتووە ئینجا بێن و پشوویەکی داوە، ئه و حاڵەتە پڕ ئیشیەی بەهار و هاوین و بێ کاروبارەییەی پایزان و سەرماوەرز و سەرەتای زستانان بووە بە ئیدیۆم و بەکاردەهێنرێت بۆ کەسێک کە لەکاتی کاروبار و دەستگرۆیی و زبارە و هەرەوەزی دیار نەبێت و بۆ ئیش و کارێکی خۆی دوای تەواوبوونی کارەکان سەربدات، کارێک یان داواکاریەکیشی هەبێت، یان بە بێ ئیش سەر لەکەس نەدات بە تەوسەوە به و جۆرە کەسانە دەوترێت: پایزە برا. [1]
Este artículo ha sido escrito en (کوردیی ناوەڕاست) Lenguaje, haga clic en el icono de
para abrir el artículo en el idioma original!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
Este artículo ha sido visitado veces 1,222