دەقی ڕاگەیەندراوەکە:
راگەیاندنی کۆتایی کۆبوونەوەی کۆمیتەی سەرکردایەتيی
یەکێتی نەتەوەیی دیموکراتی کوردستان YNDK
رۆژی دووشەممە 14 / 3 / 2022 کۆمیتەی سەرکردایەتيی (یەکێتی نەتەوەیی دیموکراتی کوردستان YNDK) بەسەرپەرشتی هەڤاڵ غەفوور مەخمووری سکرتێری گشتیی YNDK، لە بارەگای مەکتەبی سیاسی YNDK لە شاری هەولێر، کۆبوونەوەی ئاسایی خۆی ئەنجامدا، لە کۆبوونەوەکەدا گفتوگۆ لەسەر بارودۆخی سیاسی کوردستان و عێراق و ناوچەکە و کارو خەباتی YNDK کرا:
باشووری کوردستان:
باشووری کوردستان لە ڕەوشێکی سیاسی زۆر ناسک و هەستیاردایە، ناوەندی سیاسیی کوردستان پەرش و بڵاوو لێکترازاوە، لایەنە سیاسییە دەسەڵاتدارەکان لە ناکۆکی و ململانێی بەردەوامدان، ئەم ڕەوشە نیگەرانییەکی زۆری دروستکردووە، بۆیە بە پێویستی دەزانین کە بەزووترین کات ناوەندی سیاسی و ناوماڵی کوردستان ڕێک و یەکبخرێتەوە، بۆ ئەمەش پێکهێنانی (ئەنجوومەنی سیاسیی کوردستان) کە تەواوی هێزو لایەنە سیاسییەکانی کوردستان بگرێتەخۆ بەگرنگ دەزانین، ئەمەش دەبێتە فاکتەرێک بۆ ئەوەی کەوا هەموو لایەنە سیاسییەکان لەسەر پرسە نەتەوەیی و نیشتمانییەکان یەکدەنگ و یەکهەڵوێست بن، بە تایبەت لەم قۆناخە هەستیارو چارەنووسسازەدا، کەوا ئێستا داگیرکەرانی کوردستان لە هەموو لایەکەوە هەڕەشە لە کوردستان دەکەن، ئەوەتا لە لایەک ڕژێمی تورکیا بەردەوام ناوچە سنوورییەکان تۆپباران دەکات و خەڵکی سڤیل ئاوارەو شەهید دەکات، لە لایەکی دیکەوە ئێران بەردەوامە لە هەڕەشەکانی بەرامبەر باشووری کوردستان، دوا هەڕەشەیان؛ کە باوەڕی ئێمە دوا هەڕەشە نابێت، موشەکباران کردنی هەولێر بوو، ئێمە ئەو کارە تیرۆریستییە و تەواوی دەستدرێژییەکانی داگیرکەران بۆ سەر کوردستان بە توندی ئیدانەو مەحکووم دەکەین و، داوا لە کۆمەڵگەی نێودەوڵەتی دەکەین لەم ڕووەوە تەنیا سەیرکەر نەبن و هەڵوێستیان هەبێت و بێدەنگ نەمێنن، ئەم پیلان و هەڕەشانەی لەسەر گەلی کوردستان و ئەزموونەکەی بەڕێوەدەچێت، پیلانێکی ناوچەیی بەرنامە بۆ دارێژراوی گەورەیە دژ بە گەلی کوردستان، ئەم پیلانانە دەمێکە کاریان لەسەر دەکرێت و هەوڵی جێبەجێکردنیان دەدرێت، بێگومان یەکڕیزی و یەکدەنگیمان کاریگەرترین چەکن بۆ ڕووبەڕووبوونەوەو هەڵوەشاندنەوەو پوچەڵکردنەوەی ئەم پیلانانە و هەوڵە نەزۆکەکانی دوژمنان و ناحەزانمان.
سەبارەت بە شێوازی بەڕێوەبردنی کوردستان:
ئێمە وەک YNDK ئەنجامدانی چاکسازییەکی گشتگیر لە تەواوی بوارەکانی بەڕێوەبردنی کوردستان بەپێویست دەزانین و، داواکارین حکومەتی کوردستان تەواوی دەزگاو دامەزراوەکانی کوردستان بەشێوەیەکی سەردەمییانە سیستماتیک بکات و، ببێتە حکومەتێکی یەکگرتوو بۆ هەموو خەڵکی کوردستان، بۆ ئەمەش پێویستە شوێنەواری دوو ئیدارەیی نەهێلدرێت و حکومەت لەسەر هەموو ئاستەکاندا یەکبخرێتەوە، هەموو لایەکمان چاوەڕوانین کەوا حکومەتی کوردستان هەنگاوی باش بنێت بۆ پێشکەشکردنی خزمەتگوزاری زیاترو نەهێشتنی گەندەڵی و نادادپەروەری کۆمەڵایەتی و سیاسی و ئابووری و حزب حزبێنە و نایەکسانی، هەروەها پێویستە حکومەتی کوردستانە ئاوڕی زیاتر لە فەرمانبەران و مامۆستایان و خانەنشینان و خانەوادەی شەهیدان و خاوەن پێداویستی تایبەت بداتەوە و مووچەکانیان لەکاتی خۆيدا بۆ خەرج بکات و کاربکات بۆ باشترکردنی ژیان و گوزەرانی خەڵکی کوردستان، هەورەها پێویستە کار بۆ گەڕاندنەوەی کەرکووک و مەخموور و هەموو ئه و شوێنانە بکات کە بەپیلانێکی نەگریس کەوتنە بندەستی سوپای داگیرکەری عێراق، لە قۆناخی ئێستاشدا پێویستە داوا لە حکومەتی عێراق بکات کەوا زیاتر خزمەتی ناوچە دابڕێنراوەکان (داگیرکراوەکان)ی کوردستان بکات و خزمەتگوزاری تەواویان پێبگەیەنێت و ئارامی و ئاسایشی ئەو ناوچانە بپارێزێت.
سەبارەت بە مامەڵەکردنی حکومەت لەگەڵ حزب و هێزە سیاسییەکانی کوردستان: پێویستە حکومەتی کوردستان بەشێوەیەکی یەکسان و دادپەروەرانە مامەڵەیەکی تەندروست لەگەڵ تەواوی هێزو لایەنە سیاسییەکانی کوردستان بکات، بۆ ئەم مەبەستەش دەکرێ بۆردێکی تایبەت دروست بکرێت کە ببێتە خاڵی پەیوەندی نێوان حکومەت و حزب و لایەنە سیاسییەکانی کوردستان.
باکووری کوردستان:
ئێمە لە YNDK پشتیوانی خۆمان بۆ خەباتی باکوور ڕادەگەیەنین و، ئیدانەی تەواوی ئەو دەستدرێژیانەی دەوڵەتی داگیرکەری تورکیا دەکەین کەوا دەیکاتە سەر پەرلەمانتارانی کورد و شارەوانییەکان و چالاکوانە مەدەنییەکان، ئەو دەستدرێژییانەی تورکیا ئەو ڕاستییە دەسەلمێنن کەوا تورکیا دژی هەرجۆرە خەباتێکی مەدەنی و پەرلەمانی و سیاسییە لە باکووری کوردستاندا، سیاسەتی دوژمنانەی تورکیا بەرامبەر گەلی کوردستان ئەو ڕاستییە دەسەلمێنێت کەوا تورکیا دژی هەر داواو دەسکەوتێکی گەلی کوردستانە جا لە هەر بەشێکی کوردستان بێت، داوا لە کۆمەڵگای نێودەوڵەتی دەکەین بەرامبەر ئەو دەستدرێژییانەی تورکیا بیدەنگ نەمێنن، سەرەڕای ئاستەنگەکانی بەردەم خەباتی نەتەوەکەمان لە باکوور، خەبات بەردەوامەو پێشڤەچوونی بەرچاویش وەدیهاتوون، خۆشحاڵین بەپێشڤەچوونەکانی خەباتی نەتەوەکەمان لەو بەشەی وڵات و, هيوادارين ببێتە فاکتەری سەرەکی پێشڤەچوون و سەرکەوتنی زیاتر و گەیشتن بە مافە ڕەواکانی نەتەوەکەمان.
ڕۆژهەڵاتی کوردستان:
ئێمە وەک YNDK هەوڵەکانی لەیەکدی نزیکبوونەوەی لایەنە سیاسیەکانی ئەو بەشەی وڵات بەرز دەنرخێنین و, بە گرنگی دەبینین کە تەواوی هێزو لایەنە سیاسییەکانی ڕۆژهەڵاتی وڵات کار بکەن بۆ کۆکردنەوەی هێزو تواناکانیان و، بەرەیەکی سیاسی بەرفراوان کە تەواوی هێزو لایەنە سیاسییەکانی ڕۆژهەڵات بگرێتەخۆ لە نێوان خۆیاندا پێکبهێنن، بۆئەوەی ئامادە بن بۆ هەر ئەگەرو پێشهاتێک کە لەسەر ئاستی ناوچەکەدا دێنە پێشەوەو ڕوودەدەن، لەهەمان کاتدا سڵاوو ڕێز دەنێرین بۆ زیندانييانی سیاسی لە زیندانەکانی ئێران و خەبات و بەرخودانیان بەرز دەنرخێنین و، داوا لە کۆمەڵگای نێودەوڵەتی و ڕێکخراوەکانی مافی مرۆڤ دەکەین کەوا هەوڵبدەن گیانی چالاکوانان لە زیندانەکانی ئێران لە مردن ڕزگار بکەن و، پاڵەپەستۆ بخەنە سەر ڕژێمی ئێران کەوا چیتر گەنج و چالاکوانانی کورد لە سێدارە نەدات.
رۆژئاوای کوردستان:
ئێمە وەک YNDK جارێکی دیکە پشتیوانی خۆمان بۆ خەبات و تێکۆشانی ڕۆژئاوای کوردستان ڕادەگەیەنین و، پێشڤەچوون و سەرکەوتنەکانی ڕۆژئاوای کوردستان بەرز دەنرخێنین و، بە گرنگی دەزانین تەواوی هێزو لایەنە سیاسییەکانی ئەو بەشەی وڵات یەکڕیزو یەکدەنگ بن و بەیەکەوە کاربکەن و خۆیان لە ململانێی حزبایەتی بەدوور بگرن و، لەجیاتی حزبایەتی کوردایەتی بکەن و بەرژەوەندی نەتەوەیی لەبەرچاو بگرن و خۆیان لەهەر گرژی و ناکۆکییەک بپارێزن، لەهەمان کاتدا تەواوی هێرش و پەلامارو دەستدرێژییەکانی دەوڵەتی داگیرکەری تورکیا بۆ سەر ڕۆژئاوای کوردستان ئیدانە دەکەین و داوا لە کۆمەڵگای نێودەوڵەتی دەکەین کەوا لە بەرامبەر تورکیادا هەڵوێست وەربگرن.
کۆنگرەی نەتەوەیی کوردستان:
ئێمە وەک YNDK جارێکی دیکە جەختدەکەینەوە سەر بەستنی کۆنگرەی نەتەوەیی کوردستان بەبەشداری تەواوی هێزو لایەنە سیاسییەکانی کوردستانی مەزن, بەستنی کۆنگرەی نەتەوەیی کوردستان لەم کاتە هەستیارەدا بەئەرکێکی نەتەوەیی و نیشتمانی دەزانین و، وەک هەنگاوێک بۆ یەکڕیزی و یەکدەنگی گەلی کوردستان لەسەر ئاستی کوردستانی مەزن لێیدەڕوانین.
ساڵیادی دامەزراندنی:
YNDK نەورۆزی ئەمساڵ YNDK پێدەنێتە 27 بیست و حەوتەمین ساڵیادی دامەزراندنی خۆی، YNDK وەکو ڕێکخستنێکی نەتەوەیی و جەماوەری لە گۆڕەپانی سیاسی و کلتوری کوردستان لە نەورۆزی 1995 لەدایکبوو و ڕاگەیاندراو بووە موژدەبەخش بۆ کۆکردنەوەو پەروەردەکردن و ئاراستەکردنی هاوبیرانی نەتەوەیی و وڵاتپارێزان و نیشتمانپەروەران بۆ کارو خەبات، YNDK لەماوەیەکی کورتی تەمەنی کارو خەباتیدا توانی بەدیاربکەوێ و بەهۆی کاری بەردەوامی لەسەر خزمەتکردن و کارکردن بۆ سەربەخۆیی کوردستان، کاریگەری لە سەر پرسە نەتەوەیی و سیاسییەکان دروست بکات، ئەمساڵیش کەوا یادی (27)ەمین ساڵەی لەدایکبوونی خۆی دەکاتەوە، پەیمان بە گەلی کوردستان دەدا وەک هەمیشە لە سەنگەری جەماوەردا بێت و داکۆکی لەمافە ڕەواکانیان بکات و پەیوەیست بێت بە ئامانج و پرەنسیپە نەتەوەیی و نیشتمانییەکانی.
عێراق :
YNDK پێیوایە تا ئێستاش هیچ گۆڕانکارییەگی پۆزەتیف لە سیاسەت و هەڵسوکەوتی دەسەڵاتدارانی عێراق بۆ نزیکبوونەوە لەگەڵ کوردستان ڕووینەداوە، دژایەتیکردنی خواستەکانی گەلی کوردستان لەلایەن دەسەڵاتدارانی عێراق بەردەوامە، ئەم ڕەوشەی کەوا ئێستا عێراق پێیدا گوزەر دەکات بەرەنجامی عەقلیەتی تاکڕەوی و دکتاتۆرییەتە کە حکومەتی تائیفی و مەزهەبی لە ساڵانی ڕابردوو و لە ئێستادا هۆکاری هێنانە ئارای ئەم عەقلیەت و ڕەوشە نەخوازراوە بوون، بە باوەڕی ئێمەو بەپێی ئەزموونی کورد لەگەڵ ڕژێمەکانی پێشووی عێراق دەگەینە ئەو ڕاستییەی کەوا متمانە بە دەسەڵاتەکانی عێراق نەکەین، بێگومان دەسەڵاتدارانی ئێستای عێراق دەیانەوێ هەمان سیاسەتی هەلەی حکومەتەکانی پێشووی عێراق دووبارە بکەنەوە، ڕوانینی دەسەڵاتی ئێستای عێراق هەمان ڕوانینی دەسەڵاتەکانی پێشووە، ئەمەش ئەو ڕاستییە دەسەلمێنێت کەوا عەقلیەتی دەسەڵاتداری عێراقی چەقبەستووەو ناگۆڕێت و، ڕوانینی زۆربەیان هەمان ڕوانینی حکومەتەکانی ڕابردووە بۆ چارەسەری پرسی کورد ! زۆربەی دەسەڵاتدارانی عێراق لۆژیکی خۆبەزلزانین و سەربازی دەخەنە پێش لۆژیکی دیالۆگ و لەیەکترگەیشتن، ماوەیەکە پەرلەمانی نوێی عێراق هەڵبژێردراوە، بەڵام ململانێی نێوان لایەن سیاسییەکان وایکردووە، کەوا تا ئێستاش سەرۆکی کۆمار هەڵنەبژێردرێت و حکومەتی نوێش پێکنەهێنرێت، لە ڕەوشێکی وادا پێویستە هێزە سیاسییەکانی کوردستان کار بۆ یەکڕیزی و یەکدەنگی بکەن و کار بکەن بۆ ئەوەی وەک یەک تیم مامەڵە لەگەڵ هێزە عێراقییەکان بکەن، نەک وەک ئەم حیزب و ئەو حیزب، یەکگرتوویمان پێگەی کوردستان بەهێز دەکات و نزیکمان دەکاتەوە لە وەدەستهێنانی خواستەکانمان.
رەوشی ناوچەکە :
YNDK پێیوایە ڕۆژهەڵاتی ناڤین لە ڕەوشێکی پڕ ناسک و هەستیارو ئاڵۆزدایەو ڕۆژ بە ڕۆژ ئەگەرو پێشهاتی نوێ دێنە پێشەوە، بە تایبەت دوای هێرشی ڕوسیا بۆ سەر ئۆکرانیا، بێگومان ئەو شەڕە کاریگەری کردۆتە سەر ڕەوشی سیاسی ناوچەکەو جیهانیش، ئەو ئەگەرو پێشهاتانە کاریگەری خۆیان دەبێت بۆ سەر ڕەوشی ئێستای کوردستان و بزاڤە ڕزگاریخوازەکانی ناوچەکە، بەداخەوە ئێمەی گەلی کوردستان بەهۆی ململانێی سیاسیی نێوان لایەنە سیاسییەکان بەرنامەیەکی نەتەوەیی و نیشتمانیمان نیە بۆ چۆنیەتی مامەکردن لەگەڵ پێشهاتەکاندا، پێویستە ئێمە وەکو گەلی کوردستان لە ڕەوشێکی وادا کارنامەیەکی نەتەوەیی و نیشتمانی دابڕێژین بۆ چۆنییەتی مامەڵەکردن لەگەڵ پێشهات و ڕووداوەکاندا، هەروەها پێویستە برایانمان لە بەشەکانی دیکەی کوردستان ڕیزەکانی خۆیان یەکبخەن و کارو خەباتی خۆیان خورت بکەن و بەرەو ڕزگاری و ئازادی هەنگاو بنێن، لە هەمان کاتدا وای دەبینین کەوا دەکرێ لە ئەنجامی ئەو گۆڕانکارییانەی کە دێنە پێشەوە سوود وەربگرین بۆ کارکردن بۆ ئازادی و سەربەخۆیی کوردستان.
کارو خەباتی YNDK :
لە دوا تەوەری کۆبوونەوەکەدا باس لە کاروخەباتی YNDK لەماوەی ڕابردوودا کراو، دوا هەڵسەنگاندنی کارو خەباتی ماوەی ڕابڕدوو، کارنامەیەکی نوێ بۆ کارو خەباتی داهاتووی YNDK دانرا، ئەمەو کۆبوونەوەکە سەرکەوتووانە کۆتایی بە کارنامەی خۆی هێنا.
کۆميتەی سەرکردايەتيی
یەکێتی نەتەوەیی دیموکراتی کوردستان YNDK
14 / 3 / 2022 هەولێر - باشووری کوردستان[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!