دەقی وتارەکە کە لەلایەن دیندار زێباری، نوێنەری #مەسرور بارزانی#ەوە خوێندرایەوە:
بەرێزان
نونەرێن حکومەتا فید‌رال، یونیتاد و سازیێن نەتەوەیێن ئێکگرتی، رێکخستنێن نێڤدەولەتی و هەرێمی، مالباتێت شەهید و بریندار و رزگار بوو‌یێت دەستێ تیرورستێن #داعش#
ئەڤرو ب رێز و حورمەت بەشدارین ل مەراسیما زڤراندنا روفاتێت (41) ئێزیدێیت کۆجۆ و سۆلاغ کو بوونە قوربانیێت جینۆسایدەکا هەری هۆڤانە د دیرۆکا مرۆڤایەتێدا‌ لسەر دەستێ تیرورستێن داعشێ.
پشتی تیرۆریستان هێرش کریە سەر چەند دەڤەرێت هەرێما کوردستانێ، ب تایبەت ئەو دەڤەرێن کو ئێزیدی و پێکهاتێت ئاینی و نەتەوی لێ دژین هەموو عورفێت مرۆڤی و پرەنسیپێت مافێ مرۆڤی بن پێ کرن، مال تاڵان کرن، ژن، زارۆک رەڤاندن و ب سەدان هزار کەس ئاوارە کرن کو بەرێ خو دایە هەرێما کوردستانێ، سەرەڕای هەموو کارەساتا ئێزیدیا کەلتوور، ناسنامە و دینێ خو‌ پاراست.
حکوومەتا هەرێمێ دگەل هەموو ئالێین پێوەندیدارێن عیراقی و نێڤدەولەتی هەول ددەت کو جڤاکا ئێزیدی و هەموو پێکهاتێن دینی، مەزهەبی و نەتەوی د پاراستی بن و تووشی کارەساتەکا دی نەبن و ب ئازادی و حورمەت بژین. و بزڤرنەڤە سەر ماڵێت خو ودەڤەرێن وان بێنە ئاڤەدانکرن، خزمەتگوزارێی سەرەتایی بو بهێنە دابینکرن. هەروەها داخازێ ل حکوومەتا فیدرال دکەین کو قەرەبوویا وان بێتە کرن و تیرۆریست و تاوانبار بهێنە دادگایی کرن و ل گۆری یاسا و پیوەرێن نێڤدەولەتی بێنە جەزاکرن.
حکوومەتا هەرێمێ تاوانێن داعشێ ل دژی ئێزیدیان و پێکهاتێن دی دیکیومێنت کرنە، (5170) دۆسیە هاتنە تۆمارکرن، ژ وان زێدەتری (2324) دۆسیا لێکولینا وان ب داوی هاتنە، ب هەولێت حکومەتا هەرێمێ ژ بۆ ئازادکرنا ئەوێت هاتنە رەڤاندن هەتا نوکە (3550) هاتنە ئازاد کرن ل وان (1206) ئافرەت و (339) مێر، زارۆکێن کچ (1049)، زارۆکێن کوڕ (956)، حکوومەتا هەرێمێ دێ بەردەوام بیت‌ لسەر خەباتا خو ژ بۆ ئازادکرنا هەموو رەڤاندیان.
حکومەتا ھەرێما کوردستانێ، خو ل خوشک و براێیت ئێزیدی کریە خودان و ب شێوەیەکێ فەرمی کار کریە ئەڤ تاوانا ھندا مەزن ب جینوساید بێتە ناساندن و ئەڤەژی ب ئەرکێ خو زانییە، لەورا کۆمیتەکا بلند پێکئینایە ژ بۆ ناساندنا ئەڤان تاوانا وەک جینوساید لسەر ئاستێ نێڤدەولەتی، پێتڤیە کو لایەنێن نێڤدەولەتی بتایبەتی جڤاتا ئاسایشا نێڤدەولەتی ب رێکا راوێژکارێ تایبەت و سەروکێ تیما یونیتادێ روڵێ خو ببینیت بۆ دەستپێکرنا پروسیسا دادگاێ کرنا تاوانبارێن داعشێ لسەر تاوانێن نێڤدەولەتی وەک تاوانێن دژی مروڤایەتی، تاوانێن جەنگ و جینوساید.
لێرە ئەم بفەر دزانین کو پروژە یاسایا هەرێما کوردستانێ بو دامەزراندنا دادگایا تایبەتمەند بو تاوانێن داعشێ کو پێوەرێت نێڤدەولەتی تێدا جێگر بینە ل دویف داواکاری و ب پشتگیریا یونیتادێ کو ل قوناغا کوتاییدایە نابیت رێگری لێ بێتە کرن.
ئەم ب پێویست دبینین کو رێککەفتنا #شنگال#ێ د ناڤبەرا حکومەتا هەرێما کوردستانێ و حکومەتا ئیتیحادی بۆ ئاساییکرنا رەوشا شنگالێ بلەز بهێتە جیبجیکرن، چونکە باشترین چارەسەرە بۆ ئارامی و ئاسایش و ئاڤاکرنا دەڤەرێ و زڤراندنا ئاوارەیان، دڤێت حکومەتا فید‌رال و ئالێین نێڤدەولەتی بتایبەتی یۆنامی ب ئەرکێ خو رابن و هەولێت جددیتر بدەەن بو جیبجیکرنا رێککەفتنێ‌. ئێزیدی پێکهاتەیەکا رەسەنا گەلێ کوردستانێنە و دڤێت ئەم هەمی پێکڤە کار بکەین کو بشێین بارێ وان سڤک بکەین، ئەم ل حکومەتا هەرێمێ بەردەوام پشتەڤان و یارمەتیدەر بووینە کو خزمەتەکا هەژیتر بو خوشک و براێیت ئێزیدی بهێت کرن و ئێش و خەمێت وان کێم بکەین.
ل دیماھیێ، سەرێ رێز و حورمەتێ بو قوربانیێت شنگالا جینوساید کری دچەمینین و ھیڤیا مە ژ خودێ ئەوە، شەھیدا ب بەھەشتێ شاد بکەت و یێت رەڤاندی ڤەگەرێن ب سەرەکێ بلند و ھەمی دەربەدەر وتەناھی و ئاڤەدان کرن پێکڤە ڤەگەرن شنگالا خوشتڤی، لێرە ب پێتڤی دزانم سوپاسیا تیما نەتەوێن ئێکگرتی بو لێکۆلینێ ل تاوانێن داعش (یونیتاد) دکەین ب سەرۆکاتیا بەڕێز کرسچن ریستچەر و سەرۆکێ بەرێ یێ تیمێ بەڕێز کەریم خان، ژ بۆ خەباتا وان لسەر دۆسیایا قوربانیێن ئێزیدی.
سلاڤ و رێز بو پێشمەرگێت قەهرەمان ب سەرپەرشتیا جەنابێ سەروک بارزانی کو ل روژا (13/11/2015) شیان دەڤەرا شنگالێ ئازاد بکەن. سوپاسیا ھێزێت ھەڤپەیمانا دکەین کو پشتەڤانێت سەرەکی بوون بو هێزا پێشمەرگە و سوپاێی عێراقی. ئەرکێ لایەنێت ناڤخوێی ێیت پەیوەندیدار و جڤاکا نێڤدەولەتییە هەڵمەتا ئاڤەدانکرن و بونیادنانێ دەستپێبکەن و برینێت ئێزیدییا و هاووڵاتێیت شەنگالێ ساڕێژ بکەن.
نەمری بو قوربانێیت شنگالێ.[1]