ئەنجوومەنی گەلی شەنگال و بزووتنەوەی ئازادیی ژنانی ئێزدی (تاژێ - TAJÊ) لە خانەسۆر ڕاگەیاندراوێکی هاوبەشیان لە دژی ڕێککەوتنی بەغدا و هەولێر لەسەر شەنگال بڵاوکردەوە.
دەقی ڕاگەیەندراوی دانیشتوانی خانەسۆر:
ئێمە بە توندی بەرامبەر بە بڕیاری بەغدا – هەولێر دەوەستینەوە و قبوڵی ناکەین، چونکە ئەو بڕیارە ناکەوێتە خزمەتی خەڵکی شەنگال و هەموو پێکهاتەکانی. لەبەر ئەوەش ئەو ڕێککەوتنەوەی نێوان بەغدا و هەولێر بڕیارێکی سیاسییە. هەر بڕیارێک، کە لە بەرژەوەندی و بە ڕەزامەندیی ئێمە نەبێت بە توندی ڕەتیدەکەینەوە. بەڵام ئێمە لەگەڵ ئەوەداین ئاوارەکان بگەڕێنەوە سەر ماڵ و حاڵی خۆیان. داوایەکی تری سەرەکیمان ئاوەدانکردنەوەی شەنگالە. ئەو کەسانەی بەهۆی فەرمانەوەکەوە زیانیان بەرکەوتوە گارانتی و قەرەبوویان بۆ دابینبکرێت. دەبێت دەوڵەتی عێراق مافی کۆمەڵگەی ئێزدی لە هەموو ڕوویەکەوە قبوڵ بکات. دەبێت بڕیار لە دەرەوەی ئیرادەی ئێزدییەکان نەدات و ڕێککەوتن لەگەڵ کەسانی جیا لە ئێمە واژۆ نەکات. بۆیە ئێمەی خەڵکی شەنگال لە ئاستی سەرەکیدا خاوەن مافین، کە هەموو شتێکی خۆمان وەک بەڕێوەبەریی خۆمان لە ڕووی سەربازی و خزمەتگوزاری، کۆمەڵایەتی و ئابووری لە هەموو ڕوویەکەوە و بە هەموو شێوەیەک بۆ خۆمان هەڵبژێرین. ئەوە مافی خۆمانە، کە خۆمان بپارێزین و ئەوەش بە هەماهەنگی لەگەڵ حکومەتی عێراق دا بکەین.[1]