دەقی ڕاگەیاندراوەکەی پەژاک
نابێ گەلەکەمان متمانە بە دەزگاو سەرچاوەکانی شەڕی تایبەتی ڕژێم بکەن
بە پێی زانیارییەکانی وەدەست خراو لە ڕێکەوتی 25 خەرمانانی ئەمساڵ لە هەرێمی ناوبەینی مەهاباد و سەردەشت لە نزیک ئاوایی چوارگا هێندێ ڕووداو قەوماون کە لەسەر چۆنێتی و دەرئەنجامەکانی ئەو ڕووداوانە زانیاری ڕاست و جێگای متمانە بەدەستەوەنین. جێگای ئاماژیە کە لە کاتی ئەو ڕووداوەوە هەتا ئێستا، ئاگاداریمان لە تیمێکی هەڤاڵانمان نییە و سەرەڕای هەموو بەدواداچوون و لێکۆڵینەوەکانمان، بابەتەکە بە ناشەفافی ماوەتەوە. هەروەها دەبێ ئاماژە بکەین کە لە هەمان ڕێکەوتەوە دوو کەسی مەدەنی خەڵکی ئەو ناوچەیەش بێسەروشوێنن و زانیاریان لەسەر نییە. تەنانەت دیار نییە کە ئەو دوو ڕووداوە پێوەندیان بە یەکەوە هەیە یا نا. ئێمە وەک پارتی ژیانی ئازادی کوردستان بەردەوامین لە لێکۆڵینەوە لەسەرئەو بابەتانە و بە مەرجی وەدەست خستنی هەرجۆری هەواڵی نوێ سەبارەت بەو ڕووداوانە گەلەکەمان ئاگادار دەکەیەنەوە.
جێگای ئاماژەیە کە دام ودەزگاکانی سەربە ڕژێمی داگیرکەری ئێران لەو هەرێمە، لەو چوارچێوەیەدا شەڕێکی تایبەت بەڕێوە دەبەن و بەردەوام مژارەکان شلوێتر، ناڕوونتر و چەواشە دەکەن. هەوڵدانیان ئەوەیە کە لەو نێوەندەدا ئامانجە قێزوەنەکانیان بپێکن. لەبەر ئەوەش پێویست دەکا گەلەکەمان لە بەرامبەر ئەو جۆرە کردارانە وشیار بێت و هەتا بە شێوازێکی ڕەسمی لە لایەن پارتیمانەوە بابەتەکان پشت ڕاست نەکراونەتەوە بە هێچ شێوازێک متمانە بە دەزگا و سەرچاوەکانی شەڕێ تایبەت نەکەن.[1]