ڕوونکردنەوەيەک بۆ ڕای گشتی...
دوای ئەوەی پەرلەمانتار ئەرشەد ساڵحی لە لاپەڕی فەرمی خۆيەوە لە تۆڕی کۆمەڵايەتی فەيسبووک و گرووپەکانی واتسئەپ بڵاويکردەوە کە گوايە هاوڵاتييەک پاش دەستگيرکردنی لەلايەن هێزەکانی دژەتيرۆرەوە ئازار و ئەشکەنجە دراوە و بەهۆيەوە گيانی لەدەستداوە.
وێڕای ڕەتکردنەوەی تەواوی بڵاوکراوەکەی ئەو پەرلەمانتارە، بۆ ڕای گشتی ڕايدەگەيەنين کە پاش بەدواداچوونمان و دەستکەوتنی بەڵگەی تەواو دەرکەوت کە خولێخۆشبوو (ئوسامە حەسەن محەمەد) لەخێزانێکی کوردی-تورکمانی لەبەرواری 21ی ئاب داخڵی نەخۆشخانەی ئەنتەرناشناڵی شاری هەولێر کراوە و پرۆتۆکۆڵی چارەسەری کۆرۆنای پێدراوە و پاشان بەکاريگەری هەمان ڤايرۆس کۆچی دوايی کردووە.
ئەم لێدوان و بڵاوکراوانە لەکاتێکدايە کە شارەکەمان بە دۆخێکی هەستياردا تێپەڕدەبێت و لەهەمووکات زياتر پێويستمان بە لێک نزيکبوونەوە و گەياندنی پەيامی ئاشتەوايی و پێکەوەژيانە بەڵام بەداخەوە ئەم جۆرە هەواڵە بێ بنەمايانە خزمەت بە کەرکووک و دانيشتووانەکەی ناکات جگە لە دروستکردنی ڕق و تووڕەيی و دەمارگيری نەتەوەيی. بۆيە وەک هەميشە جەخت لە برايەتی و پێکەوەژيانی ئاشتيانەی نێوان پێکهاتەکانی کەرکووک دەکەينەوە و دژی هەر هەوڵێک دەوەستينەوە کە بيەوێ تۆوی دووبەرەکی لەکەرکووک بچێنێت.
لەکۆتايدا پرسە و سەرەخۆشی خۆمان ئاراستەی خانەوادە و کەسوکاری خولێخۆشبوو (ئوسامە حەسەن محەمەد) دەکەين و داواکارين پەروردگار بە بەهەشتی بەرينی شادبکات، وە ئێمە وەکو نوێنەرانی کورد لەکەرکووک لێکۆڵينەوە لەو کەيسە دەکەين و جەخت لەوە دەکەينەوە کە هەموو خاوەن حەقێک بەحەقی خۆی بگات.
هاوپێچ لەگەڵ ئەم ڕوونکردنەوەيەدا بەڵگەی پڕۆتۆکۆڵی چارەسەری 9 ڕۆژی کۆرۆنای ناوبراو بڵاودەکەينەوە.
نوێنەرانی کەرکووک لەفراکسيۆنی (ی.ن.ک)
2020/8/28