نووسین و ئامادەکردنی: #دیدە فەرەیدون#
من لە لای پوورم گەورەبووم و ئەو لە جێی دایکمە، لە منداڵییەوە دەزانێت کە حەزم لە شتی دووبارە نییە، ئەوەش وایکردووە کە سەرکێشی زۆر بکەم.
دەزانم لە خۆشەویستییەوە وادەکات، چونکە ئەویش ژنێکی ئازابوو، هەموو کات منیش حەزم لێبوو نیشانیبدەم، کە ژن دەتوانێ لە هەموو بوارێکدا کاربکات و سەرکەوتووبێت، یەکێک لەو کارانەش سەربازی بوو، دەمویست بزانم بەڕاستی ناترسن! بۆ نموونە ئەگەر هەر کارمەندێک لە هەر دەزگایەک کاربکات تاوەکو ڕاددەیەک دەزانێ کەی دەچێت و کەی دەگەڕێتەوە، بەڵام لە کاری سەربازیدا چوونی دیارە و گەڕانەوەی نا، ئایا ئەوان دەبێ چ بە پووریان بڵێن؟
ماوەیەک بوو لەگەڵ هاوکارانم ئامادەکاریم بۆ ئەو کارە دەکرد. زۆربەی چاوپێکەوتنە ڕۆژنامەڤانییەکانی کاگینزم بینیبوو و پرسیاری زۆریشم لەلا دروست ببوون، کە لەو بینیەدا لێیان بکەم.
بەرەو ڕوژئاوای کوردستان دەڕۆین، ڕەنگە هەمووتان کەم تاوەکو زۆر ئاگاداربن بارودۆخی ڕۆژئاوا چۆنە، بەڵام ئەوەی کە من و بەشێک لە ئێوە ڕەنگە نەمانزانیبێ میواندۆستی و میهرەبانی خەڵکی ڕۆژئاوای کوردستانە، پێموابوو کاتێک جەنگ لە هەر شوێنێک ڕووبدات مروڤەکان بەرەو تووندوتیژی و زبری دەگۆڕێن، بەڵام خەڵکی ڕۆژئاوا پر هەستتر و ئازاتربوونە، وەک خۆیان دەیانگوت و منیش بەڕوونی هەستم بەو پڕ هەستییەیان دەکرد.
کاژێر 9ی بەیانی 28ی تەممووزی 2020 لەگەڵ هاوکاری وێنەگرم لە تۆڕی میدیایی ڕووداو (بەیار حەکیم)، لە فڕۆکەخانەی #هەولێر#ی نێودەوڵەتی بووین، قەڵخانی خۆپاراستنمان پۆشی و بەرەو هەلیکۆپتەرەکە ڕۆیشتین، من یەکەم جارم بوو بە هەلیکۆپتەر بفڕم، بەڵام بەیاری هاوکارم، پێش دوو ساڵ بۆ ئەنجامدانی فیچەرێک لەسەر کەشتیی سەربازیی جۆرج بوش لە بەحرێن، سواری هەلیکۆپتەر ببوو. هەر باسی دەکرد و دەیگوت تۆ یەکەم جارتە، سەیری من بکە چیمکرد وابکە، تووڕەی کردبووم، ترسم هەبوو، بەڵام خۆم واپێشان نەدا کە دەترسم، بۆ ئەوەی گاڵتەم پێنەکات.
کاروانەکە بۆ ڕۆژئاوای کوردستان بریتیبوو لە سێ هەلیکۆپتەر، ئەوەی ئێمە لە جۆری CH -47 Chinook بوو، دووانەکەی دیکەش لە جۆری UH-60و Blackhawk بوون، پێداویستی فریاکەوتنی سەرەتایی و چەند پەڕەشووتێکی تێدابوو لەگەڵ ئاو.
نەمدەتوانی هیچ بخۆم، کاژێر 10:30 هەلیکۆپتەرەکەمان فڕی و گەشتەکەمان 60 خولەکی خایاند، 20 کەس بووین لەنێو هەلیکوپتەرەکەدا، تەنیا سێ کەسمان سیڤیل بووین، من و وێنەگرەکەم و تانیا مەحموود، گەورە ڕاوێژکاری فەرماندەیی هێزی هاوپەیمانان لە عێراق و سووریا، ئەوانیدیکە هەموو سەرباز بوون.
دابەزین لە بیابان بوو، تەنیا ئۆتۆمبێلی سەربازی و هەلیکۆپتەر و کەپرت دەبینین، ئەمە ڕمێلان بوو، کە سەر بە پارێزگای #حەسەکە#یە لە ڕۆژئاوای کوردستان. بنکە سەربازییەکە 14 کیلۆمەتر لە سەنتەری شارەوە دوورە، هەر یەکەم خولەک ئاگاداریان کردینەوە، کە لەبەر ئاسایشی بنکەکە لە هەندێک شوێن بۆتان نییە وێنە بگرن، کەواتە من تەنیا باسی ئەوەتان بۆ دەکەم، کە ڕێگەیان پێداوم باسی بکەم.
لەگەڵ یەکێک لە سەربازەکان چووین بۆ ئەوەی جێگەی حەوانەوەمان پێشانبدات. کە لەنێو کابینەیەک بوو کە 7 ژووری تێدابوو، هەر ژوورێک دوو تەختی خەوی تێدابوو. تەختەکان زۆر بچووک بوون، بەتانی و سەرینیشیان لەسەر نەبوو.
رێستورانتەکەیان نانی بەیانیان و ئێوارانی هەبوو، پێنج دۆلارت دەدا دوو ژەم خواردنت دەخوارد، کە ئەویش چوار کەوچک برنج و سوپێکی خەستی قارچک و هێلکە بوو. سبەینان و ئێواران هەمان خواردن بوو. حەزم کرد خواردنەکەم دووبارە نەبێ، هەر هیچ نەبێ ژەمەکان پێکنەچن، زانیمان لەنێوان هەردوو بنکەی هێزی سەربازیی هاوپەیمانان و بنکەی هێزەکانی سووریای دیموکرات ڕێستورانتێک هەیە. لەگەڵ کۆلۆنێل ماری کلۆد ڕۆیشتم، کە ڕاوێژکاری پرسی جێندەرییە لەنێو هێزی هاوپەیمانان. لە هەولێرەوە لەگەڵمان هاتبوو. پێیگوتم تۆ وابیردەکەیەوە من خەم لە دووری منداڵەکانم ناخۆم؟
ریستۆرانتەکە خواردنی زۆرخۆشی لێبوو، من داوای پیتزایەکم کرد بە پەنیر، نرخەکەی 10 دۆلار بوو، گوتی چارەکێکی پێدەچێت، داوامکرد ڕێگەم بدەن بچمە نێو چێشتخانەکە بۆ ئەوەی هەندێک وێنە بگرم، ویستم خۆمیان پێ بناسێنم، هەر کە گوتم من دیدەم لە تۆڕی میدیایی ڕووداوەوە هاتووم، گوتیان بەڵێ دیدە خان دەتناسین، ئێمە سەیری بەرنامەی گفتوگۆی کچانمان دەکرد، هەرچەندە زۆر لە قسەکانت تێنەدەگەیشتین، بەڵام پێکەنینمان بە پێکەنینەکەت دەهات.
بەم قسانە زۆر دڵخۆشبووم، ئەوکاتە ئیدی هەستمکرد ئەو بەرنامەیە هەندێ خەڵکی لەو بارودۆخە ناخۆشەدا دڵخۆشکردووە، لەوانەش هەندێک کوردی ڕۆژئاوای کوردستان.
دەبووایە زوو خواردن بخۆین و بڕۆینە ئەو بەشەی کە هێزی هاوپەیمانی سووریای دیموکراتی لێیە، چونکە کاژێر چواری ئێوارە کولۆنێل مایلز کاگێنز کۆنفرانسێکی هاوبەشی ڕۆژنامەڤانی هەبوو لەگەڵ هێزی سووریای دیموکرات. بەر لە دەستپێکردنی کۆنفرانسەکە کاگێنز چایەکی لەگەڵیان خواردەوە و باسی کار و چالاکییەکانیانی کرد.
کولۆنێل مایلز کاگێنز هەر کەسێکی تەنیا یەک جاریش بینیبێ یان لە تۆڕە کۆمەڵایتییەکانەوە ئاشنای بووبێت دەیناسێتەوە. کاگێنز لە تۆڕە کۆمەڵایەتییەکاندا زۆر چالاکە و زۆر نزیکە لە خەڵک، لە هەر سەردانێکی یان چاوپێکەوتنێکی پێشووتر دەمبینی زۆر بەدواداچوونی بۆ ئەو کەسانە دەکرد کە هەڤپەیڤینیان لەگەڵ کردبوو، هەوڵیدەدا چەند وشەیەک بە کوردی یان عەرەبی بڵێت.
نزیکەی 25 بۆ 30 ڕۆژنامەڤان هاتبوونە پرێسکۆنفرانسەکە، بەشێکیان هاتن بۆ لام و وێنەیان لەگەڵ گرتم و دەیانگوت ئێمە بینەری بەرنامەی (نوورۆژ)ین لە فەیسبووکی ڕادیۆی ڕووداو و زۆر خۆشحاڵ دەبین ئەگەر سەردانی قامشلۆ بکەی، بەخۆمم گوت بڕۆمەوە هەولێر تەنیا سەیری بووڵتەنە کورمانجییەکانی ڕووداو دەکەم بۆ ئەوەی کورمانجییەکەم باشبکەم و ئیتر بە کورمانجی بەرنامە پێشکێش بکەم.
خۆشەویستی زۆریان پێدام، لە یەکەم ساتەوە لەگەڵ ئەوەی پێشتر پێیانگوتبووم من وەکو ڕاپەرێک قسە دەکەم، ئەوانیش بە زەحمەت لێم تێدەگەن. لە وێنەگرتن تەواو بووین و شەو شادمان لەیەکدی کرد. من نەمتوانی لەسەر ئەو سیسەم و ژوورە سێ مەتریەی کە سەرم بەر بنمیچەکەی دەکەوت بخەوم.
لە پێش دەرگای ڕێستۆرانتەکە پێویستیمان بە سەربازێک بوو، بۆ ئەوەی ڕێ لەو قەلە بگرێت کە لەوێ وەستابوو، تاوەکو بچینە ژوورەوە، چونکە تاوەکو ئەوکات بە دەگمەن خەڵکی سیڤیلی بینیبوو. بۆیە کە من و بەیاری بینی هێرشیکردە سەرمان و نەیهێشت بچینە ناو ڕیستۆرنتەکە.
پێیانگوتین ئەو قەلە سێ ساڵە لێرەیە، هەموو کات لە پێش دەرگای ڕێستۆرانتەکە بۆ خواردن دەوەستێ. دەیزانی سبەینان و ئێواران لەوێ خواردن هەیە.
ئەو ڕۆژە لەگەڵ چەند سەربازێک هەڤپەیڤینم هەبوو بۆ سپێشەڵ ڕیپۆرتەکە. باسی ژیانی خۆیان و کارەکەیان بۆ دەکردم. یەکێک لە پرسیارەکانم ئەوەبوو کە دوورن لە خێزانەکانیان چ هەستێکیان هەیە؟ لە سووریا خەڵک چییان پێدەڵێن؟ چەند کەسێکیان هاوژین و منداڵیشیان هەبوو، بێگومان پێیان قورسبوو، بەڵام وەکو خۆیان دەیانگوت هەموو شتێک لە ژیان بە دڵی خۆمان نابێ و خەڵک هەر گوێیان لە ناوی سووریا دەبێت، پێیاندەڵێن ئێوە زۆر ئازان، کە لەوێ کار دەکەن، بەڕاستی ناترسن؟
رەنگە ترس هۆکارێک بووبێ کە من نەتوانم ئەم سەرکێشییە بکەم و خۆشەویستی خەڵکی ڕۆژئاڤا لە نزیکەوە ببینم. ڕۆژانە، سەربازەکان لە چەند کاتێکی جیاوازدا بە سێ چوار ئۆتۆمبێلی سەربازی دەچوونە دەرەوە بۆ ئاگاداربوون لە بارودۆخی ناوچەکە. هەندێکیشیان سەرقاڵی کارە تەکنیکییەکان و ئەنجامدانی کاروباری ناوەوە بوون، وەک پاککردنەوە و چێشتلێنان، شەوانەش دەچوونە هۆڵی لەشجوانی.
هەر سێ بۆ شەش مانگ جارێکیش خولی ڕاهێنانی سەربازییان بۆ دەکرێتەوە. لەسەر قسەی کاگێنز کەمانچەکەم لەگەڵ خۆم بردبوو، شەوی پێش ڕۆژی گەڕانەوەمان کەمانچەکەم دەرهێنا و پارچە میوزیکێکم ژەنی. بە چاویاندا دیاربوو کە پڕ هەست و سۆزن. زانیم سەربازەکانیش زۆر پڕ هەستن و بەوجۆرە نییە کە بەشێک لە ئێمە بیریان لێدەکەینەوە، کە ڕەنگە پێمانوابێ سەرباز وەکو ڕۆبۆتە، هەر کارێک دەکەن دەرفەت نادەنە دڵیان، بەڵام جیاوازییەکە هەر ئەوەیە سەربازەکان زۆر بە دیسپلینن.
کاژێر 8:30ی بەیانی بوو کاتێک بەرەو هەلیکۆپتەرەکە دەڕۆشتین، سەربازەکان وەکو شارە مێروولە دەهاتنە بەرچاوم. گەڕانەوەمان جیاواز بوو، جیاوازییەکەش تەنیا ئەوە نەبوو کە من چیدیکە ئەو ترسەم نەما کە لە هەلیکۆپتەر هەمبوو، کاپتنەکەش جیاواز بوو، کچێکی گەنج و جوان و ژیر بوو.
ئێمە لە دوو بنکەی سەربازیی هێزی هاوپەیمانی وەستاین لە تلتەمر و شەدادی، هەندێ سەرباز دابەزین و هەندێ سەربازی دیکە لەوێ سەرکەوتن. کاژێر 1:30ی دوای نیوەڕۆ گەیشتینەوە فڕۆکەخانەی هەولێر.
لەوێ، لە بنکەی سەربازی هاوپەیمانان، وێنەمان گرت. کاگینز لەم بەشەدا باسی ژیانی تایبەتی خۆی بۆ کردم. پرسیارم لێکرد ئایا پلانی داهاتووی چییە لە دوای مانگی نۆ کە ساڵێک تێدەپەڕێت بەسەر دەستبەکاربوونیدا وەک گوتەبێژی هێزی هاوپەیمانان.
کاگینز لە بنەماڵەیەکی سەربازیدا گەورەبووە. لە تەمەنی حەڤدە ساڵییەوە لە نێو سوپای ئەمریکا بووەتە سەرباز و لە بنەماڵەیەکی سەربازییەوە هاتووەتە دونیاوەو کچێکی تەمەن 24 ساڵی هەیە.
کاگینز خۆشحاڵی خۆی دەربڕی بەرامبەر ئەو چەند ڕۆژەی لەوێ بووین. ئێمەش زۆر پرسیاری گشتی و تایبەتیمان لێکرد. وەک زۆر جاری دیکە لە کۆتایی هەڤپەیڤینەکانیدا لە ڕووداو بە کوردی سوپاسی کردین.
وردەکارییەکانی ئەم سەردانەی تیمی ڕووداو بۆ بنکەی سەربازیی هاوپەیمانان لە ڕۆژئاوای کوردستان لە سپێشەڵ ڕیپۆرتێکدا سەبارەت ژنانی نێو هێزی هاوپەیمانان و فیچەرێکی تایبەت لەسەر گوتەبێژی هاوپەیمانان بەم زووانە دەبینن.[1]