ڕاگەیەندراوێک بۆ ڕای گشتیی
بەناوی خوای بەخشندەی میهرەبان
ئەمڕۆ چوار شەممە 15 ی تەموزی 2020 پەرلەمانتاری فراکسیۆنمان بەڕێز (#سۆران# عومەر) نامەی دەستلەکارکێشانەوەی ئاراستەی سەرۆکایەتيی پەرلەمانی کوردستان کرد.
بەم بۆنەیەوە وەک فراکسیۆنی کۆمەڵ دەمانەوێت چەند ڕاستییەک بۆ ڕای گشتیی خەڵکی کوردستان و دەسەڵاتی سیاسیی هەرێم بخەینەڕوو :
1. دەستلەکارکێشانەوەی هەر پەرلەمانتارێک مافێکی سەرەتایی و ئاسایی خۆیەتی و بڕیارەکەی کاک سۆران عومەریش (ئەگەرچی دڵخوازی ئێمە نەبوو) ڕێزلێگیراوە، بەڵام دەبێ ئەوەش بڵێین بەڕێزیان دوای ڕاوێژ لەگەڵ ئەنجوومەنی سیاسیی بەو بڕیارە گەیشتووە.
2. کاک سۆران پەرلەمانتارێکی چالاک بووەو لە ڕابردووشدا و لە پێناو دڵسۆزی بۆ کارەکەی و خەمخۆری بۆ خەڵک، کاری زۆری کردو ئێمە سوپاسی دەکەین و پێزانینی تەواومان بۆ کارو ماندوبوونی بەڕێزیان هەیەو بۆ داهاتووش سەرکەوتنی بۆ دەخوازین.
3. بەداخەوە لەسەرەتاوە ئەم کەیسەی کاک سۆران بۆ مەرامی حزبیی و شەخسیی هەم بەلاڕێدا برا هەم زیاد لە قەبارەی خۆی گەورەکرا، کە ئەمە سەرەتایەکی ترسناک و خراپە لەکاری پەرلەمانیی و پرۆسەی سیاسیی و دەرەنجامی خراپی دەبێت.
4. ئێمەو خەڵکی کوردستان تەمەننامان دەکرد لەبری سەرکوتکاری و بێدەنگکردنی خەڵک و نوێنەرەکانیان، لێپرسینەوە لەو لەشکرو تۆڕە ڕێکخراوانەی گەندەڵیی بکرایە کە 29 ساڵە سامانی گشتیی هەرێم و ماڵی خەڵک تاڵان دەکەن و لە پاڵ دەسەڵاتدا هەریەک لەوانە بوونەتە کارەسات بۆ ژیان و گوزەرانی خەڵک.
5. تەئکید دەکەینەوە کە پەرلەمان پێویستە شوێنی داکۆکیکردن بێت لە مافی خەڵک و چاودێر بەسەر حکوومەتەوەو، لێناگەڕێین ئەم دەزگا نیشتمانییە وەک بارەگای حزب مامەڵەی لەگەڵ بکرێت و دڵنیاشبن بەردەوام دەبین لە بەرگری کردن لەمافی خەڵک و بەگژداچوونەوەی ستەم و گەندەڵیی تا ئەم سەردەمە تاریکە کۆتایی پێدێت !
لە کۆتاییدا ئەو ڕاستییە دووپاتدەکەینەوە، نابێ بەگرێی دەرونیی و ڕقی شەخسیی و حزبیی مامەڵە و حوکمڕانیی بکرێ، ئەگەرنا دەرەنجام زیانی گەورەی بۆ خەڵک و کۆمەڵگاو حوکمڕانان لێدەکەوێتەوە...
فراکسیۆنی کۆمەڵ
لە پەرلەمانی کوردستان
15 ی تەموزی 2020
#هەولێر#