ڕۆژی 09-11-2019 دامەزراوەی پاڵپشتی کوردستان، سیمینارێکی لەبارەی هەڵسەنگاندنی دۆخی ژیانی کورد لە ڕۆژهەلاتی کوردستان بەڕێوەبرد.
=KTML_Bold=ئەهوەن چیاکۆ، =KTML_End= ئەندامی بەڕێوەبەری کۆمەڵگەی دیموکراتیک و ئازادی ڕۆژهەڵاتی کوردستان- کۆدار، تێڕوانینی پژاکی بۆ چارەسەرکردنی کێشەکانی ڕۆژهەڵاتی کوردستان لەگەڵ بەشداربووان تاوتوێ کرد.
چیاکۆ ئاماژەی بەوە کرد، پێویستە بۆ شیکردنەوە و تێگەیشتنێکی ڕاست لەسەر پرۆژەی تێکۆشانمان دوو قۆناخ دیاری بکەین و وتی: یەکەم، قۆناغی هەنووکەیی کە قۆناخی تێکۆشانە بۆ ئازادی و ڕزگاری وڵاتەکەمان. دوومیش، قۆناغی داهاتوو کە قۆناغی شێوازی بەڕێوەبەری کۆمەڵگایە.
لە درێژەی گوتارەکەیدا ئەهوەن باسی لەوەش کرد، پێویستە گۆڕەپانەکانی خەبات لە بواری پانتایی جوگرافی و مرۆیی، دیاری بکرێت، بۆ ئەو مەبەستەش ئاماژەی بەم خاڵانە کرد.
1- گۆڕەپانی یەکەمی خەبات و تێکۆشانی ئێمە، ڕۆژهەڵاتی کوردستانە، بۆ ڕزگارکردنی لە داگیرکاری لە لایەن دەوڵەت نەتەوەی ئێرانییەوە.
2- گۆڕەپانی دووەمی خەبات و تێکۆشانی ئێمە، کوردستان بە گشتییە کە هەر بەشێکی لەلایەن داگیرکەرێکی تری هەرێمەکەوە داگیرکراوە. لەبەرئەوەی کورد یەک نەتەوەیە و کوردستانیش وڵاتێکە لە چوارچێوەی سیاسەتی داگیرکەریدا، لەیەک دابڕێندراوە و پارچە کراوە، لەو چوارچێوەیشدا خەباتی یەکێتی نەتەوەیی بۆ ئێمە خەباتێکی ستراتیژیە.
3- گۆڕەپانی سێیەمی خەبات و تێکۆشانی ئێمە، یەکگرتن بۆ تێکۆشانە لەگەڵ گەلانی دراوسێماندا، بەتایبەت گەلانی تری داگیرکراوی دەوڵەت-نەتەوەی ئێرانی وەک 'عەرەب، بەلوچ، ئازەری، تورکمان، لوڕ، گیلەک، مازنی و...'، تەنانەت فارسیش. بۆ ئەوەش هێزێکی چالاکی پلاتفورمی دیموکراتیکی گەلانی داگیرکراو لەلایەن دەوڵەت-نەتەوەی ئێرانەوە بە ناوەندیەتی زمان و ئتنیکی فارسین.
4- گۆڕەپانی چوارەمی خەبات و تێکۆشانی ئێمە، پانتایی جیهانییە لە چوارچێوەی تێکۆشانی هاوبەش لەگەڵ سەرجەم گەلان و کۆمەڵگا و تاکەکانی جیهان بۆ ئازادی، یەکسانیی، دادوەریی، ئەوەش بە مەبەستی گەیشتن بە جیهانێکی ئازاد، یەکسان و دادوەر.
دواتر ئەهوەن چیاکۆ، ئاماژەی بە پرۆژەیەکی 10 مادەیی کرد کە هەنگاوی پراکتیکی پارتی ژیانی ئازادی کوردستان بۆ بەدەستهێنانی یەکێتی نەتەوەیی، نیشتیمانی و کۆمەڵایەتی ڕۆژهەڵاتی کوردستانە.
چیاکۆ لە بەشی کۆتایی وتەکانیدا ئاماژەی بە فراوانکردنی هاوئاهەنگی لەگەڵ خەباتی ئازادیخوازانەی پارچەکانی دیکەی کوردستان کرد بە مەبەستی بەهێزکردنی خەبات لە هەموو بەشەکان و پەرەپێدانی چالاکییەکان بۆ تێکۆشانی هاوبەش لەگەل گەلانی دیکەی ژێر ستەمی ڕژێمی داگیرکەری ئێران.[1]