- (من یاری دنیای ڕەنگاوڕەنگ و نەیاری دنیای ڕەشوسپیم) ڕەنگاوڕەنگییش جیاوازی ئەخوازێ و ڕەشوسپیش سڕینەوە، من شاسوارو پرۆژەکەیم بەدڵ نیە، چونکە نەفەسێکی تری سڕینەوەو ڕەشوسپیکردنی دنیای ئێمەیە.
بەڵام کاتێ خۆی بکەوێتە بەردەم حەملەی سڕێنەوە، من بەرگری لێئەکەم، چونکە ئەویش ڕەنگێکی ناو وێنەکەیەو فرەیی جێ ی ئەویشی تیائەبێتەوە، ئەگەرچی خۆی فرەیی نافامێ و بە ڕەنگێک ڕازی نیەو کۆی وێنەکەی ئەوێ! بەهەرحاڵ لێرەدا من بەرگری لە فرەیی و جیاوازی و ڕەنگاوڕەنگیی ئەکەم، نەک لەمو لەو.
- کاری ئێمە ئەوەنیە عاتفییانە تەبرییەی کابرا بکەین یان ڕقاوییانە تاوانباری بکەین، وەکچۆن حوکمدان کاری ئاسایش نیە، کاری منو تۆش نیەو تەنیا کاری دادگایە.
هەڵوێستی دروست بەرگریکردنە لە سەروەری یاساو شکۆی دادگاکان، نەک بەرگریکردن لە کەسێک کە ئەشێ تاوانباربێت، نەک تۆڵەکردنەوە لە کەسێک کە ئەشێ بێتاوان بێت.
- دادگاکان بە هەردوو دیوا بەکارئەهێنرێن و یاسا لە هەردوو لاوە پێشێل ئەکرێ، ئەوە ڕاست نیە کە تەنیا دەسەڵاتدار بەکاریان بهێنێ!
تۆ حەقێکی من ئەخۆیت و موعارەزەیت، من هەرکات داوای ئەم حەقە بکەم، تۆ ئەڵێ ی ئەمە کەیسێکی سیاسییەو یاسایی نیە! دەی ئەمە دیوەکەی تری لاقەکردنی دادگایە.
ئەسڵەن ئەوەی موعارەزە خراپتریشە، چونکە کاتێ دەسەڵاتدار دەسەڵاتی خراپ بەکارهێنا، مەفروزە موعارەزە بۆ لابردنی ئەو بەکارهێنانە خراپە هاتبێ، نەک بۆ ئەوەی ئەویش بە شێوازی خۆی بەکاریبێنێ.
- (نیوعەدالەت) هەنگاوێک نیە بەرەو عەدالەت، بەڵکو هەر مانەوەیە لە ناعەدالەتیدا!
کاتێ گەندەڵێک ئەبرێتە بەردەم دادگا، ئەمە ڕەوایە، بەڵام کاتێ هاوشێوەکانی لە دەرەوە ئەسوڕێنەوە، ئیتر ئێمە ناعەدالەتییەکمان خستۆتە سەر ناعەدالەتییەکانی تر.
کاتێ گەندەڵی گەورەو دەسەڵاتدار، گێچەڵ بە گەندەڵی بچوک و بێدەسەڵات ئەکات، ئەمە پرۆسەی چەسپاندنی ستەمکارییە نەک پرۆسەی چەسپاندنی یاسا.
- نە ئاڵای کوردستان پاساوی گەندەڵییەکانی نەجمەدینە، نە موعارەزەبوون پاساوی پۆخڵەواتی پێشتری گۆڕان و ئێستای نەوەی نوێ یە.
ئاڵا بە داکشانی فەساد بەرزو شەکاوەیە، نەک بە نمایشی هەڵکردنی لەلایەن گەندەڵەکانەوە.
موعارەزەبوونیش لە دۆخی فەساددا، ئەوەیە کە موعارەزە خۆی گەندەڵ نەبێت، نەک ئەوەی کە گەندەڵی دەسەڵاتمان پیشان بدات.
ئاخر گەندەڵی پارتی و یەکێتی خۆی دیارەو ئەیبینین، کەچی موعارەزە هاتووە ئەم شتە دیارەمان پیشان بدا! ئا لێرەدا موعارەزەی ئێمە تەواو زیادەو ناپێویستە.
- نە سیناریۆی ستەمکردن و غەدرکردن لە کەسەکان لەپشتی دادگاوە، نە سیناریۆی فووتێکردن و بەپاڵەوان کردنی کەسەکان لەسەر حسابی دادگا!
بەڵکو پەڕینەوە لە درۆو سیناریۆی شتەکانەوە، بۆ ڕاستەقینەی ئازادی و یاساو سیاسەت و کۆی شتەکان.
ئێمە لە هەموو کایەکانی تردا خەریکی نمایش و سیناریۆین، کەچی لە خودی نمایش و سیناریۆی درامادا فەشەلمان هێناوە، ئەوەش نوکتەیە ها[1].