نێزیکی هەفتییەکە، بهایێ زێری ب رەنگەکێ بەرچاڤ بلندبوویە، ل بازارێ #دهۆک# بهایێ ئێک گرام زێری عەیار 22 ب 51 هزار دینارێن ئیراقییە.
ل دهۆک، وەک نەریت، بگشتی ل دەمێ پێکئینانا خێزانێ زاڤا ب هایێ 10-30 هزار دولاران زێران بۆ بووکێ دکریت، لەورا ل دەمێ گرانبوونا بهایێ زێری، کاریگەرییەکا راستەوخوە لسەر پێکئینانا خێزانان ل دهۆک چێدبیت.
فەرەج جەمیل، جڤاکناس، بۆ دواڕۆژ گۆت:جڤاکێ دهۆک بۆ پێکئینانا خێزانێ مفا ژ پێشکەڤتن و شارستانی جیهانا ڤی سەردەمی نەوەرگرتینە، پێکئینانا خێزانێ واتە درووستکرنا ژیانێ نەک بازرگانی کرن ب زێری و پارەیی.
ناڤبۆری ئەگەرێن کرینا گەلەک زێران ژی دانەزانین:کچ گەلەک زێران دکەتە مارەبڕین، ئەگەر ل پاشەڕۆژێ راستی ئاریشەکێ بوو دا بشێت وان زێران ژ هەڤژینێ خوە وەرگریت، گەلەک جاران ژی کچ بۆ خوە مەزنکرنێ گەلەک زێران دخوازن، کور ژی گەلەک جاران وەک فێلکرن دگەل کچکێ رێککەڤتنێ دکەن و گەلەک زێران دکرن و پارێن زێران ژ بابێ کورکی وەردگرن و پشتی دەمەکی ژ ئاهەنگا خوە وان زێران بۆ مەرەمەکا دی دفرۆشن.
لدۆر ڤێ مژارێ ئەحمەد بەرواری، زێرنگرێ ل بازارێ دهۆک گۆت:گەلەک زێرێ ژ وان دهێتە کرین بۆ ئاهەنگێن بیک و زاڤایانە، دەمێ زێر گران دبیت، رێژەکا کێم یا زێری دهێتە کرین، یان کرین گەلەک کێم دبیت، لەورا گرانبوونا زێری ل ڤان رۆژان دێ کاریگەریەکا خراب لسەر بازارێ فرۆتنا زێری چێکەت.
بەرواری زەلالکر:نوکە ل بازارێ دهۆک زێرێ عەیار 21 ب 50 هزار دیناران و زێرێ عەیار 22 ب 51 هزار دیناران دهێتە فرۆتن.
لدووڤ زانیاریێن دواڕۆژ پتریا ئه و زێرێ دهێت هەرێما کوردستانێ و دهۆک ب رێیا بالەفڕگەها #هەولێر# ژ وەلاتێ ئیماراتێن ئێکگرتیێن ئەرەبی دهێت.