لەماوەی 13 ساڵی ڕابوردوودا، تەنیا 81 پڕۆژەی وەبەرهێنان لە بوارەکانی کشتوکاڵ و تەندروستیی هەرێمی کوردستاندا کراوە، لەکاتێکدا ساڵانە هەرێم پێویستی بە ملیارێک و 500 ملیۆن دۆلار هەیە بۆ کارکردن لە پڕۆژەکانیدا.
بەپێی ئامارێکی دەستەی وەبەرهێنانی هەرێم، لەماوەی 13 ساڵی ڕابوردوودا (1ی ئابی 2006 تا 1ی ئابی 2019)، 30 پڕۆژە لە کەرتی کشتوکاڵدا ئەنجامدراون، لەوانەیش 13 پڕِۆژەیان لەلایەن وەبەرهێنانی #هەولێر# و 4 پڕِۆژەی دیکەیان لە لایەن وەبەرهێنانی #سلێمانی# و 4 یشیان لەلایەن وەبەرهێنانی #دهۆک# و 9 پڕِۆژەی تریان لەلایەن دەستەی وەبەرهێنانەوە مۆڵەتیان پێدراوە.
بەگوێرەی ئامارەکە، لەماوەی 13 ساڵی ڕابردوودا (848) ملیۆن و (890) هەزار دۆلار بۆ پرۆژەکان لەسەر ڕووبەری نۆ هەزار و 904 دۆنم دووجا زەوی خەرجکراوە.
هەر لە 13 ساڵی ڕابوردوودا، 51 پڕِۆژە لە بواری تەندروستی ئەنجامدراوە کە نۆ پڕِۆژەیان وەبەرهێنانی هەولێرو پڕۆژەیەکیان وەبەرهێنانی سلێمانی و 10 پڕِۆژەیان وەبەرهێنانی دهۆک و31 پڕۆژەی دیکەشیان دەستەی وەبەرهێنانی هەرێم مۆڵەتیان پێداون و جێبەجێکراون. پرۆژەکان لەسەر ڕووبەری 281 دۆنم دووجا زەوی و بە تێچووی 982 ملیۆن و 230 هەزار دۆلار و ئەنجامدراون.
بڕیارە لەدوای پەسەندکردنی پڕۆژەی چوارساڵی وەزارەتەکان و ڕێککەوتن لەگەڵ حکومەتی عێراق بۆ ماوەی سێ ساڵی دیکە، دەست بە جێبەجێکردنی پڕۆژە ستراتیژیەکانی هەرێم بکرێتەوە.
زاگرۆس فەتاح بەڕێوەبەری گشتی پلانی پڕۆژەکان لە وەزارەتی پلاندانانی هەرێم، بۆ دواڕۆژدەڵێت: بۆ جێبەجێکردنی پڕۆژەکانی بودجەی وەبەرهێنان، ساڵانە حکومەت پێویستی بە ملیارێک و 500 ملیۆن دۆلار هەیە، بەمەیش چەندین هەزار هەلی کار دەڕەخسێنرێت.
زاگرۆس وتیشی: له ماوەی چوار ساڵی ڕابوردوودا پارەیەکی کەم بۆ پڕۆژەکانی خزمەتگوزاریی خەرجکراوە. بەڵام بۆئەوەی بتوانین ئاستی خزمەتگوزارییەکان بگەیەنینە قۆناغی پێشوو دەبێت پارەیەکی باش خەرجبکرێت، بۆ ئەمەیش ئەولەویەتی حکومەت بۆ پڕۆژەکان، کە دەست پێبکاتەوە، لە سێکتەرەکانی ئاو و ئاوەڕۆ و کارەبا و تەندروستی و پەروەردە و کشتوکاڵ دەبێت.[1]