“#سنە#ی جوانتر و ئاویەری بەزوبڵندترکردووە”
لەدونیای ئەدەبی و ڕوناکبیری ئێمەدا زۆرن ئەو کەسانەی کە جێگای تایبەتیان هەیە، بوون بە بەشێک لە یادەوەری و بیرکردنەوەی نەتەوەیەک، هەندێک لەوانەی ناو و نازناو ئاوازیان بوونەتە ووردی سەرزمان و بەستەو مەقاماتەکانیان نەوە بە نەوە لەهزر و بیرکردنەوەی تاکەکاندا دەزرنگێتەوە، هەربۆیە پێویستە وەک پاشخانێکی ئەدەبی و فکری گەورە مامەڵەیان لەگەڵ بکرێت.
هونەری نوخبە، بەوجۆرە لە هونەر دەناسرێت کە کۆمەڵێک تایبەتمەندی خۆی هەیە کە جیایدەکاتەوە لەهونەرەکانی دیکە، کاریگەری لەسەرهەست و بیرکردنەوەی تاکەکانی کۆمەڵگا لەسەردەمەکەی خۆی و لە دوور مەوداشدا بەجێ دەهێڵێت، دەکرێت بوترێت هونەرێکی ئاڤانگارد (Avant-Gard) یە کە دەتوانێت جۆرێک لە نوێگەری لەرووی تەکنیکی و شێوازی کارکردن بەرهەم بینێت، ڕووبەروی هەموو ئەو شێوازە هونەرە تەقلیدیانەی دیکە بێتەوە کە بوونیان هەیە.
ئەمەش ئەم جۆرە لە هونەر لە هونەری دیکە جیا دەکاتەوە، لەوانەش هونەری گشت پەسەند، ئەم جۆرە لە هونەر کۆی گشتی کۆمەڵگا گوێبستی دەبێت، جەماوەرێکی زۆری کۆمەڵگا لەدەوری کۆدەبێتەوە، بەڵام دونیابینیەکی کورتی هەیە و لەماوەیەکی زەمەنی دیاریکراودا دەمێنێتەوە هەرئەوەش وادەکات کە ئەم جۆرە هونەرە لەدورمەودا لەهزری و بیرکردنەوەی تاکەکانی کۆمەڵگادا نامێنێت وون بێت، دونیای مۆسیقاو هونەری کوردیش پڕیەتی لەم جۆرە هونەرە.
مەزهەری خالقی، نموونەیەکی جوانە لە هونەری نوخبە یان هونەری ئاڤانگاردی، ئەم هونەرمەندە گەوهەرێکی گەورەیە کە دونیای ئەدەبی ئێمەی دەوڵەمەندکردووە، ئەو ئەستێرەیە کە بەردەوام لە زهنی ئێمەدا بەگەشاوەی دەمێنێتەوە، ئەو بولبولەیە کە جیاواز لەوانی دیکە دەچڕێت، ئەو ئەڵماسەیە کە هەمیشە و لەدوورەوە دەبریسکێتەوە.
خالقی، دەنگ و ئاوازی ڕەسەنی کوردیە، بەوستایلە و ئاوازی نەرمەی کە هەیبوو سەردەمی خۆی تێپەراند و دونیایەکی نوێ لە شێوازی وتنی گۆرانی هێناوەتەوە ئاراوە، هەر ئەوەش وایکردووە کە توانیویەتی لە هزری کۆی گشتی نوخبەی کۆمەڵگادا جێگای خۆی بکاتەوە، ڕووبەڕووی هەموو ئەو ستایلە تەقلیدی و هونەری عامیانە (گشت پەسەند) دانەی دیکە بێتەوە، جێگایەکی بەرز و باڵا لە مێژووی هونەری کوردیدا داگیربکات.
لە ئێستادا بەستنی کۆنگرەی ناودارانی کورد لەشاری سنە هێندەی تری سنەی جوانترو ئاویەری بەرز و بڵندتر کردووە، دوای 35 ساڵ گەرانەوەی مەزهەری خالقی بۆ سنە، شادبوونەوەی بە زێد و نیشتمانی هەمیشەیی خۆی، ئاویەر فرمێسکی شادی دەرێژێت، پەیکەری مەولەوی لە ئامێزدا سرودی نیشتمانی دەچرێت، مەیدان (اقبال) جمەی دێت لە ئازیزان بۆ لەباوەشگرتنی ئەم هونەرمەندە گەورەیە.
دیاریکردنی کەسایەتیەکی گرنگی وەک مەزهەری خالقی و بەختیار عەلی لە باشووری کوردستان وەک دوو کەسایەتی هونەری نوخبە لە بواری مۆسیقا و نوسینی ڕۆماندا گرنگیەکی تایبەتی هەیە، چونکە یادەوەری نەتەوەیەک شانازیان پێوە دەکات، خەرمان و کەلتوری ئەدەبی هونەری کوردی دەوڵەمەندتر دەکەن.
ئیسماعیل عوسمان