گەریلاکانی #هەپەگە#\یەژا ستار گورزی تووندیان لە سوپای تورکی داگیرکەر دا. هەپەگە ڕایگەیاند، 26 سەرباز کوژران، 2 ئۆتۆمبێلێکی زرێپۆش تێکشکێنران و گورزیش لە کۆپتەرێک درا.
ناوەندی ڕاگەیاندنی هێزەکانی پاراستنی گەل (هەپەگە) دەربارەی چالاکییەکانی گەریلا ئەمڕۆ ڕاگەیەنراوێکی بڵاوکردەوە کە ئەمە دەقەکەیەتی:
لە چێوەی هەڵمەتی شۆڕشگێڕیی شەهید باگەر و شەهید ڕۆنیا-دا، چالاکییەکانی هێزەکانمان دژبە سوپای تورکی داگیرکەر بەردەوامن. هێزەکانمان گورزی قورسیان لە داگیرکەران دا:
چالاکیی سابوتاژ لە گردی شەکیف
ڕێکەوتی 24ی حوزەیران\3ی پووشپەڕ کاتژمێر 10 هێزەکانمان لە گردی شەکیف-ی هەرێمی خواکورک دژی یەکینەکانی ئۆپەراسیۆنی سوپای تورکی داگیرکەر چالاکییەکی سابوتاژیان ئەنجام دا. لەم چالاکییەدا زۆر سەربازی دوژمن کوژران و بریندار بوون بەڵام ژمارەیان ڕوون نەبووەتەوە. دوای چالاکییەکە سوپای تورکی داگیرکەر بە کۆپتەری سکۆرسکی سەربازە کوژراو و بریندارەکانی لە شوێنەکە گواستەوە.
2 ئۆتۆمبێلی زرێپۆش تێکشکێنران و 23 سەرباز کوژران
لە هەمان ڕۆژدا سوپای تورکی داگیرکەر دەیویست لە دەراڤا خەزالکێی نێوان جۆلەمێرگ و چەلێ دەست بە ئۆپەراسیۆن بکات. یەکینەکانی دوژمن لە ناوچەکە کەوتنە ژێر چاودێریی هێزەکانمان. پاش ماوەیەکی درێژ چاودێریکردن، کاتژمێر 20:30 بوونە ئامانجی هێزەکانمان. لەم چالاکییەدا هێزەکانمان لە دوو قۆڵەوە لە ئۆتۆمبێلێکی زرێپۆشی جۆری کرپی-یان دا و تێکیان شکاند. دوای چالاکییەکە ئۆتۆمبێلێکی زرێپۆشی جۆری کۆبرا-ش هاتە ناوچەکە و لە لایەن هێزەکانمانەوە لە دوو قۆڵەوە کرایە ئامانج و تێکشکێنرا. چەندین ئۆتۆمبێلی دیکەی زرێپۆش کە بوونەتە ئامانجی هێزەکانمان لە ناوچەکە هەڵاتوون. لەم چالاکییەدا 2 ئۆتۆمبێلی زرێپۆش تێکشکێنران و 23 سەربازی دوژمن کوژران. هێزەکانی دوژمن هەتا شه و بە هاوکاری فڕۆکە ئاسمانییە بێ فڕۆکەوانەکان سەربازە کوژراو و بریندارەکانی خۆیان لە ناوچەکە دەرخستووە و بەرەبەیانیش پاشماوەی ئۆتۆمبێلەکانیان گواستووەتەوە.
2 سەرباز لە گەڤەر کوژران
لە 25ی حوزەیران\4ی پووشپەڕ کاتژمێر 8:30 هێزەکانمان لە دژی سەربازانی سەر گردی عەلی شێر-ی سەر بە ناوچەی گەڤەری پارێزگەی جۆلەمێرگ چالاکییەکیان ئەنجام دا. لە سەنگەر و پەناگەکانی دوژمنیان دا و 2 سەرباز کوژران.
گورز لە کۆپتەرێک درا
لە هەمان ڕۆژدا کاتژمێر 12:30 هێزەکانمان دوو کۆپتەری جۆری کۆبرا-یان کردە ئامانج کە لە چەلێ-وە بەره و جۆلەمێرگ دەچوون. هێزەکانمان لە کۆپتەرێکیان داوە. کۆپتەرەکە گورزی بەرکەوتووە و ناچار بووە لە ناوچەکە بکشێتەوە.
چالاکی لە #شەمزینان#
هەمان ڕۆژ کاتژمێر 13 هێزەکانمان لە دژی سەربازانی تورکی داگیرکەر لە دەڤەری دەریێ پەنا گۆڤەندێ لە سنووری ناوچەی شەمزینان چالاکییەکیان ئەنجام دا. لەم چالاکییەدا سەربازێکی دوژمن کوژرا.
هاوکات لەگەڵ ئەم چالاکییەی هێزەکانمان، کاتژمێر 13:15 لە دژی یەکینەکانی سوپای تورکی داگیرکەر لە گردی خوەدێی ئاڤاشین چالاکییەکیان کرد. ڕوون نەبووەتەوە لەم چالاکییەدا چەند سەرباز کوژران و بریندار بوون.
بەهۆی بۆردومانەکان ئاگر لە دارستان کەوتەوە
دوای ئەم چالاکییانە سوپای تورکی داگیرکەر بە ئۆبوس و هاوەن لە ناوچەکەیان داوە. بەهۆی بۆردومان ئاگر لە دارستان کەوتووەتەوە. یەکینەکانی ئێمە کە چالاکییان کردووە، بەسەلامەتی گەیشتوونەتەوە بنکەکانی خۆیان.
ئۆپەراسیۆن لە هەرەکۆل
ڕێکەوتی 20ی حوزەیران\30ی جۆزەردان سوپای تورکی داگیرکەر لە ناوچەی هەرەکۆل-ی شاری سێرت دەستی بە ئۆپەراسیۆنی داگیرکاری کردووە. لە 21ی حوزەیران\31ی جۆزەردان کاتژمێر 10 فڕۆکە جەنگییەکانی سوپای تورکی داگیرکەر و کۆپتەرەکانی بۆردومانی ناوچەکانی بێمەرەش، شەهید جانخۆرت، شاشک و کوناڤێیان کردووە. دوای بۆردومانەکە سوپای تورکی داگیرکەر بە کۆپتەر سەربازیان لە ناوچەکە دابەزاندووە و دەستیان بە گەڕان و پشکنین کردووە. ڕۆژی 22ی حوزەیران\1ی پووشپەڕ کاتژمێر 12 بەبێ ئەنجام پاشەکشەیان کردووە. دەوڵەتی تورکی داگیرکەر لە ڕێی مێدیاکانییەوە بانگەشەی شەهیدبوونی 6 گەریلای کردووە. ئەم هەواڵە درۆیە و بەشێکە لە شەڕی تایبەت. پێویستە گەلەکەمان و ڕای گشتی گوێ نەدەنە هەواڵی درۆ. لە ئۆپەراسیۆنەکەدا هیچ زیانێک بە هێزەکانمان نەگەیشتووە.
لە ئەنجامی هێرشی ئاسمانی 3 گەریلا شەهید بوون
ڕۆژی 22ی حوزەیران\1ی پووشپەڕ سوپای تورکی داگیرکەر لە سنووری گوندی قەنجا-ی ناوچەی تەتوان-ی بەدلیس دەستی بە ئۆپەراسیۆن کردووە. هەمان ڕۆژ فڕۆکە جەنگییەکانی سوپای تورکی داگیرکەر کاتژمێر 21:30 بەچڕی بۆردومانی ناوچەکەیان کردووە. له و بۆردومانەدا 3 هاوڕێمان شەهید بوون. زانیاری دەربارەی ناسنامەی هاوڕێیانی شەهید دواتر بۆ ڕای گشتی بڵاودەکەینەوە.
لە چەمچە کۆنترایەک سزا درا
ڕۆژی 22ی حوزەیران\1ی پووشپەڕ هێزەکانمان لە دەڤەری چەمچە-ی سەر بە ناوچەی قاخزمان-ی قەرس کۆنترایەکیان بە ناوی سلێمان گولدەرە بە سزا گەیاندووە. ئەم کەسە کە لەگەڵ دەوڵەتی تورکی داگیرکەر کاری دەکرد، ساڵی 2010 لە ناوچەی قاخزمان-ی قەرس دەستی هەبووە لە شەهیدبوونی هاوڕێیانمان فورات موونزوور (گۆکمان ئاکپۆلات) و هاڕوون شیار (عەلی جیلۆ). دوای چالاکییەکە سوپای تورکی داگیرکەر بە کۆپتەری سکۆرسکی سەربازی هێناوەتە ناوچەکە و تەرمی کۆنترا (ئەندامی هێزی دژەگەریلا)کەیان هەڵگرتووەتەوە. مێدیای تورکی داگیرکەر لە هەواڵەکانیدا ئه و کەسە وەک شوان و وەک کەسێکی بێ تاوان دەناسێنێت. ئەمە ڕاست نییە. کەسانی هاوشێوەی ئه و کۆنترایە کە لە شەهیدکردنی هاوڕێیانی ئێمەدا ڕۆڵیان هەبێت لە هەر شوێنێک بن سزای پێویست دەدرێن.
فڕۆکە جەنگییەکان بۆردومانی هەرێمەکانی پاراستنی مەدیایان کرد
فڕۆکە جەنگییەکانی سوپای تورکی داگیرکەر لە دژی هەرێمەکانی پاراستنی مەدیا هێرشی ئاسمانییان ئەنجام دا. لەم چوارچێوەیەدا:
ڕۆژی 24ی حوزەیران\3ی پووشپەڕ فڕۆکە جەنگییەکان لەنێوان کاتژمێر 11 و 12ی شەودا بۆردومانی دەشتی کافیە-ی هەرێمی گارەیان کرد.
ڕۆژی 25ی حوزەیران\4ی پووشپەڕ فڕۆکە جەنگییەکان کاتژمێر 8 بۆمبارانی ناوچەی خنێرە-ی خواکورک، کاتژمێر 8:30 و 12 بۆردومانی گردی #هەکاری#ی هەرێمی مەتینان-یان کرد.
ڕۆژی 26ی حوزەیران\5ی پووشپەڕ (ئەمڕۆ) کاتژمێر 7:30 فڕۆکە جەنگییەکان بۆردومانی ناوچەی کێلەشین-ی هەرێمی خواکورک-یان کرد.
له و بۆردومانانەدا هیچ زیانێک بە هێزەکانمان نەگەیشتووە.[1]
#26-06-2019#