شارەکانی نێرگز دەبێتە زنجیرە کۆنسێرت لەلایەن هیوا سەڵاح
ئەو کۆنسێرتە کە لەلایەن تۆڕی میدیایی ڕووداوەوە ڕێکخرابوو
رووداو- #هەولێر#
قەڵای دێرینی هەولێر هەرگیز ئەم جۆش و خرۆشەی بەخۆیەوە نەبینیوە، ڕەنگ و میوزیک و مێژوو ئاوێتەی یەکدی بوون. 10 ژەنیاری ناوداری جیهانی لە حەوت وڵاتەوە لە ماوەی دوو سەعاتدا قەڵایان پڕ کرد لە میوزیک.
ئەو کۆنسێرتە کە لەلایەن تۆڕی میدیایی ڕووداوەوە ڕێکخرابوو، بە ڕابەرایەتی نەسیر شەممە، میوزیکژەنی نێوداری جیهانی بەڕێوەچوو.
هەزاران ساڵە قەڵای هەولێر بەپێوە وەستاوە و شاهیدی سەدان ڕووداوی گرنگی سیاسی و کولتووری بووە و تاوەکو ئێستاش ژیان تێیدا بەردەوامە و لەکۆنەوە شوێنی پێکەوە ژیانی نەتەوە و ئاینی جیاواز بووە. ئامانجی کۆنسێرتی شارەکانی نێرگزیش زیاتر ناساندنی ئەم لایەنەی قەڵای هەولێر بوو بە گەشتیاران.
هونەرمەند نەسیر شەممە، ژەنیاری بەناوبانگی عوود و باڵیۆزی ئاشتیی ڕێکخراوی یۆنسکۆ لە کۆنسێرتی شارەکانی نێرگز بەڵگەنامەی ئۆرجیناڵی تۆمارکردنی قەڵای هەولێری لەو ڕێکخراوە پێشکەش بە تۆڕی میدیایی ڕووداو کرد.
ژەنیارانی ئەم کۆنسێرتە لە ئێران، فەرەنسا، ئیسپانیا، تورکیا، هەرێمی #کوردستان#، پاکستان و ئەمریکاوە هاتبوون. نەسیر دەڵێت ئەو زنجیرە کۆنسێرتە بەردەوام دەبێ تاوەکو پەیامی ئاشتی و دووبارە ژیانەوە لەڕێگەی میوزیک بە خەڵکی جیهان بگەیێنین.
نەسیر شەممە لەگەڵ (رووداو)، نزیکەی ساڵێکە سەرقاڵی ئامادەکارین بۆ ئەم کۆنسێرتە، ئەو دەڵێت: حەزمان کرد کارێک بکەین لە ئاست پێگەی قەڵای هەولێر و جەماوەرەکەی بێت، ساڵێکە بە وردی کار دەکەین، خۆشبەختانە سەرکەوتنێکی باشمان بەدەستهێنا، هەموو ئەو ژەنیارانەی لەم گرووپە لەگەڵماندابوون، لە بەهرەدارترین ژەنیارەکانی جیهان بوون. مایەی خۆشبەختییە کە لەتەنیشت یەکدی میوزیک دەژەنین، هەر یەک لە ئێمەش چێژ لە توانای یەکدی وەردەگرین.
کۆنسێرتی شاری نێرگز لە هەولێر کۆتایی نایەت، بەڵکو دەبێتە زنجیرە کۆنسێرتێک و بە وڵاتاندا دەگەڕێت. نەسیر شەممە گوتی: دوای کۆنسێرتەکەی قەڵای هەولێر، دەست بە سازکردنی زنجیرە کۆنسێرتێکی جیهانی دەکەین. کۆنسێرتی دووەممان لە مانگی ئۆکتۆبەری داهاتوو دەبێت کە هاوکات دەبێت لەگەڵ ڕۆژی جیهانیی میوزیک. کۆنسێرتەکە هەر لەژێر ناونیشانی شارەکانی نێرگز دەبێت و بەهەمان ناوەڕۆکیش پێشکەش دەکرێت.
نەسیر شەممە لەسەر ستەیجی کۆنسێرتی شارەکانی نێرگز بەرامبەر نزیکەی 3 هەزار ئامادەبوو، پەسنی شاری هەولێری دا و گوتی: دەمەوێ ئەم بۆنەیە بقۆزمەوە بۆ ئەوەی دیارییەک پێشکەشی هەولێر بکەم، بۆ خەڵکی شاری هەولێر و ئەوانەی کاردەکەن بۆ ئەوەی ئەم شارە بە گەشەسەندوویی بمێنێتەوە و پێشەنگی جوانی بێت و نموونەیەک بێت بۆ هەموو جیهان بۆ لێبووردەیی، دەمانەوێ ببێتە شاری کۆکردنەوەی هەموو پێکهاتەکان. هەولێر و کوردستان بەنموونەیەکی جوان دەبینم کە سەرنجی هەموو جیهان بۆ خۆی ڕابکێشێ.
عەلی قەمسەری: قەڵا هەستبزوێنە
عەلی قەمسەری کە ژەنیارێکی ئێرانییە و بە گوڕوتینەوە ئامێری تاری دەژەنی، لەبارەی کۆنسێرتەکەی سەر قەڵای هەولێر بە (رووداو)ی گوت: ئەم ئەزموونە بۆ من تەنیا ئەزموونی کۆنسێرت و بەشداری لە گرووپێکدا نییە، بەڵکو ئەزموونی ژیانە، چونکە ئەزموونی کارکردن لە نزیکەوە لەگەڵ کەسایەتییەکی گەورەی وەک مامۆستا نەسیر شەممە و ئازیزانی دیکە بۆ من زۆر سەرنجڕاکێشە. بۆ من شتێکی هەستهەژێنە کە لە قەڵای هەولێر بەشداربم، بەتایبەت لەبەر ئەو ژینگە تایبەتەی کە کۆنترین شوێنەواری نیشتەجێبوونە لە جیهاندا، وێڕای ئەوەی ئامادەبووانی کۆنسێرتی شاری نێرگز ژمارەیان زۆر بوو، بەڵام زۆر بێدەنگ بوون و بە ڕاستی خەڵکێکی هۆشیار بوون و هۆگری میوزیک و هونەر بوون.
رۆبین ڤاسێ، ژەنیاری ئامێرەکانی ڕیتم، خەڵکی فەرەنسایە، هەر خۆی کۆمەڵێک ئامێری ڕیتمی دروستکردووە، ئەمەش وایکردووە چاوی زۆربەی ئامادەبووان لەسەر ئامێرەکانی بێت.
کاتێک پرسیار لەبارەی میوزیکی کوردی لە ڤاسێ دەکەی، ئەو دەڵێت دەمێکە ئاشنایە بە میوزیکی کوردی زیاتر لە هەشت ساڵە ئاشنای میوزیکی کوردیم، لەگەڵ ژەنیارانی کورد میوزیک دەژەنم. یەکەم کەسیش کە ئەم وڵات و ئەم میوزیک و کولتوورەی پێ ئاشناکردم هەژار زەهاوی بوو.
ئەشرەف شەریف: پاکستان و کوردستان برای یەکدین
ئەشرەف شەریف خان، لە پاکستانەوە هاتبوو، ئامێرێکی ناوچەکەی خۆی هێناوەتە هەولێر، ئامێرێکی نامۆ بە خەڵک، بەڵام دەنگەکەی زوو لە دەرگای دڵ دەدات. ئەشرەف دەڵێت: سازدانی ئەم کۆنسێرتە بە تایبەت لەم کاتەدا زۆر گرنگە. چونکە هەستێکم هەیە کە جیهان بەرەو دابەشبوون دەڕوات. ئەم پڕۆژەیەش دەیەوێت هەموو جیهان پێکەوە کۆبکاتەوە.
هەروەها گوتی: ئەم پرۆژەیە بەڕاستی بۆ ئاشتی و خۆشەویستییە، من زۆر دڵخۆشم، چێژ لە میوزیک وەردەگرم بێئەوەی گوێ بەوە بدەم ئاخۆ میوزیکی کام بەشەی جیهانە. من ئەو هەستەم هەیە کە ئێمە (پاکستان) و کوردستان برای یەکدین.
میوزیک و ئاشتی
گواتا کامپۆ، سەکسیفۆنژەنێکی ناوداری ئیسپانیایە، بە جموجۆڵە خێراکانی سەرنجی هەموو ئامادەبووانی کۆنسێرتەکەی بۆ خۆی ڕاکێشابوو، ئەو باوەڕی وایە میوزیک و ئاشتی بەبێ یەکدی هەڵناکەن من باوەڕم وایە ئەگەر شوێنێک میوزیکی لێبێت، ئاشتیشی لێیە، چونکە میوزیک ئاشتی بنیات دەنێت، میوزیک هیچکات توندئاژۆیی و تێکهەڵچوون ناهێنێتە ئاراوە. ئێمە ئێستا لەسەر خاکێکین کە هەمیشە میوزیک بەشێک بووە لێی، بەڵام کۆمەڵێک پرسی ئاڵۆزیش لەم ناوچە هەن، بۆیە ئێستا پێویستی بە دەنگی میوزیک هەیە، تاوەکو بتوانێت ئاشتی لەگەڵ خۆی بهێنێ، میوزیک ڕێبەرێکی زۆرباشە بۆ ئاشتی.
کارن بریگس، بۆ ماوەی 13 ساڵە لەگەڵ گرووپی میوزیکی ناوداری یۆنانی (یانی) کاری کردووە، لەبارەی کۆنسێرتی شارەکانی نێرگز لەسەر قەڵای هەولێر گوتی: من زۆر چێژم لە کۆنسێرتەکە وەرگرت، چونکە ژەنیاری زۆر لێهاتوومان لەگەڵ بوو، بەڕاستی شەوێکی خۆش بوو، لەگەڵ ئەوەشدا خەڵێکی زۆر باش و هۆشیار ئامادە بوون، کۆنسێرتەکەش لە کەشوهەوایەکی زۆر خۆشدا بەڕێوەچوو، هەر چۆنێک بێت، مایەی دڵخۆشیە کە خەڵک لێرە پاڵپشتی لە میوزیکی ڕاستەوخۆ دەکەن.
هەژار زەهاوی کە بە دەف بەشداری لە کۆنسێرتەکەدا کردبوو، گوتی: دەکرێت هەموومان کار لەسەر ئەوە بکەین کە قەڵای هەولێر بکەینە براندێکی جیهانی و ساڵانە کۆنسێرت و فێستیڤاڵی جیهانی تێدا بکرێ، ئەمە هاوکار دەبێت بۆ ئەوەی جیهان زیاتر کورد و قەڵای هەولێر و هونەر و کولتووری کوردی بناسن.