دواڕۆژ، عیسا عەبدولقەهار
بەرپرسی بەشی هاوردەی وەزارەتی کشتوکاڵی هەرێم ڕایدەگەیەنێت: 30%ی هاوردەکردنی گۆشتی سوور لە سێ وڵاتەوە بەپێی مەرج و ڕێنماییەکانی هەرێم هاوردە دەکرێت، دەشڵێت: هەرێم ساڵانە پێویستی بە 100 هەزار تۆن گۆشتی سوور هەیە.
میقداد ئیبراهیم، بەرپرسی بەشی هاوردەی وەزارەتی کشتوکاڵ و سەرچاوەکانی ئاوی هەرێم بە دواڕۆژی ڕاگەیاند: هەرێمی کوردستان ساڵانە پێویستی بە نزیکەی 100 هەزار تۆن گۆشتی سوورەوە هەیە، بەڵام له و ڕێژەیە تەنیا 70%ی لەهەرێم بەرهەمدەهێنرێت و 30%ی لە وڵاتانی دیکەوە هەناردەی هەرێم دەکرێت.
وتیشی: گۆشتی سوور لە وڵاتانی بەرازیل و ئۆکرانیا و جۆرجیاوە هەناردە دەکرێت، بەڵام هەناردەکردنی گۆشتی سوور به و مەرج و ڕێنماییانە دەبێت کە لەلایەن وەزارەتی کشتوکاڵەوە دیاریکراوە.
لەبارەی مەرجەکانیشەوە، وتی: بەپێی ڕێنمایی ژمارە 2ی ساڵی 2010ی وەزارەتی کشتوکاڵ، دەبێت ئه و ئاژەڵە بۆ ماوەی 21 ڕۆژ لەژێر چاودێری کەرەنتینەی ئەو وڵاتە بێت بۆ پشکنین و نەبوونی نەخۆشی، هەروەها نابێت لەماوەی ساڵێکدا هیچ جۆرە نەخۆشییەکی ئاژەڵان بڵاوبووبێتەوە.
لەبارەی ڕێگرییەکانی وەزارەتی کشتوکاڵ بۆ هاوردەکردنی گۆشتی سوور لە وڵاتانی دیکەوە، میقداد ئیبراهیم وتی: هاوکات لەگەڵ ئه و سێ وڵاتە، بازرگانان ئازاد گۆشتی سوور یاخود ئاژەڵ لەهەر وڵاتێکی دیکە هاوردە بکەن بەمەرجێک نەخۆشی ئاژەڵان له و وڵاتە بڵاونەبووبێتەوە.[1]
#13-01-2019#